2 Ko-Kɔrɔta-Karan 16 - ALLALA KUMƐ

Mansa Esa anubɛ Mansa Bɛnhedadila Diya-Koe

¹ Yuda Mansa Esala mansayɛ san bi-sawa ani san wɔrɔ (36) nyɔgɛ ma, Isirɛla Mansa Beyasa tara bui Yuda nyamanita-mɔgɛnu ma. Ale Mansa Beyasa ya tarɛ mini Rema soe ma alako a ni kilɛ tɛgɛ anubɛ Yuda nyamanita-mɔgɛnu tɛma.

² Mansa Esa ya sɛnɛ anubɛ wodi-gbɛ bi Mari Bato-Bɔn anubɛ ata bolɔn la ka wonu nata Siriya Mansa Bɛnhedadi ma Damasika soe burɔ. A ya sarakanɛ lata ale mansɛ wo ma, a ko,

³ “Ma ni to ko kelen tɔ iko ma fanu bi nya min nun. I sanbɛ le sɛnɛ anubɛ wodi-gbɛ kɛnu na alako i ni bɔ Isirɛla Mansa Beyasa fɛ. Wo si a ma, mansɛ wo fanan ni ala kɛlɛ-dannu bɔ nta nyamanɛ rɔ.”

⁴ Siriya Mansa Bɛnhedadi sɔnta wo ma. Wo le ya a ma, ale fanan ya ala kɛlɛ-den-kunyɛnu anubɛ ala kɛlɛ-dannu nata ka ta bui Isirɛla mɔgɛnuna so-kunbɛ donu ma. Anu ya soe minnu bi Isirɛla nyamanɛ rɔ, wonu tɔgɛ le kɛnu na, Iyɔn wo, Dan wo, anubɛ Ebɛli-Bɛti-Meyaka. Wo kɔma, anu tara Nafatali bɔnsɔn-mɔgɛnuna fen-namara-soe bɛɛ bi anu bolo.

⁵ Mansa Beyasa ya a lamɔɛn min kɛ ko Siriyanu bara ta bui ala nyamanɛ ma, a ya tara-sɔ-ko-wɔlɛ boloka Rema soe burɔ.

⁶ Wo kɔma, Mansa Esa ya Yuda mɔgɛ donu nadɛn ko anu ni ta tara-sɔ-miran wonu na ka ta tarɛ mini Kiba anubɛ Misipa soe ma. A kuru wo, a kɔlɔma wo, anu ni ta wo bɛɛ la. Anu ya Rema soe fanka don nun.

Nɛbi Hanani Wara-Koe

⁷ Wo wati rɔ, Nɛbi Hanani tara Mansa Esa wara. A ya a fɔ a ye ko, “Bawo i wara i yigi sa Siriya mansɛ rɔ, i ma i yigi sa ita Mari Alla rɔ, wo le ya a to, tɔ-a-la, i ti nɔ-ko sɔrɔn Siriya mansɛ anubɛ ala kɛlɛ-dannu ma.

⁸ Sudan kɛlɛ-dannu anubɛ Libiya kɛlɛ-dannu anubɛ anuna kirindi-siyamɛnu anubɛ anuna so-laburila-siyamɛnu, anu ma siya Siriya kɛlɛ-dannu ko i ya minnu nɔ nun, ba? Kɔnɔ bawo i lara Mari la a fɔlɔtɛ rɔ min kɛ, woletɔ a ya nɔlɛ di i ma worɔ.

⁹ Mari ye duninya mumɛ bɛɛ kumafɛlɛnna, ado a si ata sɛnbɛ di ata mɔgɔ-latelennɛnu ma. Mansɛ, i wara yuwayɛ kɛ. Ka a bi bi ma ha tumɛ min di ale ye, kɛlɛ ti bɔ i kun ma mumɛ!”

¹⁰ Mansa Esa diminyara nɛbi wo ma ha a ya a sa banba la. A donta ko-yogoma-kɛ la ata mɔgɛ donu na wo wati rɔ.

Mansa Esa Faga-Koe

¹¹ Mansa Esa ya koe min bɛɛsi ma ala mansayɛ kɔrɔ ka a fɔlɔ a lawulan anubɛ a laban ma, wonu damasi sɛbɛnɛ Yuda anubɛ Isirɛla mansɛnuna buku do rɔ.

¹² Mansa Esala mansayɛ san bi-sawa ani san kɔnɔntɔ nyɔgɛ (39) ma, kirayɛ ya a lanamaraya. Kɔnɔ hali wo, a ma wo sa Mari kin kɔrɔ, fɔ bɛsi-bɔlɛnu.

¹³ San kelen, a fila nyɔgɛ, a ya so-sɛgi-kɛ.

¹⁴ Anu ya a togon ala kuru-kaburu rɔ a ara min tabɛn a nyɛrɛ ye nun Mansa Dawuda halala-luyi ma. Anu ya tulu-suma-diyamɛ susa a furi ma ka a yamatogon kɛnɛnu na. Anu ya ta-wɛ ladɛn a san-koe kuma.