1 Samuwɛli 7 - ALLALA KUMƐ

¹ Woletɔ Kiriyati-Yirɔm mɔgɛnu ya Marita tɔn-kenkirɛ wo bi ka ta a la anu barɛ. Anu ya kenkirɛ wo bi ka ta a sigi kei dola bɔn la min tɔgɛ Abinadabu. Ala bɔn wo sɔnɛ kɔnkɛ le kuma. Anu ya Abinadabu wola den Ɛliyasa dantɛgɛ Mari ma. Wo tora tɔn-kenkirɛ wo makandanna.

Isirɛla Mɔgɛnu Dɛnbɛn-Koe Alla Bolo Samuwɛlita Wati Rɔ

² Marita tɔn-kenkirɛ ya san mogan de bɔ Kiriyati-Yirɔm soe burɔ. San kɛ mumɛ bɛɛ kɔrɔ, Isirɛla mɔgɛnu bi dila Mari dala anu dɛnbɛn-koe rɔ.

³ Samuwɛli ya a fɔ Isirɛla mɔgɛnu ye ko, “Ni wole ya wo ya-lamunun Mari la wo yisi bɛɛ la, fɔ ni wo ya wola bɛsɛnu nakɛ a rɔ katarala wola bɛsɛ ma min nadannɛ musila muninyɛ rɔ min tɔgɛ Asitɔra. Wo ni wo nyɛrɛ dantɛgɛ Mari kelen pe le ma ka ale kelen pe bato. Ni wo ya wo ma, ale si wo tanka Filisitinu masibɛ ma.”

⁴ Wo le ya a ma, Isirɛla mɔgɛnu ya anuna bɛsɛnu nakɛ a rɔ hali anuna bɛsɛ minnu tɔgɛ Beyali anubɛ Asitɔra. Anu tora Mari kelen pe le batola gbɛ!

⁵ Wo kɔma, Samuwɛli ya Isirɛla mɔgɛ bɛɛsi kele alako anu ni na a taran Misipa soe burɔ. A ya kilayɛ lata ko a si madiyali kɛ anu ye nyɔ.

⁶ Isirɛla mɔgɛ bɛɛsi ladɛnta Misipa soe burɔ. Anu ya yi do layɛlɛ kɔlɔn rɔ ka wo labɔn dugi ma Mari ye nyɔ. Anu telenta sunyɛ rɔ gbɛn, ha wurɛ la. Anu ko, “Ma ara hakɛ kɛ Mari la.” (Samuwɛli mara nyamani-kuma-kun-tigi la Isirɛla mɔgɛnu kun na Misipa soe kɛ le burɔ.)

⁷ Filisitinu ya a lamɔɛn tumɛ min ko Isirɛla mɔgɛnu bara anu kundɛn Misipa, Filisitinuna mansa lolɛ wulita anubɛ anuna kɛlɛ-dannu ka ta Isirɛla mɔgɛnu kan ma. Isirɛla mɔgɛnu ya wo lamɔɛn tumɛ min, anu kilanta.

⁸ Anu ya a fɔ Samuwɛli ye ko, “I ni to mata Mari Alla madiyala ma ye alako a ni ma kisi Filisitinu masibɛ ma.”

⁹ Samuwɛli ya saga-dan faga ka a mumɛ ma saraka-mintantɛ la Mari ye. Wo kɔma, a ya Isirɛlata Mari Alla madiya anu dɛnbɛn-koe la, ado Mari ya ala madiyali-kan wo yabi.

¹⁰ Wulɔn-tele kelan, Samuwɛli ye sarakɛ wo bɔla, Filisitinu nara kɛ Isirɛla mɔgɛnu ma. Wati kelan wo rɔ, Mari ya san-gbalamɛ layigi Filisiti wonu ma ka anu kumakɔ. Anu tanyɛnsɛnta.

¹¹ Isirɛla mɔgɛnu birita-biritɛ bɔra Filisitinu gbenna Misipa ka ta anu fagala ha Bɛti-Kari soe dafɛ.

¹² Samuwɛli ya kuru-gbui do bi ka wo sigi Misipa anubɛ Sɛn soenu tɛma. A ya a fɔ ko, “Ha kaka, Mari ye ma dɛnbɛna.” A ya kuri wo tɔgɔ sa “Dɛnbɛn Kuri.”

¹³ Anu ya Filisitinu nɔ. Mari ya a ma, anu ma ke Isirɛla mɔgɛnu nɔla Samuwɛlita wati rɔ.

¹⁴ Filisitinu bara Isirɛla mɔgɛnuna soe minnu bi anu bolo nun Ɛkirɔn anubɛ Kati soenu tɛma, soe wonu sɛgira Isirɛla mɔgɛnu ma tun. Anuna nyamanɛ bɛɛ sɛgira anu ma. Yisi-kimɛ taranta Amoranu anubɛ Isirɛla mɔgɛnu tɛma fanan.

¹⁵ Samuwɛli tora Isirɛla kun na a siyi-tele-bɛɛ rɔ.

¹⁶ San-bo-san, Samuwɛli si ta so-kun sawɛ kɛ bɛɛ rɔ kiti fɔ tinɛ, Bɛtɛli wo, Kiligali wo, anubɛ Misipa.

¹⁷ A wa ban kɛ la, a si sɛgi a kɔma kiti-sa-tinɛ a sɔrɔn-soe burɔ Rema. A ya saraka-mintan-tinɛ sɔ Mari ye nyɔ.