1 Samuwɛli 4 - ALLALA KUMƐ

Isirɛla Mɔgɛnu Nɔ-Koe Filisitinu Bolo

¹ Wo wati rɔ, Filisitinu ya anu kundɛn Isirɛla mɔgɛnu kan ma. Isirɛla mɔgɛnu fanan ya anu nawuli ka ta anu kɛlɛ tinɛ. Anu tara anu daga makɛ kan tinɛ do rɔ anu ya min kele ko Dɛnbɛn Kuriya. Filisitinu fanan tara anu daga makɛ soe do dafɛ min tɔgɛ Afɛki.

² Filisitinu kɛra Isirɛla mɔgɛnu ma tumɛ min, anu ya Isirɛla mɔgɔ waga nani nyɔgɔn (4,000) faga.

³ Isirɛla kɛlɛ-den-toe minnu tora, wonu nara dagɛ rɔ tumɛ min, Isirɛla mɔgɔ-banu ya anu manyinika ko, “Nfenna Mari sɔnta ko Filisitinu ni ma nɔ bi? Min fisa, ma ta Marita tɔn-kenkirɛ bi Sailo ka na a la. Tumado ni wo ye ma fɛ, Mari si ma lakisi ma yogenu ma.”

⁴ Woletɔ anu ya mɔgɛnu nata Mari Sɛnbɛ-Bɛɛ-Tigita tɔn-kenkirɛ wo bi-tinɛ Sailo soe bawo Mari mayiginɛ melika-muninya filɛ wonu tɛma tɔn-kenkirɛ wo kuma. Ilayila den-kemini filɛ, Hɔfini anubɛ Finihasi bilara tɔn-kenkirɛ wo fɛ.

⁵ Anu ke tɔn-kenkirɛ wo la dagɛ rɔ, Isirɛla mɔgɛ damasi ya a lasɔnkɔ sewɛ bolo ha dugi yɛrɛyɛrɛnta.

⁶ Filisitinu ya anu sɔnkɔ-kan wo lamɔɛn tumɛ min, anu ko, “Nfen sɔnkɔ ye Hiburu kɛnuna dagɛ rɔ?” Filisitinu ya a lɔn tumɛ min ko Marita tɔn-kenkirɛ ara ke Hiburununa dagɛ rɔ,

⁷ anu kilanta dɔgɔma-ma-de! Anu ko, “Alla do ara na anuna dagɛ rɔ serr! Ma kunyɛ ara to-a-rɔ. Ko sufa kɛ ma ma wɛ ma warɛ mumɛ!

⁸ Yon si ke male lakisila anuta Alla-makawanɛ kɛnu bolo gbɛ? Alla kɛnu denu ya tɔrɔya-fitinɛnu sigi Iyipiti kɛnu ma ka anu faga wulɛ rɔ.

⁹ Kɔnɔ hali wo, male Filisitinu, ma ni ma kerinteya wona. Ma ni anu kɛlɛ iko kei si kɛlɛ kɛ nya min. Ni ma ma wo ma, male si ma yɔɔnnu na Hiburu kɛnu kɔrɔ iko anu denu fanan bi yɔɔnyɛ la ma kɔrɔ nya min nun. Woletɔ ma ni ma sɛbɛ don wona ka kɛlɛ kɛ iko kei si kɛlɛ kɛ nya min.”

Tɔn-Kenkirɛ Bi-Koe Filisitinu Bolo

¹⁰ Filisitinu ya Isirɛla mɔgɛnu nɔ kɛlɛ-kɛ-tinɛ. Isirɛla mɔgɛnu burimatoe sɛgira anu barɛnu tɔ. Isirɛla kɛlɛ-dan minnu fagara wulɔn, mɔgɔ waga bi-sawa (30,000).

¹¹ Min tenbira wo la, Filisitinu ya Allata tɔn-kenkirɛ bi anu bolo. Ilayila den-kemini filɛ, Hɔfini anubɛ Finihasi, wonu kunyɛ tora kɛlɛ wo rɔ.

Ilayi Faga-Koe

¹² Bɛnyamɛ bɔnsɔn-mɔgɛ do burimatoe bɔra kɛlɛ rɔ ka ta fɔɔ Sailo. A kera nyɔ wulɔn-tele kɔrɔ. A ya ala duruki wo rafara ka gbangban kɛ a kunyɛ rɔ ka a yira mɔgɛnu na ko a yisi tinyanɛ.

^13-15 Ilayi siginɛ waganɛ rɔ kilɛ la. A yɛ mawuyannɛ bawo a hɔnnɛ Allata tɔn-kenkirɛ wo kuma. Wo wati ya a taran, Ilayi ara san bi-kɔnɔntɔ ani san segin (98) bɔ, ado a ara fɔlɔla fiyonyala. Koe min bɛɛsi mara kɛlɛ rɔ, Bɛnyamɛ kɛ wo ya wo rakaran soe wo kan-tinɛ bɛɛ rɔ. Mɔgɛ bɛɛ donta di-kɛ rɔ kilan bolo. Ilayi ya di-kɛ-kan wo lamɔɛn tumɛ min, a ya mɔgɛ do manyinika ko, “Nfen di kɛ ye pan?” Kɛlɛ-kɔrɔ-burilɛ wo burimatoe tara a fɔ Ilayi fanan ye ko,

¹⁶ “N bara n buri kɛlɛ le kɔrɔ kɛ la ha n bara na ke yan.” Ilayi ya a fɔ a ye ko, “Nna den, nfen mara wo rɔ?”

¹⁷ Kei wo ya a fɔ a ye ko, “Isirɛla kɛlɛ-dannu ya anu buri Filisitinu kɔrɔ. Anu ya mɔgɔ-siyaman faga ma rɔ. Min tenbinɛ wo la, ila dannu Hɔfini anubɛ Finihasi, wonu kunyɛ ara to kɛlɛ wo rɔ, ado anu ya Allata tɔn-kenkirɛ bi ma bolo ka ta a la anu barɛ.”

¹⁸ Tɔn-kenkirɛ bi-koe fɔra a ye nkɛkuna, Ilayi sɛgira a kɔma kilɛ la ka bɔ ala sigi-fan rɔ ka bui tarɛ-don-dɛ kɔrɔ. A kan kerita. A fagara bawo a ara kɔrɔya, ado a kunba. San bi-nani kɔrɔ, a ye kun-tigiyɛ la Isirɛla mɔgɛnu kun na nun.

Finihasila Musi Faga-Koe

¹⁹ Ilayi mama-nyaganɛ, Finihasila musi, kɔni, wo buyi ye a la nun, ado a mui-wati ara gbɛrɛn. Ale fanan ya tɔn-kenkirɛ bi-koe lamɔɛn min kɛ anubɛ a benba faga-koe anubɛ ala kei faga-koe, a buyi ya a lamaga. A muira, den-kei.

²⁰ A niyi ara wuli bɔla a rɔ, tinkɔrɔ-sigilɛ ya a fɔ a ye ko, “I ragbɛlɛya bawo i wara den-kei sɔrɔn.” Kɔnɔ musi wo ma fenfen fɔ hali ka a mamaga.

^21-22 A ya dan wo tɔgɔ sa “Gbiliya Sa Tun” bawo a ko, “Allata gbiliyɛ ara bɔ Isirɛla mɔgɛnu bolo bawo anu bara ta Allata tɔn-kenkirɛ la,” ado a benba anubɛ ala kei ara faga.