1 Samuwɛli 6 - ALLALA KUMƐ

Tɔn-Kenkirɛ Lasɛgi-Koe

¹ Marila tɔn-kenkirɛ ya karɛ wɔrɔnfila bɔ Filisitinu bolo tumɛ min,

² anu ya anuna bɛsi Degɔnta saraka-masɔlɛnu anubɛ anuna bolo-tafɛlɛnnɛnu kele. Wonu nanɛ, anu ya a fɔ wonu ye ko, “Ma si nfen ma Marila tɔn-kenkirɛ kɛ la? Ni ma ye a lasɛgila a tiginu ma, ma si nfen sa a kuma?”

³ Wonu ya a fɔ anu ye ko, “Ni wo ye Isirɛla mɔgɛnuta Allata tɔn-kenkirɛ lasɛgila anu ma, wo kana a lata wo nya na, ni wo ma fenfen sa a kuma min si ma wola yiliki-sarakɛ la. Ni wo ya wo ma, wo si kɛndɛya. Wo si a lɔn worɔ min bi a tola wo ye tola tɔrɔyala Alla bolo.”

^4-5 Filisiti mɔgɛnu ya anu manyinika ko, “Ma si Isirɛla mɔgɛnuta Alla kɔ fan nyamintan sufa lata?” Bolo-tafɛlɛnnɛ anubɛ saraka-masɔlɛnu ya a fɔ anu ye ko, “Wo ni fan-tonto-kirayɛ wo tamasere loli ladan sɛnɛ la anubɛ tula lolila muninyɛ sɛnɛ la bawo wonu denu bi wola nyamanɛ kasarala. Kɛ kelen-kelennamɛ-bɛɛ si ta so-kun lolɛ kɛ mansa loli gbɛ rɔ. Wo ye wo mala bawo kiraya kelan kɛ ara wobɛ wola mansɛnu tɔrɔ. Wo ni Isirɛla mɔgɛnuta Alla gbiliya. Tumado a si a fara wobɛ wola bɛsɛnu anubɛ wola nyamanɛ tɔrɔla.

⁶ Nfenna wo ye wo yisi gbɛlɛyala iko Iyipiti kɛnu anubɛ anuna mansɛ ya a ma nya min fɔlɔ nun? Iko wo ya a lɔn nya min, Alla ya anu bolo labira ha Isirɛla mɔgɛnu ya anu sɔrɔn anu na.

⁷ “Wo ni kirindi-kurɛ ladan ka kirindi wo kiri sara-ninki-yuwan fila ma minnu na ma wɔli wɛ. Wo ni anuna dannu gben anu fɛ ka anu nadon kan-tina-gbɛrɛ.

⁸ Wo ni Marila tɔn-kenkirɛ wo bi ka a sigi kirindi wo rɔ. Wo ya sɛnɛ minnu ma wo yiliki-sarakɛ la, wo ni wonu bi ka anu sa kenkira-gbɛrɛkɛ rɔ. Wo ni kenkirɛ wo sigi tɔn-kenkirɛ wo dafɛ kirindi rɔ. Wo ni ninki-yuwan wonu nawuli. Anu ni ta anu kun fɛ.

⁹ Wo ni wo yɛ bɛn anu ma. Ni anu ya anu kun telen Bɛti-Simɛsi soe wara la, wo ni a lɔn worɔ ko Isirɛla mɔgɛnuta Alla, wo le ya kirayɛ kɛ sigi ma ma. Kɔnɔ ni anu ma anu kun telen nyɔ la, ma ni a lɔn worɔ ko ale ma kirayɛ kɛ sigi ma ma. Kirayɛ le dɔrɔn nara ma ma.”

¹⁰ Filisitinu ya a ma iko anuna kofo-dan anubɛ anuna bɛsi-kɔlɛnu ya a fɔ anu ye nya min. Anu ya kirindi kiri ninki-yuwan filɛ wo la ka anuna dannu gben anu fɛ ka anu nadon kan-tina-gbɛrɛ.

