Biblia Todo Logo
Bìoball air-loidhne

- Sanasan -

1 Samuwɛli 19 - ALLALA KUMƐ


A Lagbɛlɛya-Koe Dawuda Kuma Mansa Sɔli Bolo

1 Wo kɔma, Mansa Sɔli ya a fɔ ala mɔgɔ-banu anubɛ ala den Yonatan ye ko Dawuda faga-sɔgɛ ye a la. Kɔnɔ Dawuda di Yonatan ye dɔgɔma-ma-de!

2 Woletɔ a tara a fɔ Dawuda ye ko, “N fa ye fɛrɛ nyinina ile faga-koe ma. Woletɔ i yandi, sina sɔgɔma, i ni a ma i fɛrɛma. I ni ta i dogon kan tinɛ do rɔ, mɔgɔ ti i yen kan min. I ni to nyɔ rɔ fɔlɔn.

3 N si ta n sɔ n fa dafɛ gbɛkole ma i dogonnɛ kan min bara la. N si i wara-koe fɔ a ye. Ni a ya fenfen fɔ n ye, n si wo fɔ i ye.”

4 Wo wulun sɔgɔma, anubɛ a fa sɔra gbɛkole ma min kɛ, Yonatan ya Dawuda matɔgɔ a fa ye nyɔ ka a tanto. A ko, “N fa, i yandi, i kana ko-yogoma ma ila kɛlɛ-den-kunyɛ Dawuda la. Lun-kelen-bɛrɛn, a ma ko-yogoma ma i la, ado nfan, a ara koe min bɛɛsi kɛ, wonu bara i dɛnbɛ.

5 A ya a niyi fili ka Kolati faga. Mari ya nɔlɛ di Isirɛla mɔgɛnu ma wo wati rɔ. Ile nyɛrɛ ya wo yen tumɛ min, i sewara. Nfenna worɔ, a sɔgɛ ye i la, i ni baga Dawuda ma fufafu, ado ale ma ko tinya i ma?”

6 Yonatanna kumɛ wo marɛ ya Mansa Sɔli bira. A ya lanyiri kiri ko, “N bara n keli Mari la, n ti Dawuda faga.”

7 Yonatan ya kumɛ wo bɛɛ rakaran Dawuda ye. Wo kɔma, Yonatan nara Dawuda la Mansa Sɔli warɛ. A tora wɔlila mansɛ ye iko a duruta wɔlila a ye nya min nun.

8 Kɛlɛ buira Isirɛla mɔgɛnu anubɛ Filisitinu tɛma tun. Dawuda tara bui anu ma fugbu, ka anu nɔ! Filisitinu ya anu buri.

9 Lunyɛ do, Mansa Sɔli siginɛ ala bɔn la, Mari ya nyinɛ lawuli a la tun. Tanbɛ ye a bole tɔ. Dawuda fanan bi sɔrɔn fɔla a ye nyɔ.

10 Mansa Sɔli ya tanbɛ fili Dawuda ma alako ka a gbangban dandan ma kɔnɔ Dawuda ya a bɔ tanbɛ wo kɔrɔ ka a buri. Tanbɛ wo gbangbannɛ tora dandan ma.

11 Wulɔn suyi rɔ, ale Mansa Sɔli ya keminɛ donu nata Dawudala bon makandan tinɛ alako a wa bɔ sɔgɔma, anu ni a bira ka a faga. Ale Dawudala musi Mikali ya a makawandi, a ko, “Ni i ma i bɔ yan bi suyi kɛ rɔ, sina sɔgɔma, fɔ anu ba i faga.”

12 Ala musi wo ya a labɔ wundan la ka a layigi alako a ni a buri tala.

13 Ala musi ya anuna bɛsɛ bi min bi anu bolo bɔn wo la ka wo sa a gbɛ rɔ sa-fan rɔ. A ya baa-siyi bi ka wo sa bɛsɛ wo kunyɛ wara la ka kurɛ burun bɛsɛ wo ma.

