1 Tɛsalonaika 5 - ALLALA KUMƐ

Rabɛn-Koe Mari Na-Koela Ko La

¹ Nba, ma na-kelen-nyɔgɛnu, koe kɛnu si kɛ tumɛ min, hali n ma kɛdi sɛbɛ wo ma

² bawo wo nyɛrɛ ya a lɔn ko Mari na-tumɛ si na iko surɔ-kankan.

³ Mɔgɛnu tenbi a fɔla ko anu bi yisi-kimɛ anubɛ lafɛrɛ rɔ, nba, anu si tɛrɛna halakiyi la wo wati le tɔ, yɔ! A si ma iko musu-kolomɛ buyi wa a lamaga. Anu ti kisi Mari na-tumɛ rɔ.

⁴ Kɔnɔ ma na-kelen-nyɔgɛnu, wo sa pinpi rɔ min kɛ, wo tumɛ ti wole latɛrɛna iko kankan.

⁵ Waan anubɛ teleta mɔgɛ le wo dama la min kɛ, wo kɛ-nyanu ni bɛn anu ma. Suyi anubɛ pinpita mɔgɔ ma male la.

⁶ Nba, ma kana kinɔgɔ iko doinu. Ma kundennɛ ni to ka ma yɛ lakalan anubɛ ka ma hɛnkili masɔ.

⁷ Kinɔgɔlɛnu si kinɔgɔ suyi le tɔ. Gbɛɛtoenu fanan si gbɛɛ min suyi le tɔ.

⁸ Kɔnɔ teleta-mɔgɛ le male la, woletɔ fɔ ma ni ma hɛnkili masɔ. Ma ni dɛnkɛninyɛ anubɛ keninteyɛ don iko kɔgɔ-matanka-fan. Alla ara lɔnnɛ min di ma ma ko ma ara kisi, wo ni ma mala kɛlɛ-kɛ-fulɛ la.

⁹ Alla ma a latɛgɛ ko ma ni ala diminyɛ sɔrɔn kiti-tɛgɛ-lunyɛ. A ye a fɛ, ma ni kisi-koe sɔrɔn ma Mari Yisa, Allata-Mɔgɔ-Yabɔnɛ baraka rɔ.

¹⁰ Yisa fagara ma ye alako ni ala nɛ ya ma kɛndɛ taran, ni wo ma, ma faganɛ, wo bɛɛ rɔ, ma si nimayɛ sɔrɔn a bolo.

¹¹ Woletɔ wo ni wo nyɔgɔn sɛnbɛ don ka wo nyɔgɔn madɛnbɛ iko wo ye a kɛla nya min kaka.

Makawandili anubɛ Kɔndɔli Labannu Bara-Koe

¹² Nba, ma na-kelen-nyɔgɛnu, ma ye wo madiyala ko-kelen-pela ko la. Mari ara wɔli-kɛlɛ minnu sɔ wo yarɔ, wo karan-mɔgɛnu anubɛ wo makawandilɛnu, kɔni, wo ni wonu gbiliya nya bɛɛ ma.

¹³ Wo ni anu bira gbiliyɛ anubɛ keninteyɛ rɔ ka a tɛgɛ anu bi wɔlɛ min kɛla wola ko la. Wo ni to yisi-kimɛ rɔ dɛɛ!

¹⁴ Ma na-kelen-nyɔgɛnu, wo ni kalabantenu makawandi. Wo ni yisi-latɛgɛ di kilandɔgɛnu ma. Minnu yisi rafaganɛ, wo ni to wonu dɛnbɛna ka wo munyu wo nyɔgɔn kɔrɔ.

¹⁵ Wo kana sɔn, mɔgɔ-wo-mɔgɔ ni ko-yoge sara ko-yoge la. Tuma-wo-tuma, wo ni to ko-nyimɛ kɛla wo nyɔgɔn ye anubɛ mɔgɛ bɛɛ.

¹⁶ Wo yisi ni to sewɛ rɔ tumɛ bɛɛ.

¹⁷ Wo kana kuri Alla matara tinɛ.

¹⁸ Ni ko-wo-ko mara, wo ni baraka bira Alla ye wati bɛɛ, ado Alla ye nyinina wo le ma. Wo ni to wo mala Kirasiti Yisa rɔ.

¹⁹ Wo kana Allata Ni-Sɛnimɛta wɔlɛ mabeli.

²⁰ Wo kana wɔlɔyiya-kumɛnu nafɛya.

²¹ Wo ni koe bɛɛ fɛsɛfɛsɛ. Min kin, wo ni wo mara gben!

²² Min yogo, wo ni wo tanka ko-su wo bɛɛ ma.

²³ Alla min bi yisi-kimɛ dila wo ma, alamɛ wo ya wo dɛnbɛ ka wo nyɛrɛ mara feu! Wo niyi wo, wo sɔndɔmɛ wo, wo fɛrɛ-bɔnkɛ wo, alamɛ wo ya wo bɛɛ mara a kin na! Ma Mari Yisa, Allata-Mɔgɔ-Yabɔnɛ wa na tumɛ min, a ni wo taran, fɛɛ-wo-fɛɛ sa wo la.

²⁴ Ale Yisa min bara wo yabɔ, kan-kelen-tigi le ale la min kɛ, wo si la a la ko a ni koe wo bɛɛ ma wo ye.

²⁵ Ma na-kelen-nyɔgɛnu, wo ni Alla matara male fanan ye.

²⁶ Wo ni ma na-kelen-nyɔgɛ bɛɛ kɔndɔn keninteyɛ la.

²⁷ N bi wo madiyala ma Mari tɔgɔ rɔ ko wo ni kɛdi kɛ karan dɛnkɛninya-mɔgɛ bɛɛ ye.

²⁸ Ma Mari Yisa, Allata-Mɔgɔ-Yabɔnɛta hinɛ ni to wo fɛ.