1 Samuwɛli 1 - ALLALA KUMƐ

Ɛlakena anubɛ Ala Denbayɛnu Bara-Koe

¹ Ifɛrɛm bɔnsɔn-mɔgɛ do ye nyɔ min tɔgɛ Ɛlakena. A siginɛ Rema soe burɔ Ifɛrɛmta kɔnkɔ-nyamanɛ rɔ. A fa tɔgɛ le Yɛroham. Yɛroham wo fanan fa tɔgɛ le Ɛlihu. Ɛlihu wo fanan fa tɔgɛ Tohu. Tohu wo fanan fa tɔgɛ le Sufu.

² Musu fila le Ɛlakena wo bolo nun, Hana anubɛ Pɛnina. Pɛnina ya dannu sɔrɔn a ye kɔnɔ Hana wo mara gbandɛ la.

³ San-bo-san, Ɛlakena si bɔ Rema ka ta Mari Sɛnbɛ-Bɛɛ-Tigi bato tinɛ Sailo soe burɔ ka sarakɛnu bɔ a ye nyɔ. Wo wati rɔ, Saraka-Masɔla-Kun-Tigi-Wɛ Ilayita den kemini filɛ Hɔfini anubɛ Finihasi taranta saraka-masɔ-wɔli kɛla nyɔ Mari ye.

⁴ Ɛlakena wa sarakɛ bɔ tuma-wo-tuma, a si ala musi Pɛnina anubɛ ala dannu kɔ saraka-soge wo do rɔ.

⁵ Kɔnɔ ale Hana di a ye min kɛ, a si sogo-sigi fila le di wo ma hali Mari ara wo ma gbandɛ la.

⁶ A sena-musi Pɛnina, wo si to Hana lamɔnina alako ka a lamiliya bawo Mari ara a bɛn dan la.

⁷ San-bo-san, a si to mala wo nya na le. Anu ba ta Mari bato tinɛ, Pɛnina si Hana niyi latinya. Wo si a ma, Hana ni to dila ka a ban dɔn-fan la.

⁸ Ala kei Ɛlakena si a manyinika ko, “Nfenna i ye dila? Nfenna i sa fen dɔnna? Nfen bi i yisi magboyala? Nde ma tenbi i ye den-kemini mɔgɔ tan na, wa?”

Hana Dakan-Don-Koe Mari Ye

^9-10 Lunyɛ do, anu ban fen dɔn la Mari bato-bɔn la Sailo, Hana ya a lasɔ ka ta Mari madiya tinɛ. A ye madiyalɛ wo kun na, a ye dila biribiri, bawo a yisi tinyanɛ. Wo ya a taran, Saraka-Masɔla-Kun-Tigi-Wɛ Ilayi siginɛ bonda-dɛ la.

¹¹ Hana ya a dakan don, a ko, “Mari Sɛnbɛ-Bɛɛ-Tigi, n bi kɔndɔfili min tɔ, i kolan lana ka nde, ila wɔli-kɛlɛ mafɛlɛn yan. I kana nyina n ko. Ni i ya dan di n ma min si ma den-kei la, n si a dantɛgɛ i ma a siyi-tele-bɛɛ kɔrɔ. Hali lilan, a ti sɔ a kunyɛ ma. Wo si ma tamasere la ko a dantɛgɛnɛ ile le ma.”

¹² Hana mɛra madiyalɛ wo kun na a da kɔrɔ, Saraka-Masɔla-Kun-Tigi-Wɛ Ilayi ye a da-gbole yenna magala.

¹³ Kɔnɔ bawo a sa a kan namɔɛnna, a ya a lɔn ko a minnɛ le.

¹⁴ A ya a fɔ ale Hana ye ko, “I ti i fara gbɛɛtoya-ko-ladan la?”

¹⁵ Hana ko, “N fa, n ma gbɛɛ min dɛɛ! N bi nna kɔndɔfili le fɔ tinɛ Mari ye bawo a ara gbɛlɛya n kuma.

¹⁶ I kana i miri ko musu sɔn-yogoma-tigi le nde la. N bi madiyali kɛla bawo n bi di tinɛ n yisi le tɔ.”

¹⁷ Ilayi ko, “Ta. I ni i yisi-kimɛ. I wara Isirɛlata Alla matara min na, alamɛ a ya wo di i ma.”

¹⁸ Hana ya a fɔ ko, “N fa, baraka. Alamɛ n wara-ko-nyimɛ tora i burɔ.” Hana ban wo fɔla, a bɔra nyɔ. A tara fen-dɔn-kɛ bawo a yisi ara kimɛ.

Samuwɛli Sɔrɔn-Koe

¹⁹ Wo wulun sɔgɔma subaga, Ɛlakena anubɛ ala denbayɛnu ya Mari bato, anu nara to sɛgila anu barɛ Rema. Hana tara ki ala kei wara. Mari ya Hanala madiyalɛ yabi.

²⁰ A ya buyi bi. Wati tenbinɛ, a ya dan sɔrɔn, den-kei. A ya dan wo tɔgɔ sa Samuwɛli bawo tɔgɛ wo kɔrɛ le, “A matarata Mari le ma.”

²¹ Anuna ta-wati kenɛ Sailo, Ɛlakena anubɛ ala denbayɛnu tara Mari bato tinɛ nyɔ. Fɔ Hana, wo le ma ta. Anu tara san saraka-bɔ-tinɛ. Wo kɔma, Ɛlakena ya saraka-gbɛrɛkɛ bɔ ka a dakan latɔnbagaya.

²² Kɔnɔ kɛ wati rɔ, Hana ma bila anu fɛ. A ya a fɔ ala kei ye ko, “Dan da wa ka tumɛ min, n si a bi ka ta a to Mari bato tinɛ. A si to nyɔ a siyi-tele-bɛɛ kɔrɔ.”

²³ Ala kei Ɛlakena ko, “Tana ma wo la. A ma iko a di i ye nya min. To yan ha i si a da-ka tumɛ min. Alamɛ i dakan mara Mari sako la.” Hana tora bɔn la ka dan wo labeli.

Samuwɛli Dantɛgɛ-Koe

²⁴ Hana ya Samuwɛli da-ka tumɛ min, a ya ala dennɛ wo bi anubɛ san-sawa-turɛ anubɛ dɛgɛ-munke pani-kunbɛ-nya tan-ni-fila anubɛ gbolo-bɔrɛ-nya kelen nɔnbɔ-gbɔ-yi la. Anubɛ ala kei tara wonu na anu bolo Mari bato tinɛ Sailo hali dan wo ma ke bɛ a na anubɛ a fa bolokɛ ma.

²⁵ Anu ke nyɔ, anu ya turɛ wo faga. Anu tara dan wo la Ilayi wara.

²⁶ Hana ya a fɔ Ilayi ye ko, “N fa, i ya n lɔn tun? Nde le taranta Mari madiyala yan i dafɛ nun.

²⁷ N ya Mari matara dan minna ko la, wo le kɛ la. I ma a yen?

²⁸ Kaka, n bara na a la ka a dantɛgɛ Mari ma. Fananta a ye a niyi la, Maritɛ le ale la.” Anu dama ya Mari bato nyɔ.