1 Samuwɛli 3 - ALLALA KUMƐ

Marita Ko-Rayirɛ Samuwɛli Ye

¹ Samuwɛli ye Marita wɔlɛ kɛla Ilayi kɔrɔ wati min, Mari sa kuma-siyaman fɔla mɔgɛnu ye wo wati rɔ nun, ado ala ko-rayirɛ fanan ma siya mɔgɛnu ye.

^2-3 Wati-tenbinɛ, Ilayi yɛ ma ara fɔlɔla birala kinayɛ bolo. Wo sanɛ a nyɛrɛta konko la Marita Fani-Bɔn la tɔn-kenkirɛ ye bɔn min na. Samuwɛli fanan sanɛ Marita Fani-Bɔn burɔ. Yanni lɛnpu-dufen-wati ni ke,

⁴ Mari ya Samuwɛli takele. Samuwɛli ya a labira, a ko, “O-o.”

⁵ A burimatoe tara Ilayi wara. A ya a fɔ wo ye ko, “Ile le ya n kele? N bara na.” Ilayi ko, “Nde ma i kele. Ta i sa-tinɛ.” Samuwɛli tara a sa-tinɛ tun.

^6-7 Mari ya Samuwɛli takele tun. Kɔnɔ ale ma a lɔn nun ko Mari le ye a rakelela bawo a ma a kuman-kan lamɔɛn bɛ nun. A ya a lasɔ ka ta Ilayi wara tun, a ko, “Ile le ya n kele? N bara na.” Ilayi ya a fɔ a ye ko, “Nna den, nde ma i kele. Ta i sa-tinɛ.”

⁸ Samuwɛlita kele sawa nyɔgɛ Mari bolo, a ya a lasɔ. A tara Ilayi wara tun. A ya a fɔ a ye ko, “Ile le ya n kele? N bara na.” Ilayi ya a lɔn wati wo le tɔ ko Mari le ye dennɛ wo rakele-tinɛ.

⁹ A ya a fɔ a ye ko, “Ta i sa-tinɛ. Ni i ya i rakele-kan lamɔɛn gbɛ, a fɔ ko, ‘N Mari, kuma. Ita wɔli-kɛlɛ tole masɔnɛ i la.’ ” Wo kɔma, Samuwɛli tara a sa a sa-tinɛ tun.

¹⁰ Mari nara a sɔ nyɔ ka a rakele tun. A ko, “Samuwɛli, Samuwɛli!” Samuwɛli ya a yabi ko, “Kuma, ita wɔli-kɛlɛ tole masɔnɛ i la.”

¹¹ Mari ya a fɔ ale Samuwɛli ye ko, “N bi nala koe min mala Isirɛla mɔgɛnu na, wo si gbɛlɛya anu kuma. Ni mɔgɔ-wo-mɔgɔ ya wo lamɔɛn, wo miran si bɔ a ma.

¹² Wo wati wa ke, n ya min bɛɛ fɔ Ilayi kebilɛ wara-koe rɔ, n si wo bɛɛsi ma.

¹³ N si a kebilɛ tɔrɔ nya min habadan, n bara ban wonu fɔla a ye nun bawo ala dannu ya ko-yogomɛ minnu ma, a ya wonu lɔn kɔnɔ a ma sɔn anu nakalala.

¹⁴ N bi kɛ fɔla n sɛbɛ le la. Hali Ilayi kebila-mɔgɛnu ya sarakɛ, ni wo ma, kɔ-fan bɔ anu hakɛla ko la, a ti bira.”

¹⁵ Samuwɛli kira sani kudu, ha banda kara. A ya a lasɔ ka Marita Fani-Bɔn bonda-dɛ laka. Kɔnɔ a kilanta ala ko-rayirɛ wo rakaranna Ilayi ye.

¹⁶ Kɔnɔ Ilayi ya a rakele, a ko, “Nna den, Samuwɛli.” Samuwɛli ya a labira, a ko, “O-o.”

¹⁷ Ilayi ya a manyinika ko, “Mari ya nfen fɔ i ye? I kana ko-wo-ko dogon n ma. A ara koe min bɛɛsi fɔ i ye, ni i ma wonu fɔ n ye, Alla si i tɔrɔ bɛrɛbɛrɛ-wɛ-kɛ.”

¹⁸ Mari ya koe min bɛɛsi fɔ a ye, Samuwɛli ya wonu fɔ a ye. A ma ko-wo-ko dogon a ma. Samuwɛli ban wo fɔla, Ilayi ya a fɔ ko, “Mari le ale la. Ko-wo-ko diyara ale ye, a si wo ma.”

¹⁹ Samuwɛli tora koloyala. Mari tora a fɛ. Samuwɛli ya koe min bɛɛsi fɔ mɔgɛnu ye, wonu mara tonyɛ la.

²⁰ Isirɛla nyamani-tonko-nanɛ mɔgɛ bɛɛ ya a lɔn ko Samuwɛli le nɛbiyɛ la Mari ye.

²¹ Mari tora kumala Samuwɛli ye Sailo soe burɔ ka ko-rayirɛ kɛ a ye, ado Samuwɛli kumara tuma-wo-tuma, Isirɛla mɔgɛnu si anu tole masɔ a la.