1 Tɛsalonaika 1 - ALLALA KUMƐ

¹ Nde, Pɔli wo, Sailasi wo, anubɛ Timoti, male le ye kɛdi kɛ sɛbɛla wo ma. Ma ye kɛdi kɛ sɛbɛla dɛnkɛninya-mɔgɛnu ma minnu bi Tɛsalonaika soe burɔ. Ma Fa Alla anubɛ ma tigi Yisa Kirasitita mɔgɛ le wole la. Alamɛ Allata hinɛ anubɛ yisi-kimɛ tora wo fɛ.

Tɛsalonaika Kɛnu Tagama-Nya anubɛ Anuta Dɛnkɛninyɛ Wara-Koe

² Ma tenbi madiyali kɛla, ma ye Alla tantola wo ye ka wo damasila koe fɔ a ye tumɛ bɛɛ.

³ Ma wa madiyali kɛ ma Fa Alla ye tuma-wo-tuma, ma si to wola kɛwɔlɛnu takaranna a ye, wo ara minnu kɛ ka a tɛgɛ wola dɛnkɛninyɛ ma. Wo ya wɔli-gbɛlɛmɛ min kɛ ka a tɛgɛ wola keninteyɛ ma Yisa wara la, ma yili tonɛ wo ko. Wo yigi tonɛ Mari Yisa, Allata-Mɔgɔ-Yabɔnɛ rɔ nya min, ma yili tonɛ wo bɛɛ ko wo nya na le!

⁴ Ma na-kelen-nyɔgɛnu, ma ya a lɔn ko Alla ara wo keni, ado a ara wo yabɔ ka wo ma atɛ la.

⁵ Ma nara kibara-nyimɛ la wo ye tumɛ min, ma ma na kuma-gbansan na. Ma nara wo la sɛnbɛ la Allata Ni-Sɛnimɛ baraka rɔ. Ma ara a yira wo la ka a gbɛ ko tonyɛ le wo la. Ma siginɛ wo tɛma nya min, wo ya wo lɔn, ado ma ya wo ma wo dɛnbɛn-koe le la.

⁶ Wo ya malebɛ Mari ma wola misalɛnu na. Wo tɔrɔta kosɛbɛ kɔnɔ hali wo, wo ya karan wo bira sewɛ la, ado sewa-sufa wo ye bɔla ata Ni-Sɛnimɛ le bolo.

⁷ Wo le ya a ma, wo mara misalɛ la dɛnkɛninya-mɔgɛ bɛɛ ye Masidoniya anubɛ Akeya sigisɔnnu tɔ,

⁸ ado Marita kumɛ ma dan wo bolo Masidoniya anubɛ Akeya sigisɔn dɔrɔn tɔ. Wo dɛnkɛninyanɛ Alla ma nya min, bɛɛ ya wo lɔn. Hali ma ma wo fɔ tun.

⁹ Wo ya ma rabira nya min, mɔgɛ bɛɛ ye wo fɔla. Wo ya bɛsɛnu boloka nya min fanan ka wo ya-lamunun Alla nimɛ la, Alla-bɛrɛ, kɔni, bɛɛ ye wo rakaranna.

¹⁰ Wo ye Allala den Yisa makɔnɔna ko a ni bɔ Arinyɛni tɔ. Alla le ya Yisa kelan wo lawuli ka bɔ furinu tɛma. Allatalata fondo-bɔɛ min bi nala, ale Yisa le ye ma kisila wo ma.