2 Ko-Kɔrɔta-Karan 1 - ALLALA KUMƐ

Mansa Silamɛnita Alla Matara-Koe Hɛnkilila Ko La

¹ Mansa Dawudala den Mansa Silamɛni kunta ala nyamanita-mɔgɛnu ma, ado ata Mari Allata duwɛ tora a fɛ ka ata sɛnbɛ makofu.

^2-3 Kɛlɛ-den-kunyɛ minnu bi waga kelen-kelannu kun na wo, anubɛ minnu bi kɛmɛ kelen-kelannu kun na wo, ala nyamanita-mɔgɔ-banu wo, anubɛ kebila-kunyɛnu wo, anubɛ a mɔgɛ toenu wo, Mansa Silamɛni ya anu kele ka anu damasi kundɛn Kibiyon soe burɔ Mari bato tinɛ. Allata wɔli-kɛlɛ Nɛbi Musa ya Marita Fani-Bɔn min nadan wulɛ rɔ nun, wo ye ale Kibiyon soe burɔ nyɔ.

⁴ (Kɔnɔ tɔn-kenkirɛ nyɛrɛ ye Yerusalɛm soe le burɔ. Mansa Dawuda nara tɔn-kenkirɛ la tumɛ min ka bɔ Kiriyati Yirɔm soe burɔ, a ya fani-bɔn do ladan ala ko la nyɔ rɔ.)

⁵ Yurila den Bɛsalɛli ya saraka-mintan-tinɛ min nadan silɛɛ la nun, wo ye Marita Fani-Bɔn yarɔ Kibiyon. Yuri wo fa tɔgɛ le Huri. Mansa Silamɛni anubɛ ata mɔgɛnu ya Mari bato nyɔ.

⁶ Anu ya kolo-fan waga kelen (1,000) mintan Bato-Bɔn yarɔ saraka-mintan-tinɛ ka Mari bato.

⁷ Wulɔn suyi nyɛrɛ rɔ, Alla ya a nyɛrɛ yira Mansa Silamɛni na ka a manyinika ko, “A sɔgɛ ye i la, n ni nfen di i ma?”

⁸ Mansa Silamɛni ya a fɔ a ye ko, “I tora ila keninteya-wɛ yirala n fa Dawuda la, ado kaka, i wara a ma, nde ara sigi a gbɛ rɔ.

⁹ E, Mari Alla, i ya lanyiri min kiri n fa ye nun, alamɛ wo kanbalita. I wara n ma mansɛ la mɔgɛ minnu kuma, wonu siya ha n ma anu dan-natɛgɛ lɔn.

¹⁰ Woletɔ i ni hɛnkilimayɛ anubɛ ko-kɔrɔ-lɔn di n ma alako n ni nna mɔgɛnu bira boloko-nyimɛ-kɛ. Ni wo ma, nde si ke kunna mɔgɔ-siyamɛ kɛnu ma kama?”

¹¹ Alla ya a fɔ ale Mansa Silamɛni ye ko, “I wara ko-kɛndɛ le yabɔ wo la. I ma nɔnfuli manyinika n bolo anubɛ fen-kolomɛnu. Wo kɔma, i ma n manyinika gbiliyɛ anubɛ i yogenu halaki-koela ko la. Hali, simayɛ, i ma n manyinika wola ko ma. I wara hɛnkilimayɛ anubɛ ko-kɔrɔ-lɔn manyinika alako i ni nna mɔgɛnu bira boloko-nyimɛ-kɛ. I ma kɛ fenfen manyinika min kɛ,

¹² n si a ma, i ni wonu sɔrɔn. Min sanɛ wo kuma, i si ma nɔnfulu-tigi la ka fen-kolomɛnu nadɛn bui! Ka tenbi wo la, i mankan si ta pon ka tenbi mansɛ bɛɛ la duninya rɔ. I nyɔgɔn mansa ma bɔ wɛ, ado i nyɔgɔn mansa ti taran tun.”

Mansa Silamɛnina Tɔgɔlamayɛ anubɛ Nɔnfulu-Tigiyɛ Wara-Koe

¹³ Nba, Mansa Silamɛni ban Alla-batoe la Kibiyon soe burɔ, a sɛgira a kɔma Yerusalɛm soe burɔ a ye mansayɛ la Isirɛla mɔgɛnu kun na kan min.

¹⁴ A ya kirindi waga kelen ani kɛmɛ nani (1,400) kundɛn anubɛ so waga tan-ni-fila (12,000) nyini fanan ala kɛlɛ-dannu ye. A ya donu namara Yerusalɛm soe burɔ. Wo kɔma, a ya donu nata soe doinu tɔ.

¹⁵ Sɛnɛ anubɛ wodi-gbɛ raboroko-barakanɛ ata wati rɔ. Fɛrɛn-da-gbɛlɛ, wonu bi nyɔ duk! Kurukurun ti a ban, tarali ti a ban.

¹⁶ Mansa Silamɛnina yilanu ya soeenu san a ye Iyipiti anubɛ Kuwɛ nyamanɛ rɔ iko a sɔnkɛ ye nya min.

¹⁷ Anu ya soee san wodi-gbɛ la minna gbiliyɛ anubɛ fui-fan pani-kunbɛ-nya sawɛ rakɛn. Anu ya kirindinu san a ye nyɔ rɔ fanan wodi-gbɛ la minna gbiliyɛ anubɛ fui-fan pani-kunbɛ-nya tan-ni-filɛ rakɛn. Wo kɔma, ala yilanu ya wonu mayira Hɛtinu anubɛ Siriyanuna mansɛnu ma.