1 Pita 4 - ALLALA KUMƐ

Ma Tagama-Nya Yɛlɛma-Koe

¹ Kirasiti fɛrɛ-bɔnkɛ tɔrɔta a ma min kɛ, woletɔ wole fanan ni wo sɛbɛ don miriya kelan wo ma bawo ni min fɛrɛ-bɔnkɛ tɔrɔta, wonubɛ hakɛ ti taran kila kelen fɛ.

² Nba, ka a dabira bi ma, ha ka a sigi wo siyi-toe la, wo ni to Alla sako kɛla. Wo kana to wo diyana-koenu dɔrɔn kɛla,

³ ado wo ara wati min kɛ fɔlɔ-nun Alla-batobɛlɛnuta koenu kɛ tinɛ, wo ara a bɔ. Nyɛrɛ-latinya-koe wo, nata wo, gbɛɛ-minyɛ wo, kisimiriya-koe wo, yabatoyɛ wo, bɛsi-kɔ-koe wo, wo ya wola siyi duni wonu denu kɛ tinɛ nun.

⁴ Nba, kaka Alla-batobɛlɛnu bara kawa bawo wo sa kofula anu ma tun kisimiriya-sufa wonu tɔ. Woletɔ anu bi wo lafɛyala.

⁵ Kɔnɔ anu fanan si anu dantɛgɛ Alla ye, ado ale le si kɛndɛwaganu anubɛ furinu kiti tɛgɛ.

⁶ Wo le ya a ma, Kirasitita kibara-nyimɛ lakera mɔgɔ-faganɛnu fanan ma nun. Wo mara bawo anu bi anu kɛndɛ la tumɛ min, Alla ara anu kiti iko a si mɔgɛ bɛɛ kiti nya min. A sɔgɛ ye Alla la nun ka fɛrɛ di anu ma alako anu ni taran anu niyi la ale fɛ.

Allala Nili-Fen-Marala-Nyimɛnu Bara-Koe

⁷ Koe bɛɛ ban-tumɛ ara gbɛrɛn. Wo ni wo nyɛrɛ mara ka wo yɛ lakalan, woletɔ wo si ke ka Alla matara a kilɛ fɛ.

⁸ Min tenbira wo bɛɛ la, wo ni wo nyɔgɔn keni bɛrɛkɛ, bawo keninteyɛ ye hakɛ siyaman yamatogonna.

⁹ Wo ni wo nyɔgɔn yiya, ado yisi-magboyɛ kana taran a rɔ.

¹⁰ Alla ara sanbɛ di wo kelen-kelennamɛ-bɛɛ ma wo nyɔgɔn-dɛnbɛn-koe le la. Wo ni wo ma iko Allata sanba-marala-nyimɛnu si a ma nya min.

¹¹ Ni min bi kawandili bɔla, wo ni kuma iko a bɛnta, Allala kawandili-bɔlɛ ni kuma nya min. Ni min bi wɔli-gbɛrɛkɛ kɛla, wo tigi ni wɔli a sɛnbɛ la iko Alla ya a di a ma nya min. Woletɔ bɛɛ si Alla tanto koe bɛɛla ko la Yisa Kirasiti baraka rɔ, minta ye gbiliyɛ anubɛ sɛnbɛ la habadan! Amina.

Dɛnkɛninya-Mɔgɛta Tɔrɔyɛ Wara-Koe

¹² N diyana-mɔgɛnu, wo ye tɔrɔya-belebele min sɔrɔnna kɔrɔbɔlɛ rɔ, wo kana kawa wola ko la. Ko-kura ma wo la iko min nyɔgɔn ma duri kɛla.

¹³ Kɔnɔ wo ni sewa ko wo ye tɔrɔyɛ sɔrɔnna Kirasiti le fɛ. Wo si a ma, ala gbiliyɛ wa bɔ gbɛ rɔ tumɛ min, wole bɛrɛn si fa sewɛ la wulɔn.

¹⁴ Ni anu ya wo manyini bawo Kirasitila mɔgɛ le wo la, mɔgɔ-sewanɛ le wo la worɔ. Wo kɔrɛ le ko Allala Ni-Sɛnimɛ min gbiliyanɛ, wo ara wo yigi sa wo kuma.

¹⁵ Kɔnɔ ni wo mara mɔgɔ-fagalɛ la, ni wo ma, kankan, ni wo ma, ko-yogoma-kɛlɛ, ni wo fanan ma, nafigi, anu ba wo tɔrɔ, wo ara wo bɛrɛmɛ sɔrɔn.

¹⁶ Kɔnɔ ni anu bara wo tɔrɔ bawo dɛnkɛninya-mɔgɔ le wole la, wo kana miliya wola ko la. Wo ni baraka bira Alla ye ko Kirasiti tɔgɛ sanɛ wole kuma.

¹⁷ Kiti-tɛgɛ-dabira-wati ara ke. Nba, Alla si ala mɔgɛnu fɔlɔn kiti. Ni kiti gbɛlɛ da si bira male le ma, a laban si ma kama worɔ wonu kuma minnu ma Allala kibara-nyimɛ bira?

¹⁸ Iko a sɛbɛnɛ Allala kitabu rɔ nya min ko, “Ni mɔgɔ-nyimɛ kisi-koe gbɛlɛ, Alla-lɔnbɛlɛnu anubɛ hakɛ-tiginu si ma kama worɔ?”

¹⁹ Woletɔ minnu bi tɔrɔla iko Alla sako ye nya min anu bolo, wonu ni anu nyɛrɛ kerifa anu Dali Mari la fasai! Anu ni to kɛwɔli-nyimɛ kɛla Alla ye min bi ala lanyiri tola a gbɛ rɔ tuma-wo-tuma.