2 Ko-Kɔrɔta-Karan 20 - ALLALA KUMƐ

Sibolo-Su Sawa Kɛlɛ-Koe Mansa Yɛhosafati Bolo

¹ Wati tenbinɛ, Mohabununa kɛlɛ-dannu wo, Amonnuna kɛlɛ-dannu wo, anubɛ Mɛhunnuna kɛlɛ-dannu ka bɔ Idɔm nyamanɛ rɔ, wonu tara bui Yuda nyamanɛ ma.

² Kilayɛ donu nara Mansa Yɛhosafati wara ka a fɔ a ye ko, “Kɛlɛ-den-siyaman bara na ile kɛlɛ tinɛ ka bɔ Dalɛ Faganɛ kɔma. Anu bara ban Hasɛsɔn-Tema soe birala-a-la.” (Soe wo tɔgɛ do le Ɛngidi.)

³ Mansa Yɛhosafati kilanta ha a ya Mari matara ko a ni hɛnkili di a ma. A ya a fɔ ata nyamanita-mɔgɛ bɛɛ ye ko anu ni sunyɛ don.

⁴ Mɔgɛnu nara Yerusalɛm ka bɔ Yuda nyamanɛ soe bɛɛ rɔ alako anu si hɛnkili sɔrɔn Mari bolo nya min.

⁵ Minnu nara, wonubɛ Yerusalɛm so-burɔ-mɔgɛnu nadɛnta Mari Bato-Bɔn kata-kurɛ burɔ. Mansa Yɛhosafati sɔra anu yakɔrɔ.

⁶ A ya matarali-kɛ a kulu-mayɛlɛnɛ la, a ko, “E, ma benbanuta Mari Alla, ile Arinyɛnɛ anubɛ Duninyama-Mansɛ, i sɛnbɛ kolo. Mɔgɔ-wo-mɔgɔ ti a sɔ i kɛlɛ-koe la.

⁷ Mata Alla le ile la. I ya ila Isirɛla mɔgɛnu nana nyamanɛ kɛ rɔ tumɛ min, yanni ma ni na mɔgɛ minnu bi yan nun, i wara anu gben ma yarɔ nun, ado i ya Isirɛla nyamanɛ kɛ di i diyana-mɔgɛ Iburayima bɔnsɔn ma ka ma anu halala-nyamanɛ la burubukai!

⁸ Wonu siginɛ yan. Anu bara Bato-Bɔn sɔ ka to i gbiliyala.

⁹ Anu ya a lɔn ko kɛlɛ wo, kiraya-fitinɛ wo, kɔnkɔ-fitinɛ wo, anubɛ ni tɔrɔya-wo-tɔrɔya ya anu taran, anu si na anu sɔ Bato-Bɔn kɛ yarɔ ka i matara, i si anuna matarali-kan lamɔɛn ka anu dɛnbɛ.

¹⁰ “Kaka gbɛ, i ma a yen, Amonnuna kɛlɛ-dannu wo, Mohabununa kɛlɛ-dannu wo, anubɛ Idɔm nyamanita-mɔgɛnuna kɛlɛ-dannu wo, wonu bara wuli ma kɛlɛla. Wo le, ma benbanu bɔra Iyipiti tumɛ min, i ma sɔn anu ni tenbi mɔgɛ kɛnuta nyamanɛ rɔ. Wo le ya a to, anu tenbira anuna nyamanɛ kan-kɔma-kilɛ la alako anu kana anu kasara.

¹¹ Nba kaka, anu bara anu ya-lamunun ma la. Anu bara na ka ma gben mala nyamanɛ rɔ i ya min di ma benbanu ma.

¹² Mata Alla le ile la. Kɛlɛ-den-siyamɛ minnu bara na ma kan ma kɛ la, ma dɛnbɛna-gbɛrɛ sa kɛlɛ kɛ rɔ fɔ ile. I yandi, na ma yoge kɛnu tɔrɔ ma ye. Ma kɔndɔfilinɛ. Ma yɛ bɛnnɛ ile le ma ma dɛnbɛn-koe rɔ.”

