1 Samuwɛli 18 - ALLALA KUMƐ

¹ Mansa Sɔli anubɛ Dawuda ban kirabɔɛ wo la, Mansa Sɔlila den Yonatan anubɛ Dawuda diyara kɔikɔi! Dawuda di Yonatan ye iko a nyɛrɛ di a ye nya min.

² Wo le ya a to, ka a bi wo wati ma, Mansa Sɔli ya Dawuda lamara ka a don a dunɛ kɔrɔ, ado a ma sɔn tun Dawuda ni sɛgi a fa warɛ.

³ Dawuda di Yonatan ye min kɛ, Yonatan ya lanyiri kiri a ye.

⁴ Ale ye duruki min donna a kan na, a ya wo di Dawuda ma. Wo kɔma, a ya ala kɛlɛ-kɛ-duruki anubɛ ala kɛlɛ-kɛ-faan anubɛ ala kalabɛn anubɛ ala tɛ-kiri-fan di a ma fanan.

⁵ Mansa Sɔli ya Dawuda sɔ ko-wo-ko la, a si wo ma a kilɛ fɛ. Woletɔ Mansa Sɔli ya kun-tigiyɛ di a ma kɛlɛ-dannu tɛma. Ala kun-tigiya-sɔrɔn wo diyara Mansa Sɔlila kɛlɛ-dannubɛ ala mɔgɔ-banu ye.

Dawuda Makeliya-Koe Mansa Sɔli Bolo

⁶ Dawuda ban Kolati fagala, kɛlɛ-dannu bi tala soe burɔ, anu kera so-wo-so ma, nyɔ-musinu si bɔ ka Mansa Sɔli labɛn. Anu si dundunnɛnu anubɛ sɔrɔnnu kɛ a rɔ ka anu dɔn. Anu si sigi sa ka a fɔ ko,

⁷ “Sɔli ara mɔgɔ waga siyaman faga kɔnɔ Dawuda ara mɔgɔ waga tan siyamɛ faga.”

⁸ Sigi wo dumara Mansa Sɔli la bawo musinu bi Dawuda matɔgɔla ka a fɔ ko ale Sɔli ara mɔgɔ siyaman faga kɔnɔ a ma ke Dawudatɛ rɔ. A ye a mirila fanan ko tumado anu bi nala Dawuda mala le mansɛ la ale kɔma.

⁹ Ka a bi wo wati ma, Dawudala keliyɛ donta Mansa Sɔli yisi rɔ.

¹⁰ Wo wulun sɔgɔma, Alla ya nyinɛ lawuli ale Mansa Sɔli la tun. A donta wɔrɔnde rɔ a nyɛrɛ warɛ bɔn la iko yuwɛ. Wo wati ya a taran, Dawuda ye ala sɔrɔn-fɔɛ la iko a duruta a mala nya min. Wo ya a taran, tanbɛ ye Mansa Sɔli bole tɔ.

¹¹ Mansa Sɔli ya a miri a yisi rɔ ko a si Dawuda gbangban dandan ma ala tanbɛ wo la. A ya tanbɛ lakɛ Dawuda ma iko fila kɔnɔ hali wo, Dawuda ya a bɔ wonu kɔrɔ.

¹² Mansa Sɔli kɛnɛna kilanna Dawuda la bawo a ya a lɔn ko Marita sɛnbɛ sa ale fɛ tun fɔ Dawuda.

¹³ Woletɔ Mansa Sɔli ya Dawuda sigi kɛlɛ-dan mɔgɔ waga kelen kun na ka a bɔ a dafɛ. Dawuda sɔra ala kɛlɛ-dannu yarɔ ka ta kɛlɛ rɔ.

¹⁴ A ya kɛlɛ min bɛɛsi kɛ, a ya nɔ-ko sɔrɔn bawo Mari ye a fɛ.

¹⁵ Mansa Sɔli ya Dawuda yen nɔ-ko sɔrɔnna kɛlɛ rɔ nya min, a kilanta a la dɔgɔma-ma-de!

¹⁶ Dawuda wara-koe diyara Isirɛla mɔgɛnu anubɛ Yuda nyamanita-mɔgɛnu ye bawo a ye tola nɔ-ko sɔrɔnna kɛlɛ rɔ.

