1 Samuwɛli 13 - ALLALA KUMƐ

Mansa Sɔlila Saraka-Bɔ-Koe Kilan Bolo

¹ Kɛ wati ya a taran, Mansa Sɔli ara san kelen bɔ mansayɛ la. A san fila nyɔgɛ ma,

² Mansa Sɔli ya kɛlɛ-den waga sawa (3,000) bi ka bɔ Isirɛla mɔgɛnu tɛma. A ya a mɔgɛ toenu nasɛgi anu barɛnu tɔ. Ale ya kɛlɛ-dannu wo waga fila (2,000) bi. Wonu tora ale fɛ Mikimasi soe burɔ anubɛ kɔnkɔ-nyamanɛ rɔ Bɛtɛli soe dafɛ. A ya a to waga kelen (1,000) bila ala den Yonatan fɛ. Wonu tara Kibiya soe burɔ Bɛnyamɛta nyamanɛ rɔ.

³ Yonatan tara bui Filisitinu ma Kibiya dagɛ rɔ. Filisiti doinu ya kumɛ kɛ lamɔɛn tumɛ min, Mansa Sɔli ya kɛlɛ-kɛ buru-fɛlɛnu nata Isirɛla nyamanɛ rɔ alako Hiburu damasi ni na kɛlɛ-kɛ-tinɛ.

⁴ Isirɛla mɔgɛ damasi ya a lamɔɛn ko Mansa Sɔli ara bui Filisitinu ma, ado anu ya a lamɔɛn fanan ko Isirɛla mɔgɛnu gboyanɛ Filisitinu ye lass! Isirɛla mɔgɛ bɛɛ kofura Mansa Sɔli ma Kiligali kɛlɛ rɔ.

⁵ Filisitinu fanan ya anu nadɛn Isirɛla mɔgɛnu kan ma. Kirindi waga sawa (3,000) ye anu bolo anubɛ so-laburila mɔgɔ waga wɔrɔ (6,000). Kɛlɛ-dan minnu bi tala anu kian la, wonu siya iko ba-kɛnkɛn. Anu tara anu daga makɛ Mikimasi don-dɛ la min bi Bɛti-Efɛn tele-bɔɛ wara la.

⁶ Anu tara bui Isirɛla mɔgɛnu ma ka a lagbɛlɛya anu kuma ha Isirɛla mɔgɛ donu ya anu dogon farannu na anubɛ farɛnu tɛma anubɛ kɔlon-tagbalanɛnu tɔ.

⁷ Donu ya anu buri ka Yorodan bɛ tɛgɛ ka ta Kaliyadi nyamanɛ rɔ anubɛ Kadi bɔnsɔnta nyamanɛ rɔ. Kɔnɔ Mansa Sɔli tora Kiligali. Ala kɛlɛ-dan minnu bi a fɛ, wonu bi yɛrɛyɛrɛnna kilan bolo.

⁸ Tele wɔrɔnfila, a ye Samuwɛli makɔnɔna iko wo ya a fɔ a ye nya min nun. Kɔnɔ ha wati wo kera, Samuwɛli ma na Kiligali. Mansa Sɔlila kɛlɛ-dannu wulita nyɛnsɛnna a ma.

⁹ Woletɔ Mansa Sɔli ya a fɔ anu ye ko, “Wo na saraka-mintantɛ anubɛ yisi-kima-sarakɛnu na n ye.” A ya saraka-mintantɛ wo mintan.

¹⁰ A ban sarakɛ wo bɔla kawo, Samuwɛli kera. Mansa Sɔli tara a labɛn tinɛ.

¹¹ Kɔnɔ Samuwɛli ya a fɔ a ye ko, “I wara nfen ma kɛ la?” Mansa Sɔli ya a fɔ a ye ko, “Mɔgɛnu ta ara nyɛnsɛn n ma, ado i ya a fɔ le ko i ye nala. Kɔnɔ i ma na ila lɔgɔ-sanɛ kɔrɔ ha Filisitinu nadɛnta n kan ma Mikimasi.