¹³ Yuda nyamanita-mɔgɛnu, a keimɛ wo, a musumɛ wo, anubɛ dennɛnu, anu bɛɛ sɔra Bato-Bɔn yarɔ.

¹⁴ Lifayi mɔgɛ do ye mɔgɛ kɛnu tɛma nyɔ, Sakarayala den Yahasayɛli, kɔni, Marita sɛnbɛ yigira wo ma. Sakaraya fa tɔgɛ le Bɛnaya, wo fanan fa tɔgɛ le Yeyiyɛli, wo fanan fa tɔgɛ le Matanaya, anuna kebila-kunyɛ tɔgɛ le Esafi.

¹⁵ Yahasayɛli wo ya a fɔ ko, “N tigi Mansa Yɛhosafati, wobɛ ila mɔgɛnu, wo ni wo tole masɔ. Yerusalɛm so-burɔ-mɔgɛnu wo, Yuda nyamanita-mɔgɛnu wo, Mari ko wo yisi ma kana gboya, ado wo kana kilan kɛlɛ-den-siyamɛ kɛnu na. Alla letan kɛlɛ kɛ la, woleta ma.

¹⁶ Anu tenbi yɛlɛla Sisiya kɔnkɔ-gbɛran rɔ sina, wo ni ta bui anu ma. Wo si anu taran folo-kunyɛ la min bi tala wula-da-rakolɔn wara la Yɛruyɛli soe dafɛ.

¹⁷ Wole ti anu kɛlɛ. Wo ta wo sɔ-bole rabɛn ka anu makɔni. Wo si a yen, Mari ye nɔlɛ dila wo ma nya min. Wole Yuda nyamanita-mɔgɛnu anubɛ Yerusalɛm so-burɔ-mɔgɛnu, wo kana kilan ka sika. Wo ta kɛlɛ-kɛ-tinɛ. Mari si taran wo fɛ!”

¹⁸ Mansa Yɛhosafati ya a maburun dugi ma. Wo kɔma, ala mɔgɛ bɛɛ ya anu maburun dugi ma Mari bato tinɛ.

¹⁹ Kora kebila-mɔgɛnu wo, Kohati kebila-mɔgɛnu wo, Lifayi bɔnsɔn-mɔgɛnu, kɔni, anu dama ya anu sɔ ka anu kulu mayɛlɛ Isirɛlata Mari Alla tanto tinɛ.

²⁰ Wo banda kɛ subaga, mɔgɛ bɛɛ ya a lawuli ka ta wula-da-rakolɔn wo ma min bi Tekoya soe wara la. Yanni anu ni wuli, Mansa Yɛhosafati ya a fɔ anu ye ko, “Wole Yuda nyamanita-mɔgɛnu anubɛ Yerusalɛm so-burɔ-mɔgɛnu, wo bɛɛsi ni lanayɛ sa wota Mari Alla rɔ. Wo wa ke, wo ni wo sɔ gben! Wo ni la Marita kumɛ la ala nɛbinu ya min fɔ wo ye. Wo si a ma, wo ni nɔlɛ sɔrɔn anu kuma.”

²¹ Anubɛ ala mɔgɛnu ban anu kun nayigila, ale mansɛ ya a fɔ ala fɔli-kɛlɛnu ye ko anu ni anuna fɔli-durukinu bila anu kan na anu si minnu bila anu kan na ladɛn-sɛnimɛnu tɔ fɔli-kɛ-tinɛ. Anu ni anu sɔ mɔgɛnu yarɔ ta tinɛ ka sigi wo sa ko, “Mari tanto. Ala keninteyɛ ti ban.”

²² Sigi-sɛ dabirɛ anu bolo, Mari ya a ma, anu yogenu kumakɔra.

²³ Amonnuna kɛlɛ-dannu anubɛ Mohabununa kɛlɛ-dannu tara bui Idɔm kɛlɛ-dannu ma ka anu bɛɛ kasara. Anu ban wonu kɛla, Amonnu anubɛ Mohabunu ya anu ya-lamunun anu nyɔgɔn na ka anu nyɔgɔn faga.

