1 Samuwɛli 11 - ALLALA KUMƐ

Amonnu Kɛlɛ-Koe Mansa Sɔli Bolo

¹ Wo kɔma, Amon Mansa Nehasi tara ala kɛlɛ-dannu na Isirɛla mɔgɛnu kan ma minnu bi Yebɛsi soe burɔ Kaliyadi sigisɔn rɔ. Yebɛsi so-burɔ-mɔgɛnu ya a fɔ Mansa Nehasi ye ko, “Ma ni to kan kelen tɔ. Ile ni ma mata mansɛ la alako i kana na ma kɛlɛ.”

² Nehasi ya a fɔ anu ye ko, “N si sɔn kɔnɔ ko kelen bi nyɔ, ni wo sɔnta wo ma, ma ti wo kɛlɛ, wo le, ka wo damasi bolo-nyimama-yɛnu tii. Wo si ma wole Isirɛla mɔgɛnuna miliya-koe la.”

³ Mɔgɔ-ba minnu bi Yebɛsi soe burɔ, wonu ya a fɔ ko, “Wo ni a rabira ha tele wɔrɔnfila kɔrɔ. Ma ni kilayɛ lata ma na-kelen-nyɔgɛnu ma Isirɛla nyamanɛ damasi rɔ. Ni anu do-wo-do ma sɔn nala ma dɛnbɛna, ma si ma nyɛrɛ latenbi wo ma.”

⁴ Anuna kilayɛ kera Kibiya soe burɔ Mansa Sɔli ye kan min. Anu ya nimisa-koe wo rakaran anu ye min kɛ, mɔgɔ damasi donta diyi-kɛ rɔ.

⁵ Wo ya a taran, Mansa Sɔli anubɛ ala sara-ninkinu bi nala ka bɔ sɛnɛ rɔ. A ya nyinikalɛ sa, a ko, “Nfenna mɔgɛnu bi dila?” Anu ya kilayɛ wo lakɛ ale fanan ma.

⁶ Ale Mansa Sɔli ya kumɛ wo lamɔɛn min kɛ, Allata Sɛnbɛ yigira a kuma. A yisi bɔra dɔgɔma-ma-de!

⁷ A ya sara-ninki fila bi ka wonu tatɛgɛtɛgɛ. A ya ninki-sogo-kundi wonu bi ka wonu don kilayɛnu bolo ka anu nata anu na-kelen-nyɔgɛnu ma Isirɛla nyamanɛ wo kan tinɛ bɛɛ rɔ. A ya kumɛ sa sogo-kundi wonu kuma ko, “Ni mɔgɛ min ma ta nde, Mansa Sɔli anubɛ Samuwɛli fɛ, ma si wo tigita sara-ninki ratɛgɛtɛgɛ iko sara-ninki kɛ ratɛgɛtɛgɛnɛ nya min.” Anu ya anu kundɛn kan-tina-kelen bawo anu kilannɛ Mari la.

⁸ Mansa Sɔli ya anu kundɛn Bɛsɛki soe burɔ. A ya Isirɛla mɔgɔ damasi dan tumɛ min, mɔgɔ waga kɛmɛ sawa (300,000) bɔra Isirɛla nyamanɛ rɔ. Mɔgɔ waga bi-sawa (30,000) bɔra Yuda bɔnsɔn rɔ ka kofu anu ma.

⁹ Anu ya anu sara kilayɛ wonu na tun ko, “Wo ta a fɔ Yebɛsi kɛnu ye ko yanni sina tele-latelen-wati, anu kun bara ka.” Kilayɛ wo lakera anu ma tumɛ min, anu damasi nyagalenta.

¹⁰ Yebɛsi kɛ wonu fanan ya a fɔ Amon mansɛ wo ye ko, “Ma si dɛgɛ min wo ye sina. Ko-wo-ko diyara wo ye, wo ni wo ma ma la.”

¹¹ Wo wulɔn suyi rɔ, Mansa Sɔli ya kɛlɛ-dannu tafara sigi tina sawa la. Banda-ka-da-pinpi ma, anu tara kɛ Amonnu ma anuna dagɛ rɔ. Anu tora anu kɛlɛla ka anu siyaman faga ha tele-latelan. Kɔnɔ Amon toe minnu tora, wonu ma ta anu nyɔgɔnna kila fɛ. Anu tanyɛnsɛnta.

¹² Kɛlɛ wo kanɛ a la, Isirɛla mɔgɛnu ya a fɔ Samuwɛli ye ko, “Mɔgɛ minnu sa nyinina Sɔlila mansayɛ ma, wonu yira ma la. Ma ni anu faga.”

¹³ Kɔnɔ Mansa Sɔli ya a fɔ anu ye ko, “Wo kana mɔgɛ faga bi bawo Mari ara Isirɛla mɔgɛnu natanka bi.”

¹⁴ Samuwɛli fanan ya a fɔ anu ye ko, “Ma ta wona ma nyɔgɔn fɛ Kiligali soe burɔ ka ta Sɔlila mansaya-koe lawasa.”

¹⁵ Anu dama tara Kiligali. Anu ya yisi-kima-sarakɛnu bɔ Mari ye kan-tina-sɛnimɛ rɔ nyɔ ka Sɔli sigi mansayɛ la wulɔn. Sɔli anubɛ ala nyamanita-mɔgɛnu ya ladiyɛ kɛ anu nyɔgɔn fɛ.