1 Samuwɛli 21 - ALLALA KUMƐ

Dawuda Buri-Koe Mansa Sɔli Kɔrɔ

¹ Dawuda burimatoe tara Nobi soe burɔ saraka-masɔlɛ do wara min tɔgɛ Ahimɛlɛki. Saraka-masɔlɛ wo bɔra Dawuda wara la tumɛ min, a yɛrɛyɛrɛnta kilan bolo. A ya Dawuda manyinika ko, “Nfenna i kelan ara na yan, ado mɔgɔ ma na i fɛ?”

² Dawuda ya a fɔ a ye ko, “Mansɛ le ya n sɔ. A ya n sɔ min tɔ, a ko mɔgɔ-wo-mɔgɔ kana ko lɔn a rɔ. N bara a fɔ nna keminɛnu ye, n ko ma ni ma nyɔgɔn bɛn kan tinɛ do rɔ.

³ Ni dɔntɛ ye i bolo, wo di n ma. Hali biredi-lɔngbɔn loli i bolo, wo di n ma. Ni fenfen ye i bolo, wo di n ma.”

⁴ Saraka-masɔlɛ wo ya a fɔ Dawuda ye ko, “Biredi-gbɛrɛkɛ sa n bolo yan tɔ fɔ Marita biredi-sɛnimɛ. Tele filɛ kɛ kɔrɔ, ni wo ma ki wɛ musu wara, n si ke le wo dila wo ma.”

⁵ Dawuda ya a fɔ a ye ko, “Tele-dande kɛ kɔrɔ, male ma wo ma. Ma tara ma halala-tagama rɔ kan-bo-kan, ma sɛninyani de iko tɔn ya a fɔ nya min kumanato, tagama-latankanɛ kɛ rɔ.”

⁶ Saraka-Masɔla Ahimɛlɛki wo ya Marita biredi-sɛnima-kɔrɛ wo di Dawuda ma Marita Fani-Bɔn la bawo anu ban-san le biredi-kurɛ sala Mari ye nyɔ biredi kɔrɛ wo gbɛ rɔ, ado biredi-gbɛrɛkɛ sa.

⁷ Wo ya a taran, Mansa Sɔlila saga-kandanna-kun-tigi min tɔgɛ Dowɛgi, wo ye saraka-masɔlɛ wo fɛ. A matanbaninɛ nyɔ bawo a tara min na Marita Fani-Bɔn la, a ma wo ka wɛ a la anubɛ Alla tɛma. Idɔm kɛ le ale la.

⁸ Dawuda ya Ahimɛlɛki manyinika, a ko, “Faan anubɛ tanba sa i bolo yan? I ni n sinka kelen na. Nde ma na fen na bawo mansɛ ya n sɔ kilaya-rakalamɛ le la.”

⁹ Saraka-masɔlɛ ya a fɔ a ye ko, “I ya Filisitinuna kɛlɛ-kurugbɛ Kolati min faga Ila lɛɛ rɔ, wola faan ye n bolo yan. A ye saraka-masɔ-fɔlɔnfalan wo kɔma. Kurɛ do mamɔrɔ-mɔrɔnɛ a ma. Ni wo di i ye, wo bi bawo faan mumɛ sa yan wo kɔma.” Dawuda ya a fɔ a ye ko, “Nba, wo don n bolo bawo faan-gbɛrɛkɛ ti kinya ka ke wo rɔ.”

¹⁰ Dawuda ban faan wo sɔrɔnna, a ya a buri Mansa Sɔli kɔrɔ tun. A tara Kati so-tigi wara min tɔgɛ Akisi. Filisitinuna soe le wo la.

¹¹ So-tigi wola mɔgɔ-banu ya a fɔ ko, “Dawuda le ma kɛ la min bi mansayɛ la nyamanɛ kɛ rɔ? Ale le kɛ la musinu bi min matɔgɔla dɔn-kɛ-tinɛ. Anu bi a fɔla a ma ko, ‘Sɔli ara mɔgɔ waga siyaman faga kɔnɔ Dawuda ara mɔgɔ waga tan siyamɛ faga.’ ”

¹² Kati mɔgɔ-banu bi kumɛ wo minnu fɔla, wo ya Dawuda yisi gbala. Wo ya a ma fanan, a kilanta Mansa Akisi la.

¹³ Mɔgɔ-ba wonu ba anu gbɛrɛn a ma tumɛ min, a ni a nyɛrɛ ma yuwɛ la. Anu ba a bira tuma-wo-tuma, a ni tarɛ dɛ manyɛgan. A si to a namanama-yi layigila a buyɛ ma bɔlɔlɔ!

¹⁴ Anu tara a la Mansa Akisi wara tumɛ min, wo ya a fɔ ala mɔgɔ-banu ye ko, “Wo ni kei kɛ mafɛlɛn. Wo ye nala mɔgɔ-sufa kɛ la n bara yan nfenna? Yuwɛ le kɛ la.

¹⁵ Yuwa sa nde bolo yan fɔ wo ye nala min na kɛ la? Nfenna wo ye nala kɛ la nde wara yan ka n yakɔrɔ-mamɔ nna bɔn la?”