1 Samuwɛli 12 - ALLALA KUMƐ

Samuwɛli Masara-Koe Mɔgɛnu Ye

¹ Samuwɛli ya a fɔ Isirɛla mɔgɛnu ye ko, “N bara wola kuman-kan latɔnbagaya. Wo ya n manyinika mansɛ min bara-koe ma, n bara wo nyini wo ye.

² Kaka, wo ara wola mansɛ sɔrɔn, ado nde don bara kɔrɔya. N kunyɛ fanan bara gbɛ. I ma nna den-keminɛnu yen? Ka a bi n dennɛ ma ha ka a sigi kaka la, n bi wola kun-tigiyɛ la.

³ Wo ma n sɔnɛ yen kɛ la? Ni n bara ko-yogomɛ ma min na wo tɛma, wo tigi ni a sɔ n tɔ Mari anubɛ ala mansa-yabɔnɛ yakɔrɔ yan tɔ. Ni n bara mɔgɛ minna ninki bi a bolo, ni wo ma, ala sofɛlɛ, wo tigi ni a sɔ n tɔ yan tɔ. Ni n bara min kensunya, ni n bara min tɔrɔ ka a kɔndɔfili, ni n bara dogonta-fan bira min bolo, ni n bara kɛ sufa ma mɔgɔ-wo-mɔgɔ la wo tɛma, wo tigi ni a sɔ n tɔ. Ni n ya min bi wo tigi bolo, n si a lasɛgi wo ma tun.”

⁴ Nyama ya a lasɔnkɔ, anu ko, “Ade, i ma ma kensunya wɛ, hali ka ma tɔrɔ ha ma kɔndɔ ni fili. I ma fen bɔ wɛ ma fenfen bolo.”

⁵ Samuwɛli ya a fɔ anu ye ko, “Mari anubɛ ata mansa-yabɔnɛ ara ma sereyɛ la ma tɛma wona bi, ko wo ara n bara-koe fɛsɛfɛsɛ. Wo ma fɛɛ yen n na.” Anu denu fanan ya a fɔ ko, “Ɔn, Mari le ma sereyɛ la.”

⁶ Wo kɔma, Samuwɛli ya a fɔ anu ye tun ko, “Ale Mari kelen pe le ya Musa anubɛ Aruna yabɔ ka wo benbanu nabɔ Iyipiti nyamanɛ rɔ.

⁷ Wo ni wo sɔ Mari yakɔrɔ. A ara ko-makawanɛ minnu ma wobɛ wo benbanu ye nun, n ni sereyɛ wonu sa gbɛ ma wo ye ka anu takaran wo ye alako karan wo ni wo sɔn-yogomɛnu yira wo la.

⁸ “Ma benba Yakoba anubɛ ala denbayɛnu tara anu sigi Iyipiti tumɛ min, Iyipiti kɛnu tora anu tɔrɔ-belebele-wɛ kɛla ka anu kɔndɔfili. Wo benbanu tora dila Mari dala anu dɛnbɛn-koe la. A ya Musa anubɛ Aruna lata anu kunka tinɛ. Wonu denu bɔra wo benbanu na Iyipiti ka na anu na nyamanɛ kɛ rɔ yan.

⁹ Kɔnɔ hali wo, wo benbanu nyinara anuta Mari Alla ko. Woletɔ Mari ya a ma, Filisitinu wo, Mohabu mansɛ anubɛ ala mɔgɛnu wo, anubɛ Sisara min bi Hesɔ soe kɛlɛ-dannu kun na, wonu tara bui wo benbanu ma ka anu nɔ.

¹⁰ Wo kɔma, wo benbanu dira Mari dala. Anu ya a fɔ ko, ‘Ma ara hakɛ kɛ bawo ma ara ma kan-kɔ sɔ ile Mari la. Ma ara Beyali anubɛ Asitɔra bɛsɛnu kɔ.’ Anu ko, ‘I yandi, ma tanka ma yogenu ma. Ma ti fenfen bato fɔ ile Mari kelan.’