14 Mansa Sɔlila mɔgɛ wonu nanɛ Dawuda bira tinɛ, Mikali ya a fɔ wonu ye ko, “Nna kei ma kɛndɛ.”

15 Anu tara wo fɔ Mansa Sɔli ye tumɛ min, Mansa Sɔli ya a fɔ wonu ye ko, “Wo ta. Wo ni a yen wo nyɛrɛ yɛ la. Wo kɔma, wo si anubɛ ala sofa bi. Wo ni na anu na n ma, n ni a faga.”

16 Kɔnɔ Mansa Sɔlila mɔgɛ wonu donnɛ bɔn la, yaga, anu ya bɛsɛ le sanɛ taran Dawudala sofa rɔ. Baa-siyi sanɛ wo kunyɛ wara la.

17 Mansa Sɔli ya a yen min kɛ ko a ma Dawuda lasɔrɔn, a ya ala dunmusi manyinika ko, “Nfenna i wara n yanfa ha n yoge ara a buri n kɔrɔ?” Ala dunmusi ya a fɔ a ye ko, “Nna kei ko ni n ma a dɛnbɛ wo nya, a si n faga.”

18 Dawuda ya a buri ka ta Samuwɛli taran Rema soe burɔ. Mansa Sɔli ya min bɛɛsi sigi a la, a ya wonu takaran a ye. A ban wo fɔla, Samuwɛli tara nɛbinuna karan tinɛ Rema soe tɔnkɔn do rɔ min tɔgɛ Neyɔti. Anu tora sigini nyɔ.

19 Mansa Sɔli ya a lamɔɛn tumɛ min ko Dawuda ye Samuwɛli fɛ nɛbinuna karan tinɛ Neyɔti Rema soe burɔ,

20 a ya mɔgɛ donu boloka ko wonu ni ta Dawuda bira nyɔ. Wonu bi kela nyɔ tumɛ min, anu ya a taran, Samuwɛli anubɛ ala karan-dannu bi dɔn-kɛ anubɛ wɔlɔyiya-kuma-fɔɛ kun na. Tiriyante wo rɔ, Marita sɛnbɛ yigira Mansa Sɔlita mɔgɛ wonu kuma, anu fanan donta dɔn-kɛ anubɛ wɔlɔyiya-kuma-fɔɛ rɔ.

21 Mansa Sɔli ya wo fanan namɔɛn min kɛ, a ya mɔgɔ-gbɛrɛkɛnu nata tun Dawuda bira tinɛ nyɔ. Wonu fanan ke nyɔ rɔ, anu donta dɔn-kɛ anubɛ wɔlɔyiya-kuma-fɔɛ rɔ. Kilayɛ sawa nyɔgɛnu fanan natanɛ nyɔ rɔ, wonu fanan tara don dɔn-kɛ anubɛ wɔlɔyiya-kuma-fɔɛ rɔ.

22 Wo kɔma, ale Mansa Sɔli nyɛrɛ wulita Dawuda bira kan ma. A ke kɔlon-wɛ do ma min bi Seko soe burɔ, a ya Samuwɛli anubɛ Dawuda manyinika mɔgɛnu na nyɔ. Seko so-burɔ-mɔgɛnu ya a fɔ a ye ko anu bi Rema soe tɔnkɔn do rɔ min tɔgɛ Neyɔti.

23 Ale fanan bi gbɛrɛnna Rema soe ma tumɛ min, Allata sɛnbɛ yigira ale fanan kuma. A ya dɔn-kɛ anubɛ wɔlɔyiya-kuma-fɔɛ dabira, ha a tara ke Neyɔti.

24 A ya a gbu-makolonya ka dɔn-kɛ anubɛ wɔlɔyiya-kuma-fɔɛ dabira Samuwɛli yakɔrɔ. A gbu-makolɔn sani tora, tele kelen, su kelen. (Woletɔ mɔgɛnu tora a fɔla Mansa Sɔli ma ko, “Sɔli le fanan kofunɛ nɛbinu ma kɛ la?”)

Kuranko Common Language Bible © The Bible Society in Sierra Leone, 2006.

Bible Society in Sierra Leone
Lean sinn:



Sanasan