¹² N ya a lɔn nun ko Filisitinu bi nala buila le n ma Kiligali yan. N ma ko-wo-ko ma min si a ma, n ni diya Mari ye, wo le ya a to, n ya n miri, n ko fɔ n ni sarakɛ bɔ Mari ye.”

¹³ Samuwɛli ya a fɔ a ye ko, “I wara yuwaya-koe le ma wo la. Ita Mari Alla ya tɔn minnu di i ma, i ma sɔn wonu bira-koe ma. Ni i ya a sako le kɛ nun, a si a ma, wobɛ i kegeyɛnu ni to mansayɛ la Isirɛla kun na burubukai!

¹⁴ Kɔnɔ kaka, ila mansayɛ kɛ ti a laban. Bawo ile ma sɔn Marita tɔnnu birala, Mari si mɔgɛ do nyini min si ale sako kɛ koe bɛɛ rɔ. A si mɔgɛ wo to ile gbɛ rɔ mansayɛ la Isirɛla mɔgɛnu kun na.”

Kɛlɛ-Kɛ-Fen Dasa-Koe Isirɛla Mɔgɛnu Bolo

¹⁵ Samuwɛli bɔra Kiligali soe burɔ. A tara. A mɔgɛ toenu bilara Mansa Sɔli fɛ ka ta kofu ala kɛlɛ-dannu ma. Anu bɔra Kiligali soe burɔ ka ta Kibiya soe min bi Bɛnyamɛ bɔnsɔnta nyamanɛ rɔ. Mansa Sɔli ya ala kɛlɛ-dannu dan tumɛ min, anu yatɛ bɛnta mɔgɔ kɛmɛ wɔrɔ (600) nyɔgɔn ma.

¹⁶ Mansa Sɔli anubɛ ala den Yonatan anubɛ anuna kɛlɛ-dannu ya anu daga makɛ Kiba soe dafɛ Bɛnyamɛ bɔnsɔnta nyamanɛ rɔ. Wo ya a taran, Filisitinu daga makɛnɛ Mikimasi soe dafɛ.

¹⁷ Filisiti kɛlɛ-dannu ya anu tafara sigi tina sawa la ka ta bui Isirɛla mɔgɛnuna soenu ma. Ɔfara soe min bi Suwali nyamanɛ rɔ, sigi tina kelen tara nyɔ wara la.

¹⁸ Sigi tina kelan doi tara Bɛti-Hɔrɔn soe wara la. Sigi tina kelan toe tara furr, fɔɔ Filisitinuna dan la min bi a yɛ layigila Sebom lɛɛ ma wulɛ dafɛ.

¹⁹ Wo wati ya a taran, nunaka mumɛ fenfen sa Isirɛla mɔgɛnu tɛma bawo a ma di Filisitinu ye Hiburunu ni kɛlɛ-kɛ-fen sɔrɔn.

²⁰ (Ni a sɔgɛ ye Isirɛla mɔgɛnu na anu ni anuna nɛgɛ-kundinu natugu, fɔ anu ba ta Filisitinu bara.

²¹ Anu si wodi-gbɛ-gbuni kelen bɔ ka wo di anu ma anuna tɛgɛran-natugu-sarɛ la. Hali ka anuna sara-ninki-lagbengben-fannu nasulen, anu si wodi-gbɛ-gbuni kelen bɔ. Anu si wodi-gbui wo nyɔgɔn fila bɔ ka wo ma anuna sara dɛɛ anubɛ anuna tɛgɛrannu-natugu-sarɛ la.)

²² Anu bi tala kɛlɛ rɔ tumɛ min, faan sa anu bolo, hali tanbɛ fɔ Mansa Sɔli anubɛ ala den Yonatan dɔrɔn.

Filisitinu Kɛlɛ-Koe Yonatan Bolo

²³ Filisitinu ya kɛlɛ-den-kurɔn donu nata nyɔ ka kɔnkɔ-gbɛran-don-dɛ makandan Mikimasi soe dafɛ.