¹¹ Woletɔ Mari ya Bɛraki fɔlɔn ma wo kunkalɛ la, wo kɔma Kidiyɔn, wo kɔma Yɛfɛta. A laban le nde, Samuwɛli la min bara wole bɔ wo yogenu bolo alako wo la ni fɛrɛ.

¹² “Kɔnɔ wo ya Amon Mansa Nehasi yen nala wo kɛlɛla min kɛ, wo ya wo ban wota Marita mansayɛ ma. Wo ya a fɔ n ye ko, ‘Ma ye nyinina mata mansɛ ma min si to ma kun na.’ ”

¹³ Samuwɛli ya a fɔ anu ye tun ko, “Wo ma wola mansa-siginɛ yen? Wo ara a wara-koe manyinika, ado Mari ara a di wo ma.

¹⁴ Ni wo ya wo tole masɔ wota Mari Alla la ka a gbiliya ka ata tɔnnu bira ka ata wɔlɛ kɛ, wo wara-koe bɛɛ si ta a kilɛ fɛ. Ni wobɛ wola mansɛ ya Mari sako kɛ, ko-nyimɛ le wo la.

¹⁵ Kɔnɔ ni wo ma sɔn wo tole masɔla Mari la, wo ni wo ban ala tɔn birala, a si taran wobɛ wola mansɛ kan ma.

¹⁶ “Mari ye kabana-koe min mala wo yala, wo si wo yen wo nyɛrɛ yɛ la kaka.

¹⁷ Telemɛ le kɛ la kaka. Kɔnɔ hali wo, n si Mari madiya. Wo si bandɛ anubɛ san-gbalamɛ yen wo nyɛrɛ yɛ la kaka. Wo wa ma tumɛ min, wo ni a lɔn worɔ yati, ko wo ara hakɛ-belebele kɛ Mari la bawo wo ara a manyinika mansaya-koe la.”

¹⁸ Samuwɛli ya madiyali kɛ. Tele wo nyɛrɛ rɔ, Mari ya bandɛ anubɛ san-gbalamɛ layigi. Wo ya a ma, Isirɛla mɔgɛ damasi kilanta Mari anubɛ Samuwɛli la.

¹⁹ Anu ya a fɔ Samuwɛli ye ko, “N fa, i yandi. Ita Mari Alla madiya ma ye alako ma kana na faga. Ma ara hakɛ do sa mala hakɛnu kuma tun bawo ma ya a manyinika mansa-sɔrɔn-koe ma.”

²⁰ Samuwɛli ya a fɔ ko, “Wo kana kilan. Hali wo ara ko-yogoma-su kɛnu ma, wo kana wo kan-kɔ sɔ Mari la. Wo ni ata wɔlɛ kɛ wo yisi bɛɛ la.

²¹ Wo kana wo nyɛrɛ don bɛsi-kɔ-koenu tɔ. Wonu ti ke wo dɛnbɛna, hali ka wo lakisi bawo tonya sa anu bara-koe rɔ.

²² Mari ara lanyiri kiri wo ye a sɛbɛ la. A ko a ara ban a latɛgɛla ko ata mɔgɛ le wole la, ado a ti wo boloka.

²³ Kɔnɔ ni nde, Samuwɛli ya n ban Mari madiyala wo ye, wo si ma hakɛ la n bolo, ado Mari ni n tanka wo ma. Yanni n ni wo ma, n si wo karan tonyɛ anubɛ ko-latelennɛ ma.

²⁴ Wo ni Marila tɔnnu bira ka ata wɔlɛ kɛ wo yisi bɛɛ la. A ya ko-makawanɛ minnu ma wo ye nun, wo ni wo miri wonu ma.

²⁵ Kɔnɔ ni wole tora hakɛ kɛla, wobɛ wola mansɛ la si to dogbe!”