1 Mansɛnu 7 - ALLALA KUMƐ

Mansa Silamɛnina Bɔn Sɔ-Koe

¹ San tan-ni-sawa dɛgɛdɛgɛ, Mansa Silamɛni ye a halala-bɔn sɔla.

^2-3 A ya bɔn fɔlɔtɛ min sɔ a nyɛrɛ ye, anu ya a tɔgɔ sa “Lɛbanan Gbɔngbɔn,” bawo a ya wo ladan kɔlɔmanu na minnu bɔra Lɛbanan nyamanɛ rɔ. Bɔn wo lɔngbɔn, nunkan-nya kɛmɛ, a kɔnɛ, nunkan-nya bi-loli, a sɔɛ, nunkan-nya bi-sawa. Sɛnbɛrɛn-kɔnnu sɔnɛ ye tala gbaranda nani-nani ma. Kundulasɛnu sanɛ sɛnbɛrɛn-kɔn wonu kuma tala. Anu ya fɛrɛn-hakikɛnu sa kundulasɛ wo bɛɛ kuma. A tɔnkɔn kelan, sɛnbɛrɛn-kɔn tan-ni-loli sɔnɛ fɛran wonu kuma. A tɔnkɔn doi, sɛnbɛrɛn-kɔn tan-ni-loli sɔnɛ fɛran wonu kuma. Sɛnbɛrɛn-kɔn tan-ni-loli sɔnɛ a tɛma fanan. Wo bɛɛ lakofunɛ sɛnbɛrɛn-kɔn bi-nani ani sɛnbɛrɛn-kɔn loli.

⁴ Anu ya wundannu gbaranda sawa-sawa ladan bɔn wo tɔnkɔn filɛ rɔ. Wundan wonu dɛ bɛnnɛ anu nyɔgɔn ma gben!

⁵ A don-dɛnu anubɛ a wundan sawa-sawɛnu, wo bɛɛ tonko nani-nani.

⁶ Anu ya sɛnbɛrɛn-kɔnnu sɔ anu sansan-yili ma ka wo ma tenbi-bolɔn la. Anu ya nyɔ kele ko “Sɛnbɛrɛn-Kɔn Tenbi-Bolɔn.” Tenbi-bolɔn wo lɔngbɔn ya nunkan-nya bi-loli bɔ, a kɔnɛ, nunkan-nya bi-sawa. Dandan-kɔrɛ ye tenbi-bolɔn wo yarɔ. Sɛnbɛrɛn-kɔnnu sɔnɛ dandan-kɔrɛ wola minɛ rɔ.

⁷ Anu ya mansɛla kiti sa tinɛ sɔ bolɔn wo burɔ. Anu ya a dandannu yamatogon fɛrɛn-hakikɛnu na minnu bɔra Lɛbanan nyamanɛ rɔ ka a bi a kɔrɔ ha a kuma. Anu ya nyɔ tɔgɔ sa “Kiti Fɔ Tinɛ.”

⁸ Anu ya wo sufa bɔn sɔ Mansa Silamɛni ye kiti fɔ tinɛ wo kɔma. Mansɛ ya Iyipiti mansɛla dunmusi min furu, a ya a halala-bɔn kɛ sufa sɔ wo ye fanan.

⁹ Anu ya bɔn kɛ damasi sɔ kuru-lɛsɛni-hakikɛnu na ka a bi anu kɔrɔ ha anu kuma. Anu ya kuri wonu malɛsɛ sɛrɛ la a kɔma anubɛ a burɔ.

¹⁰ Anu ya bɔn kɛnu kurukɛ kuru-lɛsɛnɛ minnu na, wonu kolo, ado anu kin. Kuri wo donu yanyɛ ya nunkan-nya tan bɔ, donu nunkan-nya segin.

¹¹ Anu ya kuru-lɛsɛnɛnu sigi bon-kurukɛ tinɛ kuma ka fɛrɛn-hakikɛnu sa wonu kuma minnu bɔra Lɛbanan. Anu ya kuri wonu lɛsɛ iko a bɛnta, a ni sigi nya min.

¹² Anu ya tarɛ mini mansɛla luyi ma. Anu ya kuru-lɛsɛnɛ wonu sigi tala anu nyɔgɔn kuma sawa-sawayɛ ma. Lɛbanan fɛrɛn-hakikɛnu sanɛ wonu kuma iko Bato-Bɔn sansantɛ manɛ nya min. Bato-Bɔn sansan anubɛ a dandan-kɔrɛ ladannɛ wo nya fanan.

