1 Pita 1 - ALLALA KUMƐ

¹ Nde, Pita le ye kɛdi kɛ sɛbɛla, Yisa Kirasiti ya nde min sɔ, ala kilayɛ, kɔni. N bi a lakela wole Allala mɔgɔ yabɔnɛnu ma minnu manɛ iko kɛlɛ-kɔrɔ-maburilɛnu. Wo nyɛnsɛnnɛ Ponta anubɛ Kalesiya anubɛ Kapadosiya anubɛ Esiya anubɛ Baitiniya nyamanɛnu tɔ.

² Wo yabɔnɛ le iko Fa Alla nyɛrɛta ko-latɛgɛnɛ ye nya min. Wo mara mɔgɔ-sɛnimɛnu na ala Ni-Sɛnimɛ baraka rɔ alako wo si Yisa Kirasitila kumɛ bira nya min, ado wo ara sɛninya a yele fɛ. Alamɛ ma Fa Allata hinɛ anubɛ yisi-kimɛ ni wara wo ye nya bɛɛ ma.

Yigi-Bɛrɛ ye Nya Min

³ Ma ni baraka bira Mari Yisa Kirasiti, wo Fa Alla ye dɛɛ! Ka a tɛgɛ Yisata lawulɛ fɛ ka bɔ furinu tɛma, ma ara ni-kurɛ sɔrɔn a bolo ala kinikini-wɛ rɔ. Wo ara ma fa yigi-bɛrɛ la.

⁴ Wo le ya a to, ma yɛ ye kilɛ la duwa-belebele wo sɔrɔn-koe la. Alla ara wo lamara wole, ala mɔgɛnu ye. Wo bɛɛ maranɛ wole ye Arinyɛni tɔ. A ti tuli nyɔ, a ti tinya, a ti bɔ a su la.

⁵ Wotɛ le duwɛ wonu na, wole minnu maranɛ Allala sɛnbɛ baraka rɔ dɛnkɛninyɛ fɛ, kɔni. Ma ye kisi-koe min makɔnɔna, wo la si bɔ wo ye gbɛ rɔ wati-laban-tumɛ.

⁶ Hali wo yisi tɔrɔnɛ kaka kɔrɔbɔli-sufa-siyaman tɔ kɔnɔ a fɛrɛ sa, ado a bɛnnɛ wo ni sewa tɔrɔyɛ wola ko la.

⁷ Kɔrɔbɔlɛ wonu kɛ-kunyɛ le ka wola dɛnkɛninyɛ mayira ko tonyɛ le. Hali sɛnɛ min ti ke tinyala, a boe si bɔ a bɛrɛ ya la tɛ la. Wola dɛnkɛninyɛ fanan bi wo nya na le min tenbira sɛnɛ la pirr! Fɔ wola dɛnkɛninyɛ fanan kɔrɔ ni bɔ alako a si kun wo rɔ nya min. Yisa Kirasiti wa bɔ gbɛ rɔ tele min tɔ, wole si tantolɛ anubɛ gbiliyɛ anubɛ bonyɛ sɔrɔn worɔ.

⁸ Wo ma Yisa yen bɛ kɔnɔ wo ara a keni. Wo ma a yen bɛ wo yɛ la, hali wo, wo dɛnkɛninyanɛ a ma. Woletɔ wo ye nyagalenna ka sewa-makawani-wɛ kɛ, hadama-dan dɛ ti ke min fɔla.

⁹ Wo ye nala wola dɛnkɛninya-kunyɛ sɔrɔnna, wo niyi kisi-koe, kɔni.

¹⁰ Alla si na kisi-koe min di wo ma, nɛbinu ya wo lakɔrɔsi ka a fɛsɛfɛsɛ a kilɛ fɛ. Alla ara duwɛ min tabɛn wo ye, nɛbi wonu denu ya wɔlɔyiyɛ kɛ wola ko la.

¹¹ Kirasitila Niyi min bi anu tɔ, wo ya wati wola koe fɔ anu ye. Kirasiti si na tɔrɔyɛ minnu sɔrɔn anubɛ gbiliyɛ min si bɔ tɔrɔyɛ wo kɔma, anu ya wo bɛɛ faranfasi. Anu ya anu taya wati wo lɔn-koe ma anubɛ a si na nya min.

