1 Timoti 4 - ALLALA KUMƐ

Foninya-Karan-Mɔgɛnu Bara-Koe

¹ Allata Ni-Sɛnimɛ ya a gbɛ ko wati-laban kɛ kɔrɔ, mɔgɛ donu si dɛnkɛninyɛ boloka. Anu si foninya-karan bira min bi bɔla nyinɛnuna karan rɔ.

² Yanfantenu si foninya-karan wo nyɛnsɛn. Anu sɔndɔmɛ faganɛ iko fɛrɛ min bara mintan kɔrɔma la nɛgɛ-kalamɛ bolo. Woletɔ anu ti ko-nyimɛ anubɛ ko-yogomɛ dan-nafarɛ lɔn.

³ Wo mɔgɔ-sufanu bi mɔgɛnu karanna ko furu-kiri-koe anubɛ dɔn-fan-donu dɔn-koe, ko-yogomɛ le wonu na. Kɔnɔ ni i wara ban baraka birala Alla ye wonuna ko la, Alla ko wonu ma yogo. A ya wonu nadan dɛnkɛninya-mɔgɛnu ye minnu bara ban tonyɛ lɔnna.

⁴ Alla ya fan min bɛɛ dan, wo bɛɛ kin. A ma bɛn, mɔgɛ ni a ban wo fenfen na. Alako a ni Alla ko-nyima lɔn dɔrɔn,

⁵ ado iko Allala kumɛ ya a fɔ nya min, dɔn-fan wo ara sɛninya Alla-matarɛ fɛ.

Yisa Kirasitita Wɔli-Kɛla-Nyimɛ Wara-Koe

⁶ Ni i ya i na-kelen-nyɔgɛnu makawandi koe kɛnu na, i si ma Yisa Kirasitita wɔli-kɛla-nyimɛ la. I si a lagbɛ ko i makolota dɛnkɛninya-kumɛ anubɛ tonya-karan wonu na i wara minnu bira.

⁷ I ni fara Alla-lɔnbɛlɛnuna foninya-poroto-parata-fɔɛ la. Wonu namɔɛn ti ko-wo-ko nyinya. I ni i nyɛrɛ kolo ka to Alla fɛ.

^8-9 Tonyɛ le kɛ la, ado i ni la a la ka a bira gben, ko ka i fɛrɛ ramaga, wo si koe do nyinya. Kɔnɔ ka i ramaga Allata wɔli-kɛ-tinɛ, wo si ko nyinya nya bɛɛ ma. A si i dɛnbɛ duninya kɛ rɔ anubɛ lakira fanan.

¹⁰ Wo le ya a to, ma ye ma rayala ka Allata wɔlɛ kɛ kati, bawo ma ara ma yigi sa Alla-nimɛ kuma, mɔgɛ bɛɛ kisilɛ, kɔni, katarala male dɛnkɛninya-mɔgɛnu ma.

¹¹ I ni to mɔgɛnu karanna koe kɛnu na. A fɔ anu ye ko fɔ anu ni wonu ma.

¹² I kana sɔn, mɔgɔ-wo-mɔgɔ ni yoo i ma ila fonikeyɛla ko la. I kuma-nya wo, i kɛ-nya wo, ila keninteyɛ wo, ila dɛnkɛninyɛ wo, ila sɛninyɛ wo, i ni ma misala-nyimɛ la dɛnkɛninya-mɔgɛnu ye wo bɛɛ rɔ.

¹³ I ni to Allala kitabu karanna mɔgɛ bɛɛ yala. I ni to mɔgɛnu makawandila ka to anu karanna fanan. I raya wonu ma-tinɛ ha n ni na tumɛ min.

¹⁴ I kana i ban Allata Ni-Sɛnimɛta fandɛ la min bi wɔlila i rɔ. Wo dira i ma wo tumɛ chɔchi-mɔgɔ-banu ya anu bole sa i kuma wɔlɔyiya-kumɛ fɔ tinɛ.

¹⁵ I ni koe kɛ bɛɛ kɛ ka i nyɛrɛ di anu ma fasai alako bɛɛ ni i kolo-nya yen dɛnkɛninyɛ rɔ.

¹⁶ I hɛnkili to i nyɛrɛ anubɛ ila karan ko. I ni to koe kɛnu kɛla bawo Alla si wobɛ i kan-namɔɛnnɛnu kisi ka a tɛgɛ ila wɔli-nyimɛ ma.