1 Samuwɛli 26 - ALLALA KUMƐ

Mansa Sɔli Niyi-Latanka-Koe Dawuda Bolo Tun

¹ Mɔgɛ donu bɔra Sifi soe burɔ ka ta a fɔ Mansa Sɔli ye ko Dawuda dogonnɛ Hakila kɔnkɛ rɔ min bi Yuda nyamanɛ wulɛ dafɛ. Anu ya Mansa Sɔli taran Kibiya soe wulɔn.

² Tiriyante wo rɔ, Mansa Sɔli tara Isirɛla mɔgɔ waga sawa (3,000) la a bolo minnu tagbɛlɛ. Anu tara Dawuda nyini tinɛ Sifi wulɛ rɔ.

³ Anu ke nyɔ rɔ, anu ya anu daga makɛ kilɛ la min bi tala Hakila kɔnkɛ wara la. Wo ya a taran, Dawudanu daga makɛnɛ wulɛ rɔ nyɔ. Dawuda ya wo lamɔɛn tumɛ min,

⁴ a ya ko-lakɔrɔsilɛnu nata alako wonu ni a lɔn serr ni Mansa Sɔli le.

⁵ Wonu nara anu dantɛgɛ Dawuda ye tumɛ min, ale nyɛrɛ-nyɛrɛ wulita anubɛ keminɛ donu alako ka a lɔn ni Mansa Sɔli anubɛ ala kɛlɛ-den-kun-tigi ye kan min, yɔ! Mansa Sɔlita kɛlɛ-den-kun-tigi tɔgɛ le Abina. Wo fa tɔgɛ le Nɛri. Anu ya a taran, Mansa Sɔli ye kinɔgɔla ala kɛlɛ-dannu tɛma.

⁶ Dawuda ya ala keminɛ mɔgɔ fila manyinika, a ko, “Wole mɔgɔ filɛ kɛ yon si ta n fɛ Mansa Sɔlita dagɛ rɔ.” Kelan tɔgɛ le Ahimɛlɛki min bɔra Hɛtinu tɛma. Doi tɔgɛ le Abisayi. Wo na-kelen-nyɔgɛ tɔgɛ le Yohabu. Anu na tɔgɛ le Sɛruya. Abisayi ya a fɔ a ye ko, “Nde si ta i fɛ.”

⁷ Wulɔn suyi rɔ, Dawuda anubɛ Abisayi tara Mansa Sɔlila dagɛ rɔ. Anu ya Mansa Sɔli taran kinɔgɔla dagɛ tɛma den! Ala tanbɛ gbangbannɛ dugu rɔ a kunyɛ dafɛ. Abina anubɛ ala kɛlɛ-dannu fanan bi kinɔgɔla Mansa Sɔlila foolɛ rɔ.

⁸ Abisayi ya a fɔ Dawuda ye ko, “Bi suyi rɔ, Alla ara i yoge don i bolo tun. A ma, n ni ala tanbɛ kɛ bi ka a layigi a rɔ iko kelen pe ka a gbangban dugi rɔ. Hali n ma a layigi iko fila.”

⁹ Kɔnɔ Dawuda ya a fɔ a ye ko, “I kana ko-wo-ko ma a la bawo ni mɔgɔ-wo-mɔgɔ ya ko ma Marita mansa-yabɔnɛ la, ale Mari si wo tigi tɔrɔ.

¹⁰ N bara n keli Mari la, n lanɛ a la ko ale Mari nyɛrɛ-nyɛrɛ le ye Mansa Sɔli kɛ fagala. A siyi si ban, ni wo ma, a si to kɛlɛ rɔ.

¹¹ Kɔnɔ Mari ara min ma mansɛ la, ka a fɔ nde ni wo faga, alamɛ Mari ya n tanka wo ma. Ma ta ala tanbɛ anubɛ ala yi-kɛ-barɛ la dɔrɔn ma bolo.”

