1 Timoti 2 - ALLALA KUMƐ

Batoli-Koe Chɔchi La

^1-2 A fɔlɔtɛ, n bi wo madiyala alako wo ni Alla madiya mɔgɛ bɛɛ ye katarala mansɛnu anubɛ kun-tiginu ma. Wo ni to tarali kɛla ko Alla ni anu dɛnbɛ alako ma ni to sabarɛ anubɛ yisi-kimɛ rɔ anu bolo. Ma ni to Alla gbiliyala ka ma hadama-den-nyɔgɛnu bira a kilɛ fɛ.

³ Madiyali-su kɛ bɛɛ kin. A ye Alla hɛnɛna, ma kisilɛ, kɔni,

⁴ min bi a fɛ, mɔgɛ bɛɛ ni kisi ka tonyɛ lɔn.

⁵ Alla kelen de nyɔ, ado mɔgɔ kelen de nyɔ fanan min bi Alla anubɛ mɔgɛnu tɛmɛ rabɛnna. Wo mɔgɛ le Yisa Kirasiti la.

⁶ Ale le ya a nyɛrɛ niyi ni ko mɔgɛ bɛɛ ni hɔrɔya. Ata sayɛ le ya a mayira a wati-latɛgɛnɛ rɔ ko Alla ye a fɛ, bɛɛ ni kisi.

⁷ Wo le ya a to, Alla ya n ma kilayɛ anubɛ karan-mɔgɔ la. A ko n ni sibolo-gbɛrɛnu karan dɛnkɛninyɛ anubɛ tonya-koe ma. N sa foninya fɔla wo ye. N bi tonyɛ le fɔla serr!

⁸ Wo wa wo ladɛn Alla bato tinɛ tuma-wo-tuma, n bi a fɛ, wole keinu ni madiyali kɛ ka wo bole rasigi Alla ye. Wo ni ma mɔgɔ-sɛninyanɛnu na Alla ye, ado wo tenbi madiyali kɛla, diminyɛ anubɛ sɔsɔli kana taran wo tɛma.

⁹ N bi a fɛ fanan, musinu ni ma hɛnkilimɛnu na. Anu kana anu makiri-nya latenbi a dan kun na! Kun-sigi-dannɛ wo, sɛnɛ wo, wodi-gbɛ wo, kuru-da-gbɛlɛ wo, anu kana kinya wonu dɔrɔn fɛ

¹⁰ fɔ anu kɛ-nya-nyimɛnu fɛ iko a bɛnnɛ dɛnkɛninya-musinu ma nya min.

¹¹ Musinu ni karan sabari anubɛ famayigi bɛɛ la.

¹² N ti sɔn musinu ni keinu karan, ni wo ma, ka sɛnbɛ sɔrɔn keinu kuma. Anu ni anu masabari Alla bato tinɛ.

¹³ Ni i ya a yen n ya a fɔ wo nya na bawo Alla ya Hadama fɔlɔn dan, wo kɔma, Hawa.

¹⁴ Duguma-fan ma Hadama yanfa fɔ ala musi. Setanɛ ya ma mama Hawa le fɔlɔn bolo labira ka hakɛ kɛ Alla la.

¹⁵ Kɔnɔ tɔ-a-la, musinu si kisi den-sɔrɔn fɛ ni anu tora dɛnkɛninyɛ anubɛ keninteyɛ anubɛ sɛninyɛ rɔ ka anu sɛbɛ don.