¹¹ Anu ya tɔn-kenkirɛ sigi kirindi rɔ. Kirayɛ wo tamasere-sɛnɛ anubɛ sɛnɛ min nadannɛ tulɛla muninyɛ la, anu ya wonu bi ka wonu sa kenkira-gbɛrɛkɛ rɔ. Anu ya kenkirɛ doi wo sigi kirindi rɔ tɔn-kenkirɛ wo dafɛ.

¹² Anu ya ninki-yuwan wonu nawuli tumɛ min, wonu dimatoe tara Bɛti-Simɛsi kilɛ la gbonkan! Filisitinuna mansa loli wonu bilara ninki wonu fɛ ha Bɛti-Simɛsi dan la.

Tɔn-Kenkirɛ Ke-Koe Isirɛla Mɔgɛnu Ma

¹³ Isirɛla mɔgɛ minnu siginɛ Bɛti-Simɛsi soe burɔ, wonu bi fui-fan tɛgɛla lɛɛ rɔ nyɔ. Anu ya anu kunyɛ kɔrɔbi tumɛ min, anu ya anuna tɔn-kenkirɛ yen nala. Anu sewara dɔgɔma-ma-de!

^14-15 Ninki-yuwan wonu nara tɔn-kenkirɛ wo la ha kei dola sɛnɛ rɔ ka a sɔ fara-gbu-wɛ do dafɛ. Sɛnɛ-tigi wo tɔgɛ le Yasowa. A sɔrɔnta Bɛti-Simɛsi soe burɔ. Lifayi bɔnsɔn-mɔgɛ donu ya kenkirɛ wonu bi ka anu sigi fara-gbu-wɛ wo kuma. Wo kɔma, anu ya kirindi wo ratɛgɛtɛgɛ ka ninki wonu ma saraka-mintantɛ la Mari ye. Soe wo mɔgɛnu fanan ya saraka-mintantɛnu bɔ anubɛ saraka-gbɛrɛkɛnu Mari ye.

¹⁶ Filisitinuna mansa lolɛ wonu ya anu yɛ bɛn kɛnu ma gbɛ ha wonu banta kɛnu mala. Wo kɔma, anu denu fanan ya anu sɛgi Ɛkirɔn soe burɔ wulɔn tele kelan.

¹⁷ Filisiti minnu ya fan-tonto-kirayɛ wo tamasere ladan sɛnɛ la nun ka wonu ma anu yiliki-sarakɛ la Isirɛlata Mari ye anuna so kelen-kelan bɛɛla ko la. Soe wonu tɔgɛ le kɛnu na, Asadadi wo, Kesa wo, Asikalɔn wo, Kati wo, anubɛ Ɛkirɔn.

¹⁸ Hali anu ya tulɛla muninyɛ minnu nadan sɛnɛ la, anu ya wonu fanan nata. Mansa so-kun loli latankanɛ anubɛ anu dafɛ-so-mɛsɛnu, tarɛ sa minnu ma, wo bɛɛ ya kelen-kelen nata. Soe wonu tara ha ka ke farɛ wo ma anu ya tɔn-kenkirɛ sigi farɛ min kuma. Ha bi, farɛ wo ye a gbɛ rɔ nyɔ.

¹⁹ Mari ya kemini bi-wɔrɔnfila faga Isirɛla mɔgɛnu tɔ Bɛti-Simɛsi soe burɔ bawo anu bara anu yɛ layigi tɔn-kenkirɛ burɔ. Nyɔ-mɔgɛnu dira bawo Mari ara mɔgɔ-siyaman faga anu tɔ.

Tɔn-Kenkirɛ Ta-Koe Kirayati-Yirɔm

²⁰ A kei-toe minnu tora Bɛti-Simɛsi soe burɔ, wonu ya a fɔ ko, “Yon si ke a sɔla Mari Alla-sɛnimɛ kɛ yakɔrɔ? Ma si tɔn-kenkirɛ kɛ lata mintɔ alako a ni bɔ ma dafɛ?”

²¹ Anu ya kilayɛnu nata Kiriyati-Yirɔm so-burɔ-mɔgɛnu ma ka a fɔ anu ye ko, “Filisitinu bara Marita tɔn-kenkirɛ lasɛgi ma ma. Wo na, a bi.”