Mansa Sɔlila Dunmusi Di-Koe Dawuda Ma

¹⁷ Mansa Sɔli ya a fɔ Dawuda ye ko, “Ni i ya i kerinteya ka Marita kɛlɛ kɛ n ye, n si nna dunmusu-sirɛ di i ma min tɔgɛ Mɛrabu.” (Sɔli ya kɛ ma bawo a ma di a ye ale ni Dawuda faga fɔ Filisitinu.)

¹⁸ Dawuda ya a fɔ Mansa Sɔli ye ko, “Malebɛ n kebilɛ si ke donna mansa-bɔn la ka ma i biran-kei la, wa?”

¹⁹ Kɔnɔ Mɛrabu don-wati kenɛ Dawuda bolo, anu ya furi wo mayɛlɛma ka a di kei-gbɛrɛkɛ ma min tɔgɛ Adiriyɛli. Mɛhola kɛ le wo la.

²⁰ Kɔnɔ Mansa Sɔlila dunmusi do ye nyɔ min tɔgɛ Mikali, Dawuda di wo ye bɛrɛkɛ! Mansa Sɔli ya wo lɔn tumɛ min, wo mara sewa-koe la a bolo.

²¹ Mansa Sɔli ya a miri a yisi rɔ ko, “N si ke le Mikali fanan dila Dawuda ma. Wo si ma gbɛrɛ la a ye alako Filisitinu ni a faga.” Mansa Sɔli ya a fɔ Dawuda ye tun ko, “I si ma n biran-kei la gbɛ!”

²² Mansɛ ya ala mɔgɔ-banu natuntun alako anu ni ta kuma Dawuda la gbundi rɔ dunmusi wo furu-koe rɔ. A sɔgɛ ye a la ko anu ni a fɔ Dawuda ye ko ale di mansɛ ye, ado a di mɔgɔ-banu fanan ye alako anu ni a fɔ a ye fanan ko, “Wati-nyimɛ le kɛ la i bolo ka mansɛla dunmusi furu.”

²³ Anu ya kɛ dama fɔ Dawuda ye tumɛ min, wo ya a fɔ anu ye ko, “Gbiliya-su kɛ kolo nde bolo-kolon-mayɛlɛnnɛ bolo ka ma mansɛ biran-kei la.”

²⁴ Mɔgɔ-ba wonu ya Dawuda kuman-kan wo rakaran mansɛ ye.

²⁵ Woletɔ mansɛ ya a fɔ anu ye ko anu ni ta a fɔ Dawuda ye ko, “N bi nyinina min ma ale bolo ka nna dunmusi furu a la, wo le, a ni ta Filisiti mɔgɔ kɛmɛ faga ka anu nakemininya. A ni na wonu sogo-kundinu na n ma. Wo si ma n tayili-sara la Filisitinu bara la.” (Mansɛ ye kɛ dama mala le alako Filisitinu ni Dawuda faga.)

²⁶ Mɔgɔ-ba wonu ya kɛ rakaran Dawuda ye tumɛ min, a sewara ka ma mansɛ biran-kei la. Yanni ala kɔnyɔ-masɔ-tele ni ke,

²⁷ Dawuda anubɛ ala kɛlɛ-dannu tara Filisiti mɔgɔ kɛmɛ fila faga ka anu nakemininya. Dawuda nara wonu sogo-kundinu na ale mansɛ ma ka wonu dan mansɛ yala nyɔ alako a ni ma mansɛ biran-kei la. Woletɔ Mansa Sɔli ya ala dunmusi Mikali di Dawuda ma.

²⁸ Wo ya a ma, Mansa Sɔli ya a lɔn yati, ko Mari ye Dawuda fɛ, ado a di ala dunmusi ye.

²⁹ Woletɔ a kilanta Dawuda la ka a dan-natenbi, ado a ya Dawuda ma a yoge la a siyi-tele-bɛɛ kɔrɔ.

³⁰ Dawuda anubɛ Filisitinu ya kɛlɛ min bɛɛsi kɛ, Dawuda ya nɔ-ko sɔrɔn Filisitinu ma ka tenbi Mansa Sɔlila kɛlɛ-den-kun-tigi doinu na. Woletɔ Dawuda tɔgɛ bɔra bɛrɛkɛ!