1 Tɛsalonaika 4 - ALLALA KUMƐ

Alla Hɛnɛ Nya Wara-Koe

¹ A laban, ma na-kelen-nyɔgɛnu, wola ko-ladan-nyanu si Alla hɛnɛ nya min, wo ara wo karan ma bolo, ado wo taranta wola koenu nadanna wo nya na le nun, yɔ! Nba kaka, ma ye wo madiyala ka wo makawandi Mari Yisa tɔgɔ rɔ ko wo ni to a kuma-sala tolon!

² Mari Yisa ya ma sɔ kumɛ min fɔ-koe la wo ye, wo ya wo lɔn,

³ ado Alla ye a fɛ, wo ni sɛninya nya min, wo le kɛ la. Wo ni wo matanka yɛlɛnya-koenu na feu!

⁴ Kei kelen-kelennamɛ-bɛɛ ni a lɔn a si a nyɛrɛ fɛrɛ-bɔnkɛ mara sɛninyɛ rɔ nya min.

⁵ A kana a fɛrɛ-bɔnkɛ don nata-yogomɛ rɔ iko sibolo-gbɛrɛ minnu ma Alla lɔn.

⁶ Nba, koe kɛnu tɔ, mɔgɔ-wo-mɔgɔ kana ko-yogomɛ ma a na-kelen-nyɔgɛ la, ni wo ma, ka baga a ma. Ma ara a fɔ wo ye nun ka a lagbɛlɛya wo kuma gben! Minnu bi ko-yogoma-su wonu kɛla, Mari si wonu tɔrɔ.

⁷ Alla ma ma kele sɛninyabɛliyɛ ma fɔ sɛninyɛ.

⁸ Woletɔ mɔgɔ-wo-mɔgɔ wa a ban karan kɛ ma, wo ma a ban mɔgɔ bolo de fɔ Alla min bi ata Ni-Sɛnimɛ dila wo ma.

⁹ Wo ni wo nyɔgɔn keni nya min, wo nyɛrɛ ara wo karan Alla bolo. Hali ma ma kɛdi sɛbɛ ka wo ta-nyɔgɛ dɛnkɛninya-mɔgɛnu keni-koe fɔ wo ye.

¹⁰ Ado nfan, wo ye wo kɛla wo na-kelen-nyɔgɛ bɛɛ ye Masidoniya nyamanɛ kan bɛɛ rɔ, yɔ! Woletɔ ma na-kelen-nyɔgɛnu, ma ye wo madiyala ko wo ni diyanayɛ kuma-sa dɛɛ!

¹¹ Wo ni wo raya alako yisi-kimɛ ni to wo tɛma. Wo ni wo nyɛrɛta wɔlɛ kɛ ka wo nyɛrɛ beli-fan sɔrɔn iko ma ya a fɔ wo ye nya min nun.

¹² Wo le ya a to, wo si gbiliyɛ sɔrɔn hali dɛnkɛninyabɛlɛnu bolo. Wo ti wola dunɛ sa mɔgɔ-wo-mɔgɔ kuma worɔ.

Mari Sɛgi-Koe

¹³ Ma na-kelen-nyɔgɛnu, minnu bara ta lakira nun, ma ye a fɛ, wo ni a lɔn anu bara-koe ye nya min. Wo le si a ma, wo ma ti kinikini iko minnu yigi sa habadan-nimayɛla ko la.

¹⁴ Ma lanɛ a la ko Yisa fagara, wo kɔma, a wulita tun. Woletɔ Alla wa Yisa lana tun, ma lanɛ a la ko minnu dɛnkɛninyara Yisa ma anu bi anu kɛndɛ la tumɛ min, Alla si wonubɛ Yisa lana ka bɔ san-kole rɔ anu nyɔgɔn fɛ.

¹⁵ Ma ye Marita karan le fɔla wo ye kɛ la. Ale Mari wa na tumɛ min, minnu bara faga nun, male min bi ma kɛndɛ la ti ta wonu yarɔ.

¹⁶ Wo wa gbele-gbelen-kan lamɔɛn anubɛ melika-kun-tigi-kan anubɛ Allata buru-fɛ-kan, Mari nyɛrɛ si yigi ka bɔ Arinyɛni tɔ wo tumɛ le tɔ! Minnu dɛnkɛninyara Kirasiti ma ka faga dɛnkɛninyɛ rɔ, wonu fɔlɔn si wuli ka anu niyi lafɛ.

¹⁷ Nba, male min kɛndɛ wo wati, ma dama la si dɛn wonu fɛ san-kole rɔ tiriya ka Mari labɛn fɔnyɔ rɔ. Wo kɔma, ma si to Mari fɛ habadan!

¹⁸ Woletɔ wo ni wo nyɔgɔn yisi-kimɛ kumɛ kɛnu na.