1 Mansɛnu 9 - ALLALA KUMƐ

Mansa Silamɛnita Kiyo Sa-Koe Fila Nyɔgɛ Mari Bolo

¹ Mansa Silamɛni banta Mari Bato-Bɔn anubɛ a nyɛrɛta bolɔn sɔla tumɛ min anubɛ a miriya ye min bɛɛ ma,

² Mari ya a nyɛrɛ yira a la kiyo rɔ tun iko a bɔra gbɛ rɔ a ye nya min nun Kibiyon soe burɔ.

³ Mari ya a fɔ a ye ko, “N bara ila matarali-kan lamɔɛn. I wara bɔn min sɔ ka a dantɛgɛ n ma, n bara sɔn ka wo ma n halalɛ la. Wo si to n batola nyɔ burubukai! N si a mafɛlɛn ka a kandan habadan!

⁴ Ni i tora telenbagayɛ rɔ ka nna kumɛ anubɛ nna tɔnnu bira iko i fa Dawuda taranta a mala nya min,

⁵ mansayɛ si to i bɔnsɔn rɔ Isirɛla mɔgɛnu kuma habadan iko n bara a fɔ i fa ye nya min nun.

⁶ Kɔnɔ ni wobɛ i kegeyɛnu ya wo kan-kɔ sɔ n na ka bɔ nta tɔnnu kɔrɔ ka bɛsɛnu kɔ,

⁷ n si Isirɛla mɔgɛnu gben ka anu bɔ nyamanɛ kɛ rɔ n ya min di anu ma. N bara Bato-Bɔn min ma ntɛ la kɛ la, n si n ban wo la fanan. Mɔgɔ yigi ti taran Isirɛla mɔgɛnu na worɔ tun!

⁸ Bato-Bon-nyimɛ kɛ si tinya ka ma bon-gbarɛ la. Mɔgɔ-wo-mɔgɔ wa tenbi nyɔ, wo si kawa ka a bole sa a dɛ la. A si a fɔ ko, ‘Nfenna ko la Mari ara ko sufa kɛ ma ala nyamanɛ anubɛ ala Bato-Bɔn kɛ la?’

⁹ Mɔgɛnu si wo yabi ko, ‘Mari ya kasarɛ kɛ bɛɛ lana anu kuma kamasɔrɔn anu bara bɛsɛnu kɔ ka anuta Mari Alla boloka min ya anu nabɔ Iyipiti.’ ”

So-Kun Mogan Di-Koe Mansa Hairam ma Mansa Silamɛni Bolo

^10-11 Mansa Silamɛni ya san mogan de bɔ Mari Bato-Bɔn anubɛ a nyɛrɛta bolɔn sɔ tinɛ. A ya so-kun mogan di Taya Mansa Hairam ma Kalili nyamanɛ rɔ kamasɔrɔn ale ya Mansa Silamɛni madɛnbɛ fɛrannu anubɛ sɛnɛ do la Mari Bato-Bɔn sɔ-koe rɔ.

¹² Woletɔ Mansa Hairam tara soe wonu mafɛlɛn kɔnɔ anu ma a hɛnɛ pit!

¹³ A ko, “N bɔ, i wara nfen so-sufanu di n ma kɛ la?” Woletɔ a ya soe wonu kele ko “So-Fuyinu.” Ha bi, anu bi a kelela wo nya na le.

¹⁴ Mansa Hairam ya sɛnɛ min nata Mansa Silamɛni ma nun, wonubɛ fui-fan bɔrɔ bi-wɔrɛla gbiliyɛ rakɛn de!

Mɔgɛnu Fɔrɔsɛ-Koe Mansa Silamɛni Bolo

¹⁵ Mansa Silamɛni ya mɔgɛnu fɔrɔsɛ Mari Bato-Bɔn anubɛ a nyɛrɛta bolɔn sɔ tinɛ. Hali a ya mɔgɛnu fɔrɔsɛ ka lɛnbɛn-lɛnbɛnya-rasiginɛ rakɛ soe tele-bɔɛ wara la. Wo kɔma, a ya anu fɔrɔsɛ ka soe tarɛ sɔ. Hali tonbon sawɛ kɛ, Hesɔ wo, Magidɔ wo, anubɛ Kisari, a ya anu fɔrɔsɛ ka wonu sɔ a kurɛ la.

