1 Samuwɛli 8 - ALLALA KUMƐ

Mansa Nyini-Koe Isirɛla Mɔgɛnu Bolo

¹ Samuwɛli kɔrɔyanɛ, a ya ala dannu ma kiti-salɛnu na Isirɛla nyamanɛ rɔ.

² Ala den fɔlɔtɛ tɔgɛ le Yowɛli. Wo tagbara-sɛ tɔgɛ le Abaya. Wonu denu mara kiti-tɛgɛlɛnu na Biri-Siba.

³ Kɔnɔ anu ma anu fa gbɛ bi. Anu sa ko-wo-ko kɛla fɔ ka wodi nyini anu nyɛrɛ ye. Anu kɛnɛna dogonta-fan birala, ado anu sa kiti tɛgɛla a kilɛ fɛ.

⁴ Woletɔ Isirɛla mɔgɔ-ba bɛɛsi ya anu kundɛn kan-tina-kelen. Anu tara Samuwɛli wara Rema.

⁵ Anu ya a fɔ a ye ko, “N fa, ile ara wuli kɔrɔyala, ado ila dannu sa sɔnna i kɛ-nya bila. A sɔgɛ ye ma la, i ni i bole sɔ mɔgɛ do la min si ma mala mansɛ la alako male fanan ni mansɛ sɔrɔn iko sibolo-gbɛrɛ minnu bi mala foolɛ rɔ.”

⁶ Samuwɛli ma sewa anuna mansaya-koe wo la woletɔ a ya Mari madiya.

⁷ Mari ya a fɔ ale Samuwɛli ye ko, “Mɔgɛnu bara min fɔ i ye, i ni i tole masɔ wo la. Anu sa anu banna ilela kun-tigiyɛ ma. Anu bi anu banna nde letɛ ma.

⁸ Kebi n bi bɔla anu na Iyipiti, anu ya anu kan-kɔ sɔ n na ka bɛsɛnu kɔ. Anu tora a mala n na nya min, a sɔgɛ ye anu na, anu ni wo le sufa ma ile fanan na.

⁹ Woletɔ ile ni i yɛ bɛn anu ma kɔnɔ i ni anu kawandi i sɛbɛ la. I ni a rakaran anu ye a kila-bɛrɛbɛrɛ-wɛ fɛ ni anu ya mansɛ sɔrɔn, wo ye a mala anu na nya min.”

¹⁰ Samuwɛli ya Marita yabilɛ takaran mɔgɔ-banu ye ka a tɛgɛ mansaya-koe wo ma.

¹¹ A ya a fɔ anu ye ko, “Wo ye mansɛ min sɔrɔnna, a ye wo birala ka le. A si wola den-keinu bi ka anu ma kɛlɛ-dannu na. Donu si kɛlɛ kɛ kirindi la. A si a ma, donu fanan si kɛlɛ kɛ soee la. Donu fanan si anu buri ala kirindinu yarɔ ka ta kɛlɛ-kɛ-tinɛ.

¹² A si donu sigi mɔgɔ waga kelen-kelannu kun na. Donu si sigi mɔgɔ bi-loli bi-lolɛnu kun na. A si wola dan donu ma ala sɛnita keminɛnu na. A si donu ma ala kɛlɛ-kɛ-fen nadannɛnu na. A si donu fanan ma ala kirindi-miran nadannɛnu na.

¹³ A si wola dunmusi donu ma sɛnti-ladannɛnu na. A si donu ma ala gba-donnɛnu na. A si donu ma ala biredi-mintannɛnu na.

¹⁴ A si wola sɛni-sa-tina-hakikɛnu bi wo bolo anubɛ wola ki-fen-hakikɛnu ka wonu don ala mɔgɔ-banu bolo.

¹⁵ Ni wo ya wola fui-fannu anubɛ wola ki-fannu kundɛn, ni wo ya a suman kɔnɔntɔ, a tan nyɔgɛ, a si wonu bi wo bolo ka wonu di ala kandɛnu anubɛ ala mɔgɔ-banu ma.

¹⁶ A si wola yɔɔnnu bi wo bolo ka wonu ma ata wɔli-kɛlɛnu na. A si wola sara-ninki anubɛ wola sofɛli-tagbɛlɛnu bi wo bolo ka wonu ma ata wɔli-kɛ-fannu na.

¹⁷ Wola baanu anubɛ wola sagɛnu, wo ni anu dan kɔnɔntɔ, a tan nyɔgɛ, a si wo bi wo bolo, ado wole nyɛrɛ-nyɛrɛ si ma ata yɔɔnnu na.

¹⁸ Wo wati wa ke, wole nyɛrɛ-nyɛrɛ si gbunya wola mansa-siginɛ wo kɔrɔ. Kɔnɔ hali wo, Mari ti a wɔlɔ matɔlɔ wola gbunya-kumɛ wonu na.”

¹⁹ Kɔnɔ hali wo, mɔgɛnu ma sɔn anu tole masɔla Samuwɛlita kumɛ wonu na. Anu ya a fɔ a ye ko, “Hali wo, male ye nyinina mata mansɛ le ma,

²⁰ woletɔ ma si ma iko sibolo-gbɛrɛ minnu bi mala foolɛ rɔ. Mata mansɛ wo le si ma ma yarɔ-sɔlɛ la kɛlɛ rɔ.”

²¹ Mɔgɛnu ya min bɛɛsi fɔ, Samuwɛli ya wo lamɔɛn tumɛ min, a tara wo rakaran Mari ye.

²² Mari ya a fɔ a ye ko, “A ma iko a di anu ye nya min. I ni mansɛ sigi anu ye.” Wo kɔma, Samuwɛli ya a fɔ mɔgɔ-ba wonu ye ko, “Mɔgɛ bɛɛ ni ta a warɛ fɔlɔn.”