2 Ko-Kɔrɔta-Karan 19 - ALLALA KUMƐ

Mansa Yɛhosafati Makuma-Koe Nɛbi Yehu Bolo

¹ Yuda Mansa Yɛhosafati sɛgira ala bolɔn la Yerusalɛm soe burɔ yisi-kimɛ rɔ.

² Hananila den Nɛbi Yehu tara mansɛ taran ka a fɔ a ye ko, “I miri de! Alla gboyanɛ karagbɛlɛ minnu ye, a kin ka wonu dɛnbɛ, wa? I wara min ma kɛ la, wo ara Mari fonde bɔ i kan ma.

³ Kɔnɔ hali wo, ko-nyimɛ donu bi i bolo ma bawo mɔgɛnu bi Asura bɛsɛ minnu kɔla nun, i wara wonu tinya. I wara i karan ka Mari sako kɛ.”

Nyamanɛ Lafisaya-Koe Mansa Yɛhosafati Bolo

⁴ Mansa Yɛhosafati siginɛ Yerusalɛm soe burɔ. Kɔnɔ hali wo, a ye tagamana ala mɔgɛnu tɛma ka a bi Biri-Siba soe dugula-waralɛ la ha ka ta ke Ifɛrɛm kɔnkɔ-nyamanɛ kantɔ-waralɛ ma. A wa ta kan-bo-kan, a si a ma, mɔgɛnu ni sɛgi anu benbanuta Mari Alla ma.

⁵ A ya kiti-salɛnu yabɔ so-latankanɛ bɛɛ rɔ Yuda nyamanɛ rɔ.

⁶ A ya a fɔ wonu ye ko, “Wo ni a ma wo fɛrɛma kiti tɛgɛ tinɛnu tɔ. Wo sa wɔlila mɔgɔta sarati kɔrɔ, wo ye wɔlila Marita sarati le kɔrɔ, ado a ye wo fɛ kiti tɛgɛ tinɛ.

⁷ Wo ni Mari gbiliya ka kitinu tɛgɛ a kilɛ fɛ. Mata Mari Alla ti sɔn ko-radunɛ ma, lafisayali, anubɛ nɔnfulu-birɛ kiti tɛgɛ tinɛ.”

⁸ Mansa Yɛhosafati ya Lifayinu anubɛ saraka-masɔlɛnu anubɛ mɔgɔ-ba donu bɔ ka wonu ma kiti-tɛgɛlɛnu na Yerusalɛm soe burɔ. Ni mɔgɛ do ya Marita sereya tinya wo, ni kɛlɛ-nyɔgɔnyɛ donta Yerusalɛm mɔgɛ donu tɛma wo, kiti-tɛgɛlɛ kɛnu si wo kiti tɛgɛ.

⁹ Ale mansɛ ya a fɔ kiti-tɛgɛlɛ wonu ye ko, “Ni wo ye wola kiti tɛgɛla, wo ni Mari gbiliya. Ni wo ye ko-wo-ko rɔ, wo ni ala tɔnnu bira fɔlɔn.

¹⁰ Ni Yuda mɔgɛnu nara ka bɔ soe donu tɔ ka na mɔgɔ-faga-kiti la anubɛ kiti-gbɛrɛ donu, wo ni anu makawandi alako anu kana bila Mari la. Marila diminyɛ kana to wobɛ wo na-kelen-nyɔgɛnu kuma. Ni wo ya wola wɔlɛ kɛ a kilɛ fɛ, wo ti hakɛ sɔrɔn.

¹¹ Saraka-Masɔla-Kun-Tigi-Wɛ Amaraya si ma dina-kiti-tɛgɛla-kun-tigi la. Sumanyilala den Sebadaya min bi Yuda nyamanɛ kun na, wo si ma kiti-tɛgɛla-kun-tigi la kiti-toenu kuma. Lifayinu fananta wɔlɛ ye min na, ni kiti-tɛgɛlɛnu ya ko-wo-ko fɔ, wo ni bɛn. Wo ni wo kerinteya ka nta kumɛnu bira iko n bara a fɔ wo ye nya min kɛ la. Alamɛ Mari tora tonya-tigi fɛ!”