1 Timoti 5 - ALLALA KUMƐ

Dɛnkɛninya-Mɔgɛnu Fɛ-Bira-Nya

¹ I kana kɛmɔgɛnu makuma fɔ ka anu manugu-nɛgɛ iko i fanu. I ni i ta-nyɔgɛ fonike-keimɛnu bira iko i na-kelen-nyɔgɛnu.

² Musu-kɔrɛnu bira iko i nanu. Fonike-musumɛnu bira iko i tirisan-musinu sɛninyɛ bɛɛ rɔ.

³ Mɔgɔ-wo-mɔgɔ sa kɛɛ-musi minnu bolo, i ni wonu makoe nyinya.

⁴ Kɔnɔ ni dan anubɛ mamanɛ ye min bolo, i ni wonu karan ko anu denu ni anu sɔrɔnnɛnu anubɛ anu benbanu makoe nyinya. Wo le ye Alla hɛnɛna bawo wonu denu ya anu makolo.

⁵ Kɛɛ-musi min kun makolɔn, wo si a yigi sa Alla kuma fasai! A si to Alla matarala ata dɛnbɛnɛla ko la su-ni-tele.

⁶ Kɔnɔ kɛɛ-musi min bi tola a nyɛrɛ diyana-koenu kɛla, hali a ye a kɛndɛ la, a faganɛ le. A tɔnɔ sa a la.

⁷ I ni anu makawandi koe kɛnu tɔ alako mɔgɔ-wo-mɔgɔ kana fɛɛ yen anu na.

⁸ Ni mɔgɛ do ma a warɛ-mɔgɛnu makoe nyinya katarala a nyɛrɛta denbayɛ ma, wo ara a kan-kɔ sɔ dɛnkɛninyɛ la. Mɔgɔ-sufa wonu yogo dɛnkɛninyabɛlɛnu ko.

⁹ Kɛɛ-musi min sɔrɔn ma tenbi wɛ san bi-wɔrɔ la, i kana wo tɔgɛ sɛbɛ kɛɛ-musi-doinu tɔgɛ sɛbɛnɛ kan min, ado a nyɛrɛ latɛgɛnɛ ala kei kelen pe le ma.

¹⁰ Ni mɔgɛnu bi musi wo matɔgɔla ala kɛwɔli-nyimɛnuna ko la, anu ni a tɔgɛ sɛbɛ. A ni ma musi la min bara ala dannu makolo a kin na ka sundannu yiya a warɛ. A ni famayigiya-wɔlɛ kɛ a ta-nyɔgɛ dɛnkɛninya-mɔgɛnu ye ka mɔgɔ-tɔrɔnɛnu fanan dɛnbɛ. A ni a nyɛrɛ di kɛwɔli-nyimɛ-sufa-bɛɛ ma.

¹¹ Kɔnɔ i kana kɛɛ-musu-fonikenu tɔgɔ sɛbɛ bawo furu-ko-nata wa anu bira tumɛ min, anu si anuna sarama-kan tinya Kirasiti wara la worɔ.

¹² Anu si yiliki sarama-kan fɔlɔtɛ wo tinyɛ fɛ anu bolo.

¹³ Wo kɔma, anu si anuna wati tinya tagamana mɔgɛnuna bɔnnu na. Kɔnɔ min yogo wo ko, anu si to nafigiyɛ anubɛ kolandiyɛ kɛla. Anu si kumɛ donu fɔ, a ma bɛn, anu ni minnu fɔ.

¹⁴ Woletɔ min fisa, kɛɛ-musu-fonikenu ni sigi furi rɔ ka to dannu sɔrɔnna. Anu ni anuna bɔnnu fɛ-bira alako ma kana fɛrɛ di ma yogenu ma ka kuma-yogomɛ fɔ ma ma,

¹⁵ ado kɛɛ-musi donu bara ban yɛlɛmana ka bila Setanɛ fɛ.

¹⁶ Kɔnɔ ni kɛɛ-musinu bi dɛnkɛninya-musi do bolo ala denbayɛ tɛma, ale le ni wonu makoe nyinya. A kana dunɛ wo sa chɔchi kuma. Fɔ kɛɛ-musi minnu bi anu nyɛrɛ ma, chɔchi si wonu makoe nyinya.

¹⁷ Chɔchi-mɔgɔ-ba minnu bi kun-tigiya-wɔlɛ kɛla a kilɛ fɛ, a bɛnnɛ, wonu ni gbiliyɛ anubɛ sara-kɛndɛ sɔrɔn, katarala minnu bi wɔlila bɛrɛkɛ kawandili bɔ tinɛ anubɛ mɔgɔ karan-tinɛ,

¹⁸ ado a sɛbɛnɛ Allala kitabu rɔ ko, “Sara-ninki tenbi fui-fan tɛnna tumɛ min, i kana a dɛ makiri.” A sɛbɛnɛ fanan ko, “Wɔli-kɛlɛ ni a sarɛ sɔrɔn.”

¹⁹ I kana i tole sigi chɔchi-mɔgɔ-banu maburi-kan la fɔ sereya fila, ni wo ma, sawa bɔra a ma.

²⁰ Minnu ti sɔn hakɛ bolokala wo tɛma, wonu makuma gbɛ rɔ, alako mɔgɔ-toenu si kilan nya min.

²¹ N bi kɛ fɔla i ye Alla anubɛ Yisa Kirasiti anubɛ melika-sɛnimɛnu yala ko i ni kawandili kɛnu bira. I kana mɔgɛ do latenbi mɔgɛ do la. I ni ko-latelennɛ kɛ mɔgɛnu tɛma koe bɛɛ rɔ.

Ko-Gbɛrɛnu Bara-Koe

²² I kana gbaran i nyɛrɛ la ka i bole sa mɔgɔ kuma tiriya Marita wɔlɛla ko la. Ni i ya wo ma, wo wa bui, wo filɛ ara don hakɛ rɔ. I ni i nyɛrɛ mara sɛninyɛ rɔ wati bɛɛ.

²³ N bara a lamɔɛn min kɛ ko i buyi ye i dimila, ado kirayɛ sa i bolokala. I kana dan yi dɔrɔn ma fɔ ka to nɔnbɔ-gbɔ-yi doni minna.

²⁴ Mɔgɛ donu hakɛ yen-koe ma gbɛlɛ, bɛɛ si a yen gbɛ rɔ, ado anu nyɛrɛ ya a lɔn ko Alla, ni wo ma, mɔgɔni-gbuyi si anu kiti. Kɔnɔ donu hakɛ yen-koe gbɛlɛ, mɔgɛnu ti anu yen fɔ wati-laban.

²⁵ Kɛwɔli-nyimɛ fanan bi wo nya na le feu! Kɛwɔlɛ donu ti ke dogonna. Hali minnu dogonnɛ, wonu si bɔ gbɛ rɔ wati-laban.