1 Samuwɛli 16 - ALLALA KUMƐ

Dawuda Ma-Koe Mansɛ La

¹ Mari ya a fɔ Samuwɛli ye ko, “Ile yisi-tinyanɛ si to Sɔlila ko la ha tumɛ nyamintan? N bara n ban ala mansayɛ ma nun Isirɛla kun na. Dantɛgɛ-tuli do bi. I ni ta a la i bolo Bɛtalehɛm. I si kei do taran nyɔ min tɔgɛ Yɛsi. N bara ala dan do yabɔ ko a ni ma mansɛ la.”

² Samuwɛli ya a fɔ Mari ye ko, “N si ta nyɔ kama? Ni Mansa Sɔli ya wo lamɔɛn, a ti n faga?” Mari ya a fɔ ko, “Ninki-dan bi. I ni a fɔ a ye ko i ye tala nyɔ ka sarakɛ bɔ nde, Mari ye.

³ I wa ke nyɔ tumɛ min, i ni Yɛsi kele ila saraka-bɔɛ kuma. Ile si min ma nyɔ, nde si wo fɔ i ye. N ba mɔgɛ min yira i la nyɔ, ile si wo dantɛgɛ ka a ma mansɛ la.”

⁴ Samuwɛli ya a ma iko Mari ya a fɔ a ye nya min. A tara Bɛtalehɛm. A ke nyɔ rɔ, so-burɔ-mɔgɔ-banu nara a taran. Anu bi yɛrɛyɛrɛnna kilan bolo. Anu ya a manyinika, anu ko, “I ma na a yogoma la?”

⁵ Samuwɛli ya a fɔ ko, “Ade, n nara le dɔrɔn ka sarakɛ bɔ Mari ye. Wo ni wo nyɛrɛ sɛninya iko tɔn ya a fɔ nya min. Wo ni bila n fɛ.” A ya a fɔ Yɛsi anubɛ ala dannu ye wo nya na le fanan ka anu kele saraka-bɔɛ kuma.

⁶ Anu ke saraka-bɔ-tinɛ nyɔ, Samuwɛli ya Yɛsila sarɛ yen min tɔgɛ Ɛliyabu. Samuwɛli miri nun ko keminɛ min sɔnɛ Mari yakɔrɔ wo la, wo le ye mala mansɛ la.

⁷ Mari ya a fɔ a ye ko, “I hɛnkili kana na buri mɔgɔla kinyɛ anubɛ ala yanyɛ fɛ. N sa nyinina keminɛ kɛ ma. Hadama-dan si mɔgɛ yen nya min, nde, Mari ti mɔgɛ yen wo nya. Hadama-dan yɛ ye mɔgɔ fɛrɛ-bɔnkɛ le la kɔnɔ nde, Mari yɛ ye mɔgɔ-burɛ le la.”

⁸ Yɛsi ya ala den Abinadabu fanan yira Samuwɛli la kɔnɔ Samuwɛli ya a fɔ ko, “Mari ma sɔn wo fanan na.”

⁹ Yɛsi ya ala den Sama fanan yira a la. Kɔnɔ Samuwɛli ya a fɔ tun ko, “Mari ma sɔn kɛ fanan na.”

¹⁰ Yɛsi ya ala den-kei wɔrɔnfilɛ yira Samuwɛli la kelen-kelenyɛ ma wo nya na le. Samuwɛli ya a fɔ ko, “Ade, Mari ma sɔn kɛ do-wo-do la.”

¹¹ Samuwɛli ya Yɛsi manyinika, a ko, “Den-kei-gbɛrɛkɛ sa i bolo kɛnu kɔma?” Yɛsi ya a fɔ ko, “Anu dɔgɛ ye nyɔ rɔ kɔnɔ wo ye sagɛnu fɛ binyɛ rɔ.” Samuwɛli ya a fɔ a ye ko, “Awa, a kele de! Ma ti sarakɛ bɔ fɔ a wa na fɔlɔn.”

¹² A fa ya mɔgɛ lata a kele tinɛ. A nara min kɛ, anu ya a yen, yaga, kemini-hakikɛ le. A tɔgɛ le Dawuda. Mari ya a fɔ Samuwɛli ye ko, “Nba, ale le kɛ la, yɔ! Dantɛgɛ-tuli kɛ a kunyɛ rɔ. Ale le si na ma mansɛ la.”

¹³ Samuwɛli ya dantɛgɛ-tuli wo bi ka a kɛ Dawuda kunyɛ rɔ a kɔrɔnu yala. Tiriyante wo rɔ, Marita sɛnbɛ yigira Dawuda kuma. A tora Dawuda fɛ wo nya na le burubukai! Wo kɔma, Samuwɛli sɛgira a kɔma Rema soe burɔ.

Dawuda Sigi-Koe Mansa Sɔli Fɛ

¹⁴ Marita sɛnbɛ bɔra Mansa Sɔli fɛ. Mari ya nyinɛ lawuli Mansa Sɔli la, a tɔrɔ-koe la.

¹⁵ Mansa Sɔlila wɔli-kɛlɛnu ya a fɔ a ye ko, “Ma ya a lɔn ko Alla ara nyinɛ lawuli i la min si i tɔrɔ.

¹⁶ A sɔgɛ ye ma la, ma ni sɔrɔn-fɔlɛ do nyini i ye. Woletɔ ni nyinɛ wo wulita i la tuma-wo-tuma, wo si sɔrɔn fɔ i ye. Nyinɛ si i boloka. Min bi ile ma tun ka a fɔ ma ye ko, ‘Wo ta sɔrɔn-fɔlɛ nyini.’ ”

¹⁷ Mansa Sɔli ya a fɔ ala wɔli-kɛlɛnu ye ko, “Wo ta sɔrɔn-fɔlɛ do nyini min kusan.”

¹⁸ Ala wɔli-kɛlɛ do ya a fɔ ko, “Kei do ye Bɛtalehɛm soe burɔ. A tɔgɛ le Yɛsi. Ala dan do ye nyɔ, wo kusan sɔrɔn fɔla dɔgɔma-ma-de! A kerinte. Kɛlɛ-kurugbɛ le, ado a kusan kumala fanan. A mafɛlɛn di. Mari fanan bi a fɛ.”

¹⁹ Mansa Sɔli ya kilayɛnu nata Yɛsi ma ko a ni ala den Dawuda lana a ma min bi ala sagɛnu kandanna.

²⁰ Yɛsi ye Dawuda latala Mansa Sɔli ma tumɛ min, a ya Mansa Sɔli sanbɛnu nata, baa-bulun kelen anubɛ sofɛli-dunu kelen biredi la anubɛ nɔnbɔ-gbɔ-yi gbolo-bɔrɔ kelen.

²¹ Dawuda kera Mansa Sɔli ma tumɛ min, a ya ala wɔlɛ dabira. A wara-koe diyara Mansa Sɔli ye. Wo ya a ma ala kɛlɛ-miran-madununɛ la.

²² Wo kɔma, Mansa Sɔli ya kilayɛ lata Yɛsi ma, a ko, “Ila den Dawuda kɛ di n ye. A sɔgɛ ye n na, a ni to wɔlila n ye.”

²³ Ka a dabira wo wati ma gbɛ, Alla wa nyinɛ lawuli Mansa Sɔli la tuma-wo-tuma, Dawuda si ala sɔrɔn fɔ a ye. Nyinɛ wo si bɔ a fɛ. A ma ni fisaya.