2 Ko-Kɔrɔta-Karan 12 - ALLALA KUMƐ

Iyipiti Kɛnu Bui-Koe Yuda Nyamanɛ Ma

¹ Ale Mansa Rihobowami ban fanka sɔrɔnna mansayɛ rɔ tumɛ min, anubɛ ala nyamanita-mɔgɛnu ya anu ban Marita tɔnnu bira koe ma.

² Ala mansayɛ san nani a loli nyɔgɛ ma, Mari ya anu tɔrɔ ka a tɛgɛ anuna murutiyɛ ma anu ya min telen ale Mari la. Iyipiti Mansa Sisaki nara bui Yerusalɛm kɛnu ma san wo le la.

³ A nara kɛlɛ-den-siyaman na a bolo, mɔgɔ ma minnu dan lɔn. A nara kirindi waga kelen kɛmɛ fila (1,200) la a bolo anubɛ so-laburila mɔgɔ waga bi-wɔrɔ (60,000). Libiya kɛnu wo, Sudan kɛnu wo, anubɛ fani-bon-nasigilɛ minnu bɔra nyɔ wara la wo, kɛnu denu tara Iyipiti mansɛ dɛnbɛn tinɛ kɛlɛ kɛ rɔ.

⁴ Tarɛ mininɛ soe minnu ma Yuda nyamanɛ rɔ, anu ya nyɔnu bira-a-la. Anu tara ha ka gbɛrɛn Yerusalɛm soe ma.

⁵ Wo le ya a ma, Nɛbi Sɛmaya tara Mansa Rihobowami anubɛ Yuda bɔnsɔn-kun-tiginu bara Yerusalɛm soe burɔ. Kɛlɛ nanɛ, mɔgɔ-ba wonu ya anu buri tala nyɔ rɔ bawo anu kilannɛ Iyipiti mansɛ anubɛ ala kɛlɛ-dannu na. Nɛbi Sɛmaya ya a fɔ anu ye ko, “Marita kilayɛ le kɛ la. A ko bawo wo ara wo ban ale la, woletɔ a ara a ban wole la ka wo kunyɛ don Iyipiti Mansa Sisaki bolo.”

⁶ Ale mansɛ anubɛ ala mɔgɔ-banu ya anu sɔ anu hakɛ la. Anu ko, “Mari ye tonyɛ le kun na kɛ la.”

⁷ Kɛ yen Mari bolo, a ya a fɔ Nɛbi Sɛmaya ye worɔ ko, “Bawo anu bara anu sɔ anu hakɛ la, n ti anu halaki nya-kun-kelen. A ara to nun se, Iyipiti Mansa Sisaki wa na, a ni anu nato dogbe! Yerusalɛm kɛnu ti nna diminyɛ bɛɛ yen kɛ rɔ

⁸ kɔnɔ anu si to Sisaki kɔrɔ. Ka wɔli nde ye wo, ka wɔli mansɛnu ye duninya rɔ wo, anu si dan-nafarɛ yen wonu tɛma.”

⁹ Mansa Sisaki nara bui anu ma ka fen-kolomɛnu bi Bato-Bɔn anubɛ bolɔn la Yerusalɛm soe burɔ. A ya fan bɛɛ bi. Hali sɛnɛ sanɛ walan minnu ma, Mansa Silamɛni ya minnu nadan, a ma wonu to.

¹⁰ Ale Mansa Rihobowami ya walan donu nadan silɛɛ la ka miran wonu nyɔgɔ lasɛgi. A ya wonu don tenbi-bolon-da-makandannɛnu bolo.

¹¹ Ale mansɛ wa wuli tala Mari Bato-Bɔn la tuma-wo-tuma, a makandannɛ wonu si walan wonu bi ka bila a fɛ. Mansɛ wa sɛgi tumɛ min, anu si walan wonu bi ka ta anu namara kɛlɛ-kɛ-fen namara tinɛ.

¹² Bawo a ara ban a nyɛrɛ latenbila Mari ma, Marita diminyɛ wo ma a kasara. Wo kɔma, koe bɛɛ tara a kilɛ fɛ Yuda nyamanɛ rɔ.

Mansa Rihobowami Faga-Koe

¹³ Mansa Rihobowami ya mansayɛ kɛ ka bɔ Yerusalɛm soe burɔ, ado a ya ala mansayɛ lakanbali. A ya mansayɛ sɔrɔn a sɔrɔn-san bi-nani ani san kelen nyɔgɛ le ma. San tan-ni-wɔrɔnfila, a ye mansayɛ la. A ya mansayɛ kɛ ka bɔ Yerusalɛm soe burɔ Mari ya min yabɔ nun soenu tɛma Isirɛla nyamanɛ rɔ ala mɔgɛnu si ale Mari bato kan min. A na tɔgɛ le Neyama. Amon kɛ le wo la.

¹⁴ A ya ko-yogomɛ kɛ bawo a ma a sɛbɛ don Mari wara-koe rɔ.

¹⁵ Mansa Rihobowami ya koe min bɛɛsi ma ala mansayɛ kɔrɔ ka a fɔlɔ a lawulan anubɛ a laban ma anubɛ a kebilɛ wara-koe, wonu damasi sɛbɛnɛ buku kɛnu tɔ, Nɛbi Sɛmayata nɛbiya-buku rɔ anubɛ Nɛbi Idota nɛbiya-buku rɔ. Mansa Rihobowami anubɛ Yɛrabowami tora kɛlɛ le la tolon!

¹⁶ Mansa Rihobowami fagara tumɛ min, anu ya a togon a benba Mansa Dawuda halala-luyi ma. Ala den Abaya sigira a gbɛ rɔ.