2 Ko-Kɔrɔta-Karan 2 - ALLALA KUMƐ

Alla Bato-Bon-Mirannu Nadɛn-Koe

¹ Mansa Silamɛni ya a latɛgɛ ko ka Mari Bato-Bɔn sɔ anubɛ a nyɛrɛta bolɔn.

² Mɔgɔ waga bi-wɔrɔnfila (70,000), a ya wonu denu ma Bato-Bon-miran-madununɛnu na. Mɔgɔ waga bi-segin (80,000), a ya wonu denu ma kuru-lɛsɛlɛnu na. A ya mɔgɔ waga sawa ani mɔgɔ kɛmɛ wɔrɔ (3,600) bɔ minnu si to wɔlɛ wonu kumafɛlɛnna.

³ Mansa Silamɛni ya kilayɛ lata Mansa Hairam ma min siginɛ Taya soe burɔ. A ya a fɔ ko, “I ya kɔlɔma-hakikɛ minnu su mayira n fa Mansa Dawuda ma nun, a ya ala bolɔn ladan wonu na. A sɔgɛ ye n na, i ni wo sufanu mayira nde fanan ma.

⁴ N bi nala Bato-Bɔn sɔla alako ka nta Mari Alla gbiliya. Nyɔ si ma kan-tina-sɛnimɛ la mabɛ nna mɔgɛnu si a bato kan min. Ma si isɛnti-hakikɛnu mintan nyɔ. Ma si to biredi-sɛnimɛ dila a ma nyɔ fanan. Ma si to saraka-mintantɛnu dila a ma sɔgɔma ani wurɛ la. Sulen-Tele wo, Karɛ-Kurɛ-Ladɛn wo, anubɛ a tele-sɛnima-toenu, ma si to sarakɛ wonu mintanna a ye ka mata Mari Alla gbiliya. Mata Mari Alla ko fɔ ma ni kɛnu ma Isirɛla nyamanɛ rɔ habadan!

⁵ N miriya n burɔ, n bi nala bato-bon-hakika-kinama-wɛ sɔla, ado maleta Mari Alla sɛnbɛ kolo bɛsɛnutɛ ko.

⁶ Yon si ke bɔn sɔla Alla ye? Hali san-kole kɛ kolo nya-wo-nya, nyɔ dɔgɔ ale ye. Ni n ya a Bato-Bɔn sɔ, kan tinɛ le wo la n si isɛnti mintan kan min Alla ye dɔrɔn.

⁷ Woletɔ i yandi, boloma-wɔli-kɛlɛ donu nana n ma minnu kusan sɛnɛ anubɛ wodi-gbɛ anubɛ silɛɛ anubɛ nɛgɛ ladanna. Wo kɔma, i ni mɔgɛnu nana n ma minnu kusan kura-bilolamɛ anubɛ kura-wulan anubɛ kura-finyɛ ladanna. Wonu ni na kofu nna boloma-wɔli-kɛlɛnu ma, n fa Mansa Dawuda ya minnu yabɔ Yerusalɛm soe burɔ Yuda nyamanɛ kɛ rɔ.

⁸ Bawo n ya a lɔn ko ila kɔn-tɛgɛlɛnu kusan kosɛbɛ, woletɔ a sɔgɛ ye n na, i ni kɔlɔma-subolo sawa lana n ma ka bɔ Lɛbanan gbɔngbɔnnu tɔ, sida wo, saiparasi wo, anubɛ yunipa. N tabɛnni de ka nta mɔgɛnu nata ila mɔgɛnu dɛnbɛn tinɛ

⁹ alako anu ni kɔlɔma-siyaman sɔrɔn bawo n bi nala Bato-Bɔn min nadanna kɛ la, wo si koloya, a mafɛlɛn si kinya!

¹⁰ N si anuna kɔndɔn labɔ. N si fui-fan-subolo fila di ila kɔn-tɛgɛlɛnu ma. N si a subolo kelan bɔrɔ waga bi-loli ani bɔrɔ kɛmɛ fila (50,200) di anu ma. N si wo nyɔgɔn yirika di anu ma a su doi fanan tɔ. N si nɔnbɔ-gbɔ-yi durɔmu waga fila ani durɔmu kɛmɛ sawa (2,300) di anu ma ka Ɔlifi-tuli durɔmu waga fila ani durɔmu kɛmɛ sawa (2,300) di anu ma fanan.”

¹¹ Kilayɛ wo ke, Mansa Hairam ya kilayɛ wo kɔfili Mansa Silamɛni ma. A ko, “Mari ya ile ma mansɛ la bawo ata mɔgɛnu di a ye.

¹² Ma si Isirɛlata Mari Alla tanto min ya san-kole anubɛ dugu-kole dan. Wo le ya den hɛnkilimɛ di Mansa Dawuda ma min kunyɛ lafanɛ hɛnkili anubɛ ko-kɔrɔ-lɔn la. A ara wuli Mari Bato-Bɔn anubɛ a nyɛrɛta bolon sɔɛ la kaka.

¹³ N si mɔgɛ do lata i ma min kusan boloma-wɔlɛ kɛla. A tɔgɛ le Huram.

¹⁴ Dan bɔnsɔn-mɔgɛ do le a na la. Taya kɛ le a fa la. A kusan sɛnɛ wo, wodi-gbɛ wo, silɛɛ wo, nɛgɛ wo, kuri wo, anubɛ kɔn-ko-wɔlɛnu na. A kusan kura-bilolamɛ anubɛ kura-wulan anubɛ kura-finyɛ ladanna. A kusan mɔlɔni-ko-nyagan sufa bɛɛ la. I ya mɔlɔni-su-wo-su yira a la, a si wo ladan. I ni a kofu ita boloma-wɔli-kɛlɛnu ma i fa Mansa Dawuda ya minnu yabɔ.

¹⁵ Kaka, i wara n yili-madiya fui-fan anubɛ nɔnbɔ-gbɔ-yi anubɛ ɔlifi-tuli minnuna ko la kɛ la, i ni wonu nana n ma.

¹⁶ Nna wɔli-kɛlɛnu si kɔlɔmanu tɛgɛ Lɛbanan kɔnkɛnu ma ka ta anu na kɔgɔ-yi dafɛ. Anu si anu kiri anu nyɔgɔn ma iko bɛndɛ ka anu nata yi kuma fɔ Yapa soe tɛgɛn-dɛ la. Ileta mɔgɛnu si anu bi nyɔ ka ta anu na Yerusalɛm soe burɔ.”

Alla Bato-Bɔn Sɔ-Koe Mansa Silamɛni Bolo

¹⁷ Sundan min bɛɛsi ye Isirɛla nyamanɛ rɔ, Mansa Silamɛni ya wonu damasi dan iko a fa Mansa Dawuda ya a ma nya min nun. Sundan minnu taranta ala nyamanɛ rɔ wo wati rɔ, wo le yirika bɛnnɛ mɔgɔ waga kɛmɛ, mɔgɔ waga bi-loli ani mɔgɔ waga sawa ani mɔgɔ kɛmɛ wɔrɔ (153,600) ma.

¹⁸ A ya mɔgɔ waga bi-wɔrɔnfila (70,000) bɔ kɛnu tɔ ka wonu ma Bato-Bon-miran madununɛnu na. A ya mɔgɔ waga bi-segin (80,000) bɔ anu tɔ fanan ka wonu ma kuru-lɛsɛlɛnu na kɔnkɛnu tɔ. A ya mɔgɔ waga sawa ani kɛmɛ wɔrɔ (3,600) bɔ minnu si to wɔlɛ wonu kumafɛlɛnna.