¹² Dawuda anubɛ Abisayi ya wonu bi Mansa Sɔli kun kan tɔ ka ta anu na. Mɔgɔ-wo-mɔgɔ ma kunden anu tɔ hali ka sui anu ma bawo Mari le ya anu nakinɔgɔ belebele-wɛ-kɛ.

¹³ Wo kɔma, Dawuda ya fole tɛgɛ ka yɛlɛ kɔnkɛ do kuma, anu bolo ti ke anu ma kan min.

¹⁴ A ya Abina anubɛ ala kɛlɛ-dannu takele. A ko, “Abina. I sa n kuman-kan lamɔɛnna?” Abina ya a fɔ a ye ko, “Yon bi seren-serenna kɛ la ka mansɛ lakunden?”

¹⁵ Dawuda ya a fɔ a ye ko, “Isirɛla mɔgɛnuna kɛlɛ-kurugbɛ ma ile la? Nfenna i sa i tigi mansɛ latankala? Mɔgɛ do bɔ-san le tala nyɔ ka i tigi mansɛ faga.

¹⁶ I ma ke ila wɔlɛ nɔla. N bara n keli Alla-nimɛ rɔ, a bɛnnɛ le wole dama ni faga bawo Mari ara min yabɔ ka a ma mansɛ la, i ma ke wo lakandanna. Wo ni wo yɛ lakalan ba, mansɛla tanbɛ ye mi? Ala yi-kɛ-barɛ fanan minnu bi a kun kan tɔ nun, wonu bi mintɔ?”

¹⁷ Mansa Sɔli ya a lɔn ko Dawuda le kumala. A ko, “Nna den Dawuda le kumala kɛ la?” Dawuda ko, “Ɔn, n tigi.

¹⁸ Nfenna i nɔrɔnɛ nde, ila wɔli-kɛlɛ ma? N bara nfen ko tinya i ma?

¹⁹ N tigi, n bi min fɔla i ye, i wɔlɔ matɔlɔ wo la. Ni Mari le wara a ma, i wara nɔrɔ n ma, sarakɛ si a ma, ale Mari yisi ni yɛlɛma n bara-koe rɔ. Kɔnɔ ni mɔgɛnu denu gba ye, alamɛ wonu tiginu ya Marita dankɛ sɔrɔn bawo anu bara n gben Marita nyamanɛ rɔ ka n nata nyamani-gbɛrɛ rɔ alako n ni sibolo-gbɛrɛnuna bɛsɛnu kɔ nyɔ.

²⁰ N fa, i yandi, a ma, n kana na faga sibolo-gbɛrɛnuna nyamanɛ rɔ Mari sa kan min. Nfenna Isirɛla mɔgɛnuna mansɛ ye nala nde muruntu-mɛrɛntɛ faga kan ma? Nfen ya a to, i ye nala n manɛgɛnna iko donse ye wɔlɛ manɛgɛnna nya min?”

²¹ Mansa Sɔli ya a fɔ a ye tun ko, “Nde le wara hakɛ kɛ i la. Nna den Dawuda, na n bara. Nba, i wara n niyi latanka bi suyi rɔ, n ti ko-wo-ko ma i la tun. N bara yuwayɛ le ladan i la wo la. N bara sama dɔgɔma-ma-de!”

²² Dawuda ko, “N tigi, i yɛ lata ila tanbɛ ma. Ila kɛlɛ-dan do ni na a bi.

²³ Lanaya-mɔgɛ minnu si ko-latelennɛ kɛ, Mari si wonu barayi. Mari min ya i ma mansɛ la, wo ya i don n bolo bi kɔnɔ n ma ko-wo-ko ma i la.

²⁴ Iko n bara i niyi latanka nya min bi, alamɛ Mari ya wo nyɔgɔn ko sufa ma n ye ka n tanka yakɔrɔ-mamɔɛ ma.”

²⁵ Mansa Sɔli ya a fɔ Dawuda ye ko, “Nna den, alamɛ i ya Marita duwɛ sɔrɔn. I donta ko-wo-ko rɔ, i si wo munanfagɛ sɔrɔn.” Dawuda tara a kunfɛ. Mansa Sɔli fanan tara a warɛ.