2 Ko-Kɔrɔta-Karan 15 - ALLALA KUMƐ

Nyamanɛ Lafisaya-Koe Mansa Esa Bolo

¹ Allata sɛnbɛ yigira Odɛdila den Asaraya kuma.

² A tara Mansa Esa taran. A ya a fɔ anubɛ ala mɔgɛnu ye ko, “Wole Yuda bɔnsɔn-mɔgɛnu anubɛ Bɛnyamɛ bɔnsɔn-mɔgɛnu, wobɛ wola mansɛ ni wo wɔlɔ matɔlɔ. Fananta wo ye Mari fɛ, a ye wo fanan fɛ. Ni wo ya a nyini, a si a ma, wo ni a yen. Kɔnɔ ni wo ya wo kan-kɔ sɔ a la, ale fanan si wo boloka.

³ Wati donu bara tenbi, wole Isirɛla mɔgɛnu sa Allatayɛ la nun, ado saraka-masɔla sa wo bolo nun minnu si wo labila Alla wara-koe la. Wo sa tɔn kɔrɔ wo wati rɔ.

⁴ Kɔnɔ tɔrɔyɛ nara wo kuma tumɛ min, wo sɛgira wota Mari Alla ma. Wo ya a nyini ha wo ya a yen.

⁵ Wo sa Allata tɔn kɔrɔ tumɛ min, mɔgɔ-wo-mɔgɔ ti yigi-ni-yɛlɛ kɛ bawo yisi-kimɛ sa nyamanɛ wo fenfen tɔ wati wo rɔ.

⁶ Sibole donu bi sibole donu kɛlɛla. Soe donu bi soe donu kɛlɛla bawo Mari ye tɔrɔyɛ lanala wo ma.

⁷ Kɔnɔ wo ni wo yisi gbɛlɛya ka wo kerinteya. Wo ya ko-nyima wo ko-nyima ma, wo si wo tɔnɛ sɔrɔn.”

⁸ Mansa Esa ya nɛbiya-kumɛ kɛ lamɔɛn Nɛbi Asaraya bolo tumɛ min, wo ya a diya don a rɔ. A ya bɛsɛnu tinya Yuda nyamanɛ anubɛ Bɛnyamɛ nyamanɛ rɔ. Soe minnu biranɛ a bolo nun Ifɛrɛm kɔnkɔ-nyamanɛ rɔ, a ya nyɔ-bɛsɛnu tinya. Saraka mintan tinɛ min bi Mari Bato-Bɔn kata burɔ, a ya wo mabɛn.

⁹ Mɔgɔ-siyaman bɔra Ifɛrɛm bɔnsɔn-nyamanɛ anubɛ Manasa bɔnsɔn-nyamanɛ anubɛ Simiyɔn bɔnsɔn-nyamanɛ rɔ ka ta anu sigi Mansa Esa wara nyamanɛ rɔ bawo anu bara a yen ko Mari ye a fɛ. Mansa Esa ya mɔgɛ kɛnu kundɛn anubɛ Bɛnyamɛ anubɛ Yuda bɔnsɔn nyamanita-mɔgɛnu.

¹⁰ Ladɛn kɛ kɛra Yerusalɛm soe burɔ Mansa Esala mansayɛ san tan-ni-loli nyɔgɛ wo karɛ sawa nyɔgɛ ma.

¹¹ Anu nara kolo-fan minnu na ka bɔ kɛlɛ rɔ, wo tele nyɛrɛ rɔ, anu ya sarakɛ wonu denu bɔ Mari ye. Anu ya ninki kɛmɛ wɔrɔnfila (700) anubɛ saga waga wɔrɔnfila (7,000) bɔ Mari ye.

¹² Anu ya sarama-kan kiri anubɛ anu benbanuta Mari Alla tɛma ko anu si to a batola anu yisi bɛɛ la.

¹³ Kei wo, musi wo, denni wo, kina wo, ni minnu ma a bato, anu si wo tigi faga.

¹⁴ Anu ya anu keli anu kulu-mayɛlɛnɛ la Mari tɔgɔ rɔ ka a fɔ ko anu si sarama-kan kɛ bira gben! Wo kɔma, anu ya a lasɔnkɔ ka burinu fɛ.

¹⁵ Yuda mɔgɛ bɛɛ sewara bawo anu bara sarama-kan kɛ kiri anu yisi bɛɛ la. Anu sewara Mari bato tinɛ. Woletɔ Mari fanan ya anu tabira ka yisi-kimɛ di anu ma anuna nyamanɛ wo kan tinɛ bɛɛ rɔ.

¹⁶ Mansa Esa ya a mama Meyaka bɔ musu-mansayɛ la bawo a ya kɔlɔma lɛsɛ musila muninyɛ la min tɔgɛ Asura, ado wo mamilita. Mansa Esa ya bɛsɛ wo ratɛgɛtɛgɛ ka a mintan Kidirɔn yi-dɛ la.

¹⁷ Hali Mansa Esa ma ban Alla-batobɛlɛnuna kɔ tinɛnu tinyana kɔnɔ hali wo, a tora Mari sako kɛla ala wati bɛɛ rɔ.

¹⁸ A fa Abaya ara a bolo-fan minnu dantɛgɛ Alla ma nun wo, anubɛ ale Mansa Esa nyɛrɛ ya sɛnɛnu anubɛ wodi-gbɛ minnu dantɛgɛ Mari Alla ma wo, a ya wo bɛɛ bi ka wo ladon Mari Bato-Bɔn la.

¹⁹ Kɛlɛ-gbɛrɛkɛ ma don Yuda nyamanɛ rɔ ha ala mansayɛ san bi-sawa ani san loli nyɔgɛ ma.