¹² Alla ya a yira nɛbi wonu na ko anuna wɔlɔyiyɛ ti ko-nyinya anu denu ma anuta wati rɔ fɔ woleta wati. Iko anu kumara nya min ka tonyɛ fɔ, wo ara wo lamɔɛn kaka. Anu ya kawandili bɔ wo ye Allata Ni-Sɛnimɛ baraka rɔ, min nara ka bɔ Arinyɛni tɔ. Hali a lɔn-sɔgɛ ye melikanu na nun, kawandili wo bɔra wole le dɔrɔnna ko la.

Keleli Sɛninyɛ Ma

¹³ Nba, wo ni wo hɛnkili masɔ ka wo sɛbɛ don. Wo ni wo yɛ lakalan ka wo yigi sa Kirasitita duwɛ kuma, ado Kirasiti wa bɔ gbɛ rɔ tumɛ min, a si wo di wo ma feu!

¹⁴ Wo ni Allala kumɛ bira. Wo ma Alla wara-koe lɔn bɛ tumɛ min, nata-yogomɛ minnu bi wo marala nun, wo kana sɔn, wonu ni wo mara tun.

¹⁵ Min fisa, wo ni sɛninya kɛ-nya-bɛɛ rɔ iko Alla min ya wo kele, wo sɛninyanɛ nya min,

¹⁶ ado a sɛbɛnɛ Allala kitabu rɔ ko, “Wo ni sɛninya bawo nde sɛnima.”

¹⁷ Wo tenbi Alla matarala, wo ye a fɔla ko, “Ma Fa,” ado ale le ye mɔgɛ bɛɛ kiti tɛgɛla nya-kun-kelen iko mɔgɔ kelen-kelennamɛ-bɛɛta kɛwɔlɛ ye nya min. A ti lafisayalɛ kɛ. Woletɔ wo siyi-toe min tonɛ dugu-kole kɛ kuma gbɛ, wo ni wo laban a gbiliya tinɛ.

¹⁸ Wo ya kɛ-nya-fuyi minnu sɔrɔn wo benbanu bolo, Yisa fagara ka wo hɔrɔya wonu ma. Wola hɔrɔyɛ ma tɛgɛ fan do ma mɔgɛ si min sara sɛnɛ la, ni wo ma, wodi-gbɛ, ado wonu ti mɛ.

¹⁹ Wo hɔrɔyara saraka-da-gbɛlɛmɛ le fɛ, Kirasiti, kɔni min manɛ iko saga-dan, fɛɛ-wo-fɛɛ sa min na.

²⁰ Alla ya Yisa yabɔ, yanni duninya ni dan. A bɔra gbɛ rɔ tele-laban kɛnu tɔ wole, ata mɔgɛnuna ko la.

²¹ Wo dɛnkɛninyanɛ Alla ma ale le baraka rɔ. Alla min ya a lawuli ka a bɔ furinu tɛma, wo le ya gbiliyɛ di ale ma. Woletɔ wola dɛnkɛninyɛ anubɛ wo yigi sanɛ ale Alla kuma.

²² Nba, wo nyɛrɛta sɛninyɛ kɛra tonya-birɛ le fɛ. Keninteya-bɛrɛ ye wo yisi rɔ wo ta-nyɔgɛ dɛnkɛninya-mɔgɛnu ye. Wo ni to wo nyɔgɔn kenina bɛrɛkɛ wo yisi bɛɛ la.

²³ Wo ara sɔrɔn a kurɛ la Allala habadan-kuma-nimɛ baraka rɔ. Alla min ti faga, wo ara ma wola dannu na!

²⁴ Iko a sɛbɛnɛ Allala kitabu rɔ nya min ko, “Mɔgɛ bɛɛ mani de iko yerimɛ. Anuna gbiliyɛ bɛɛ mani de iko yerima-fere. Yerimɛ si gbala, a fere si yalan.

²⁵ Kɔnɔ Allala kumɛ tonɛ habadan!” Ado nfan, kibara-nyimɛ min kawandili bɔra wo ye, wo le kɛ la.