2 Ko-Kɔrɔta-Karan 13 - ALLALA KUMƐ

Mansa Abaya anubɛ Mansa Yɛrabowami Kɛlɛ-Koe

¹ Yɛrabowamita mansayɛ san tan-ni-segin nyɔgɛ ma Isirɛla nyamanɛ rɔ, Rihobowamila den Abaya mara mansɛ la ka bɔ Yerusalɛm soe burɔ Yuda nyamanɛ rɔ.

² San sawa, a ye Yuda mɔgɛnu kun na. Yuriyɛlila dunmusi Meyakala dan le ale la min bɔra Kibiya soe burɔ. Kɛlɛ donta ale Mansa Abaya anubɛ Mansa Yɛrabowami tɛma.

³ Ale Mansa Abayata kɛlɛ-dannu yatɛ bɛnta mɔgɔ waga kɛmɛ nani (400,000) ma. Mansa Yɛrabowamita kɛlɛ-dannu yatɛ bɛnta mɔgɔ waga kɛmɛ segin (800,000) ma.

⁴ Kɛlɛ-den-kurun filɛ wonu bɛnta Ifɛrɛm kɔnkɔ-nyamanɛ rɔ. Mansa Abaya yɛlɛta Sɛmareyim kɔnkɛ kuma. A ya a kuli mayɛlɛ ka Yɛrabowami anubɛ Isirɛla kɛnu takele. A ko, “Wo ni wo tole masɔ n na!

⁵ Wole ma a lɔn ko Isirɛlata Mari Alla ara lanyiri kiri anubɛ Mansa Dawuda tɛma? Wo miriyanɛ ko wo ye tinyana le, wa? A ara a fɔ Mansa Dawuda ye nun ko a bɔnsɔn si to mansayɛ la Isirɛla nyamanɛ rɔ burubukai! Habadan-lanyiri le wo la min ti tinya mumɛ!

⁶ Wo ya a lɔn ko Nebatila den Mansa Yɛrabowami ara murutiya Mansa Silamɛni ma, ala mansɛ, kɔni.

⁷ Wo kɔma, a ya kalabantenu nadɛn minnu tara Rihobowami kan ma. Wo wati rɔ, fonike le ale Mansa Rihobowami la, ado a ti kalabante wonu nɔ kumɛ rɔ.

⁸ Nba, wo ye Mari le kɛlɛ tinɛ kaka gbɛ bawo wo ye Mansa Dawuda bɔnsɔnnu kɛlɛla. Ila kɛlɛ-dannu siya, ado wo nara bɛsɛ minnu na, wonu nadanta sɛnɛ dɔrɔn na, Mansa Yɛrabowami ya minnu nadan tura-danla muninyɛ la, kɔni.

⁹ Marita saraka-masɔlɛ minnu bɔra Aruna kebilɛ rɔ, a ya wonu gben. Wo kɔma, wo ya Lifayinu gben fanan ka mɔgɔ-gbɛrɛnu ma saraka-masɔlɛnu na iko nyamanɛ doinu bi a mala nya min. Ni a taranta, turɛ ye min bolo, ni wo ma, saga wɔrɔnfilɛ, wo si wo tigi ma saraka-masɔlɛ la wola bɛsi-fuyinu ye.

¹⁰ “Kɔnɔ hali wo, ma ye mata Mari Alla le batola tolon! Saraka-masɔlɛ minnu bɔra Aruna kebilɛ rɔ, wonu bi mata saraka-masɔ-wɔlɛnu kɛla, ado Lifayinu bi anu dɛnbɛna.

¹¹ Sɔgɔma-wo-sɔgɔma, wura-wo-wura, wonu bi isɛnti mintanna isɛnti mintan tinɛ kuma ka saraka-mintantɛnu mintan saraka-mintan-tinɛ kuma. Anu bi Marita biredi sala tebulu-sɛnimɛ kuma Mari ye. Wura-wo-wura, anu bi Marita sɛnɛ-lɛnpunu namalanna. Mari ara tɔn min sigi nun, ma ye wo birala kɔnɔ wole ara wo kan-kɔ sɔ wo la.

¹² Alla nyɛrɛ-nyɛrɛ le ma kun-tigi la min sɔnɛ ma yarɔ. Ata saraka-masɔlɛnu bi yan anubɛ anuna burinu. Wonu tabɛnnɛ ka kɛlɛ-kɛ-buri fɛ alako ma ni na wo kɛlɛ nya min. Wo le ya a to, wole Isirɛla mɔgɛnu, wo kana wo benbanuta Mari Alla kɛlɛ. Wo ti a nɔ.”

¹³ Mansa Abaya tora kumɛ kɛ le la. Mansa Yɛrabowami ya ala kɛlɛ-dan donu nata Yuda kɛlɛ-dannu kɔma kilɛ la alako donu ni to anu yarɔ, donu ni to anu kɔma.

¹⁴ Yuda kɛlɛ-dannu ya anu yɛ lasɛgi anu kɔma. Anu ya a yen ko anu bara a mini anu ma, anu dira Mari dala alako wo ni anu dɛnbɛ. Wo kɔma, saraka-masɔlɛnu ya kɛlɛ-kɛ-burinu fɛ.

¹⁵ Yuda kɛlɛ-dannu ya a lasɔnkɔ, Mansa Abaya sɔnɛ anu yarɔ. Anu buira Isirɛla kɛlɛ-dannu ma. Alla ya Mansa Yɛrabowami anubɛ Isirɛla kɛlɛ-dannu nɔ ka le.

¹⁶ Isirɛla kɛlɛ-dannu ya anu buri Yuda kɛlɛ-dannu kɔrɔ. Alla ya a ma, Yuda kɛlɛ-dannu ya Isirɛla kɛlɛ-dannu nɔ.

¹⁷ Yuda Mansa Abaya anubɛ ala kɛlɛ-dannu ya Isirɛla mɔgɛnu kasara ka mɔgɔ waga kɛmɛ loli (500,000) faga Isirɛla kɛlɛ-dan wonu tɔ.

¹⁸ Yuda kɛlɛ-dannu ya Isirɛla kɛlɛ-dannu nɔ bawo anu lanɛ anu benbanuta Mari Alla le la.

¹⁹ Mansa Abaya anubɛ ala kɛlɛ-dannu ya Isirɛla kɛlɛ-den-toenu sagaran. A ya anuna soe donu bi anu bolo. Soe wonu tɔgɛ le kɛnu na, Bɛtɛli wo, Yɛsena wo, Ɛfirɔn wo, anubɛ anuna so-mɛsɛ minnu bi anuna foolɛnu tɔ.

²⁰ Mansa Yɛrabowami ma ala sɛnbɛ sɔrɔn tun Mansa Abayata wati rɔ. Tɔ-a-la, Mari ya a ma, a fagara.

²¹ Kɔnɔ Mansa Abaya sɛnbɛ ma tora kofula. A ya musu mɔgɔ tan-ni-nani furu. A ya den-kei mɔgɔ mogan-ni-fila sɔrɔn anubɛ dunmusi mɔgɔ tan-ni-wɔrɔ.

²² Ale Mansa Abaya ya minnu ma wo, anubɛ a ya minnu fɔ wo, wonu sɛbɛnɛ Nɛbi Idota nɛbiya-buku rɔ.