1 Samuwɛli 5 - ALLALA KUMƐ

Tɔn-Kenkirɛ Wara-Koe Filisitinu Bolo

¹ Filisitinu ya tɔn-kenkirɛ wo bi Isirɛla mɔgɛnu bolo Dɛnbɛn Kuriya dagɛ rɔ tumɛ min, anu tara a la anu barɛ Asadadi soe burɔ.

² Anu tara a la anuna bɛsi-kɔ-tinɛ anu si anuta bɛsi Degɔn kɔ kan min. Anu ya tɔn-kenkirɛ wo sigi anuta bɛsɛ wo dafɛ.

³ Wo wulun sɔgɔma, so-burɔ-mɔgɛnu nara a taran, anuna bɛsɛ wo ara gbangban a sun ma tɔn-kenkirɛ wo yarɔ. Anu ya anuna bɛsɛ wo lawuli tun ka a sɔ a gbɛ rɔ.

⁴ Wo fanan banda kɛ tun, anu ya a taran tun, a buinɛ tɔn-kenkirɛ wo kɔrɔ. Kɔnɔ a bui kɛ rɔ, anu ya a taran, a kunyɛ anubɛ a bolenu kerinɛ a la. Wonu sanɛ bonda-dɛ kɔrɔ. A mununkulɔn tora sani Allata tɔn-kenkirɛ kɔrɔ.

⁵ (Ka a dabira wo wati ma, Degɔnta saraka-masɔlɛnu anubɛ a kɔlɛnu ti anu kian sɔ bonda-dɛ kɔrɔ nyɔ fɔ ka anu kian latenbi nyɔ kun na.)

⁶ Mari ya Asadadi kɛnu tɔrɔ dɔgɔma-ma-de ha anu kilanta. A ya fan-tonto-kirayɛ sigi Asadadi soe mɔgɛnu ma anubɛ a dafɛ-sonɛnuta mɔgɛnu ma.

⁷ Anu ya kala sɔrɔn kirayɛ wo ma tumɛ min, anu ya a fɔ ko, “Isirɛlata Alla, a ye male tɔrɔla anubɛ mala bɛsi Degɔn. Male ti sɔn tɔn-kenkirɛ to-koe ma yan tɔ tun.”

⁸ Anu ya kilayɛnu nata Filisitinuna so-kun lolɛ mansɛnu ma ka wonu kele. Mansɛ wonu nara tumɛ min, Filisitinu ya wonu manyinika, anu ko, “Ma si nfen ma Isirɛlata Allata tɔn-kenkirɛ kɛ la?” Mansɛ wonu ko, “Wo ni a bi yan ka ta a la Kati soe burɔ.” Woletɔ anu tara a la Filisitinuna soe do burɔ min tɔgɛ Kati.

⁹ Tɔn-kenkirɛla ke nyɔ, Mari ya kiraya-su wo sigi nyɔ-mɔgɛnu ma fanan ha anu kumakɔra kirayɛ wo bolo. Kirayɛ wo sigira so-burɔ-mɔgɔ damasi ma.

¹⁰ Wonu fanan ya tɔn-kenkirɛ wo bi nyɔ ka ta a to Filisitinuna soe burɔ Ɛkirɔn. Kenkirɛla ke nyɔ, nyɔ-mɔgɛnu ya sɔnkɛ dabira, anu ko, “Anu bara na Isirɛlata Allata tɔn-kenkirɛ kɛ la yan alako ka ma dama faga.”

¹¹ Wonu ya Filisitinuna so-kun lolɛ wonu mansɛnu kele tun ka anu kundɛn. Anu ya a fɔ mansɛ wonu ye ko, “Wo ni Isirɛla mɔgɛnuna tɔn-kenkirɛ lasɛgi anu ma alako a kana na mabɛ mala denbayɛnu nato.” Ɛkirɔn soe mɔgɛ bɛɛsi kumakɔra bawo Alla ye anu tɔrɔla belebele-wɛ-kɛ.

¹² Hali minnu tora anu kɛndɛ la, wonu ya kirayɛ kɛ sɔrɔn de! Anu tora dila anuna bɛsɛnu dala anu dɛnbɛn-koe rɔ.