¹⁶ (A ya Kisa tonbɔn sɔ bawo Iyipiti mansɛ ara ta bui nyɔ ma nun ka mɔgɛnu faga. A ya soe wo mintan. Kɔnɔ tɔ-a-la, ala dunmusu-toyɛ Mansa Silamɛni ye, a ya Kisari soe wo lasɛgi Mansa Silamɛni ma furu-nyɔgɔnyɛla ko la.

¹⁷ Woletɔ Mansa Silamɛni ya wo sɔ a kurɛ la tun.) Wo kɔma, Bɛti-Hɔrɔn tonbɔn min bi soe kɔnkɛ kɔrɔ, ale Mansa Silamɛni ya mɔgɛnu fɔrɔsɛ ka wo sɔ a kurɛ la tun.

¹⁸ Wo kɔma, anu ya Beyali-Ati soe sɔ anubɛ Tama soe min bi wula-da-rakolɔn rɔ Yuda nyamanɛ rɔ.

¹⁹ Wo kɔma, a ya anu fɔrɔsɛ ka soe wonu sɔ, a si a bolo-fannu namara kan min anubɛ a si ala kirindinu anubɛ ala soeenu namara kan min. A wa wuli a halala-wɔli-wo-wɔli mala Yerusalɛm soe burɔ, a si mɔgɛnu fɔrɔsɛ ka wo ma. A si ala mɔgɛnu nawɔli ala nyamanɛ wo bɛɛ rɔ. Hali Lɛbanan nyamanɛ rɔ, a ya ala mɔgɛnu nawɔli nyɔ.

^20-21 Mansa Silamɛni ya mɔgɛ minnu nawɔli kɛ la, Kenan kegeyɛ le wonu na. Isirɛla mɔgɛnu nanɛ nyamanɛ wo rɔ, anu ma anu denu faga. Amoranu bi kɛnu denu tɛma. Hɛtinu fanan basannɛ anu na. Pɛrasanu anubɛ Hefa kɛnu anubɛ Yɛbusinu fanan kofunɛ anu ma. Ha bi, wo donu bi yɔɔnyɛ rɔ Isirɛla mɔgɛnu bolo.

²² Kɔnɔ Mansa Silamɛni ma sɔn Isirɛla mɔgɔ-wo-mɔgɔ mala yɔɔn la. Wonu taranta kɛlɛ denyɛ anubɛ kɛlɛ-kurugbayɛ anubɛ kɛlɛ-den-kun-tigiyɛ anubɛ so-laburilɛ anubɛ kirindi-laburi-wɔlɛ la.

²³ Mɔgɔ-ba kɛmɛ loli ani mɔgɔ bi-loli, wonu denu bi Mansa Silamɛnina wɔli-kɛlɛ kɛnu kun na.

²⁴ Iyipiti mansɛla dunmusi yirindira Mansa Dawudala luyi ma ka ta a halala-bɔn la ala kei Mansa Silamɛni ya min sɔ a ye. Wo kɔma, Mansa Silamɛni ya lɛnbɛn-lɛnbɛnya-rasiginɛ rakɛ Yerusalɛm soe tele-bɔɛ wara la.

²⁵ Mansa Silamɛni ya saraka-mintan-tinɛ min sɔ Mari ye, san-bo-san, a si saraka-mintantɛ anubɛ yisi-kima-sarakɛnu bɔ a kuma kinyama sawa, wo kɔma ka isɛnti fanan mintan Mari ye. Silamɛni tora Mari Bato-Bɔn fɛ-birala a kilɛ fɛ.

²⁶ Mansa Silamɛni ya kulun-belebele-siyaman nadan Kɔgɔ-Yi-Wulan bolɔn doi kɔnkɔn la Iseyɔn-Kiba soe dafɛ min bi Ilati soe telen tɔ Idɔm nyamanɛ rɔ.

²⁷ Mansa Hairam ya hɛnkilima-siyaman nana minnu kusan wɔlila kulɔn wonu tɔ alako wonu ni kofu Mansa Silamɛnita kulun-tawɔli-kɛlɛnu ma.

²⁸ Anu si ta kulɔn wonu na nyamanɛ do rɔ min tɔgɛ Ɔfiri. Anu bɔra sɛnɛ min na nyamanɛ wo rɔ, wola gbiliyɛ anubɛ fui-fan bɔrɔ kɛmɛ fila anubɛ bɔrɔ tan rakɛn de!