²⁴ Yuda kɛlɛ-dannu kera bondɔn-nayan-bɛ do rɔ wulɛ rɔ. Anu ya anu yɛ lata anu yogenu telen tɔ. Anu ya anu yoge wonu furinu sanɛ yen tala dugi ma. Hali mɔgɔ-den-kelen-kunyɛ ma bɔ a rɔ.

²⁵ Mansa Yɛhosafati anubɛ ala kɛlɛ-dannu tara anu yoge wonu bolo-fannu bi tinɛ. A fɛrɛya-bɔ wo, a kɛlɛ-kɛ-miran wo, fen-kolomɛ donu wo, anu ya wo siyaman taboroko-barakanɛ taran. Tele sawa dɛgɛdɛgɛ, anu bi miran wonu kundɛnna, ado miran donu bi nyɔ, anu ma ke tala wonu na anu bolo.

²⁶ A tele nani nyɔgɛ le ma, anu ya anu nadɛn Baraka lɛɛ rɔ alako anu ni baraka bira anuta Mari ye ka a tɛgɛ a ara min kɛ anu ye. (Wo le ya a to, anu ya lɛɛ wo kele ko Baraka lɛɛ.)

²⁷ Wo kɔma, Mansa Yɛhosafati sɔra ala kɛlɛ-dannu yarɔ ka sɛgi Yerusalɛm soe burɔ sewɛ la bawo Mari ara ban anu yogenu fagala anu ye feu!

²⁸ Anu ke Yerusalɛm soe burɔ, anu dama tara Bato-Bɔn kata burɔ, fɔli-fannu kɛnɛ a rɔ anu bolo, a sɔrɔn wo, a serema wo, a buru wo.

²⁹ Mari ara Isirɛla yogenu nɔ nya min, sibolo-gbɛrɛnu ya wo lamɔɛn min kɛ, anu kilanta.

³⁰ Mansa Yɛhosafati ya ala mansaya-toe duni yisi-kimɛ rɔ. Alla ya ala nyamanɛ latanka kan tinɛ bɛɛ rɔ ala foolɛ bɛɛ rɔ.

Mansa Yɛhosafatila Mansayɛla Ban

³¹ Yɛhosafati mara mansɛ la a sɔrɔn-san bi-sawa ani san loli nyɔgɛ le ma. A ya mansayɛ kɛ san mogan-ni-loli ka bɔ Yerusalɛm soe burɔ. A na tɔgɛ Asuba, Silihayila dunmusi, kɔni.

³² A ya a fa Mansa Esa sɔn-nyimɛ bi ka ko-latelennɛ kɛ Mari yala.

³³ Kɔnɔ hali wo, a ma Alla-lɔnbɛlɛnuna bɛsi-kɔ-tinɛ bɛɛ tinya, ado ala nyamanita-mɔgɛnu ma anu benbanuta Alla bato anu yisi bɛɛ la.

³⁴ Mansa Yɛhosafati ya koe min bɛɛsi ma ala mansayɛ kɔrɔ ka a fɔlɔ a lawulan anubɛ a laban ma, wonu damasi sɛbɛnɛ Hananila den Nɛbi Yehuta nɛbiya-buku rɔ min sɛbɛnɛ Isirɛla mansɛnuna buku do rɔ.

³⁵ Wati tenbinɛ, Yuda Mansa Yɛhosafati anubɛ Isirɛla Mansa Ehasaya ya ko-rabɛn-kɛ, ado Mansa Ehasaya wo ya karagbɛlɛya-ko-siyaman nadan.

³⁶ Anu tora kan kelen tɔ kulun-belebelenu-nadan-koe rɔ Iseyɔn-Kiba soe dafɛ.

³⁷ Kɔnɔ Dodafala den Ɛliyesa, Marasa kɛ, kɔni, wo ya wɔlɔyiya-kumɛ fɔ Mansa Yɛhosafati kan ma, a ko, “Bawo wobɛ Mansa Ehasaya ara diya nya min kɛ la ka kulɔnnu nadan, Mari si wonu tinya.” Wo kɔma, kulɔn wonu tinyanta. Anu ma yigi yi rɔ tun.