Huramta Wɔli-Kɛ-Koe Mari Bato-Bɔn La

^13-14 Mansa Silamɛni ya mɔgɛ do sɔ Taya soe burɔ siyaki do bi tinɛ min tɔgɛ Huram kamasɔrɔn ale Huram hɛnkili kolo. A kusan sila-ko-wɔlɛ la kati! Huram wo na, kɛɛ-musi le wo la ka bɔ Nafatali bɔnsɔn rɔ. Taya kɛ le Huram wo fa la kɔnɔ a ara faga nun. Siyaki le ale fanan na nun. Huram wo tara Mansa Silamɛni wara ka wola silɛɛ bɛɛ ladan a ye.

Sɛnbɛrɛn-Kɔn Filɛ Ladan-Koe

¹⁵ Huram ya sɛnbɛrɛn-kɔn fila ladan silɛɛ la. Wo kelen-kelen yanyɛ ya nunkan-nya tan-ni-segin bɔ. Ala minɛ ya bolo-bira-nya bi-sawa ani wɔrɔ bɔ.

¹⁶ A ya sɛnbɛrɛn-kɔn filɛ kɛnu kun-tɛma-sorenu nadan silɛɛ la. Anu kun-tɛma-sore wonuna yanyɛ, nunkan-nya loli-loli.

¹⁷ A ya sila-yɔlɔkɔ wɔrɔnfila ladan yalɛ la ka anu dun anu kun-tɛma-sore wonuna minɛ kuma.

¹⁸ A ya kɔn-gbɔɛ dola muninyɛ ladan silɛɛ la min tɔgɛ pamakarani. A ya wo gbaranda fila dun a yalɛ wonu na san ma.

¹⁹ A kun-tɛma-sore firɔnnɛ iko yi-yawore-fere ye nya min, a yanyɛ nunkan-nya nani.

²⁰ A kun-tɛma-sore firɔnnɛ siginɛ fan do kuma min manɛ iko fi. Yɔlɔkɔ-yalɛ mininɛ fi wo ma. Pamakarani wola muninyɛ kɛmɛ fila ye a kun-tɛma-sore wonuna minɛ rɔ a kuma.

²¹ A ya sɛnbɛrɛn-kɔn filɛ wonu sɔ Bato-Bɔn dandan-kɔrɛ tɔnkɔn filɛ bɛɛ rɔ. Sɛnbɛrɛn-kɔn min bi dugula wara la, anu ya wo tɔgɔ sa “Allata Fanka.” Doi min bi kantɔ-wara la, anu ya wo tɔgɔ sa “Allata Sɛnbɛ.”

²² Anu banta kun-tɛma-sore wonu sigila sɛnbɛrɛn-kɔn wonu kuma tumɛ min, sɛnbɛrɛn-kɔn wonuta wɔlɛ banta.

Yi-Sigi-Kunan Ladan-Koe

²³ Huram ya yi-sigi-kunan kinama-wɛ do ladan silɛɛ la. A kɔnɛ ya nunkan-nya tan bɔ. A burɛ rayanyɛ ya nunkan-nya loli bɔ. Ala minɛ ya bolo-bira-nya bi-kɔnɔntɔ bɔ.

²⁴ A ya bara-kan-yanla muninyɛ gbaranda fila ladan kunan wo da-gbolela foolɛ bɛɛ rɔ. A ya anubɛ yi-sigi-kunan wo ladan nya-kun-kelen.

²⁵ Wo kɔma, a ya tura tan-ni-filala muninyɛ ladan ka yi-sigi-kunan wo sigi wonu kuma. Wonu fanan nadanta silɛɛ le la. Tura sawa wonu yɛ lamununnɛ kantɔ-waralɛ la. Sawɛ doi fanan yɛ lamununnɛ tele-yigi waralɛ la. Sawɛ doi fanan yɛ lamununnɛ dugula waralɛ la. Sawɛ doi yɛ lamununnɛ tele-bɔɛ waralɛ la. Anu kan-kɔ sɔnɛ anu nyɔgɔn na yi-sigi-kunan wo kɔrɔ.

²⁶ Yi-sigi-kunan wo da-gbengbe si bira kelen bɔ. Huram ya a da-gbole ladan iko yi-lafɛ. A da-gbole firɔnnɛ iko yi-yawore-fere dɛ firɔnnɛ ye nya min. Yi-durɔmu-nya kɛmɛ fila si kun a rɔ.

Sila-Kenkirɛ Ladan-Koe

²⁷ Kin nani ye kenkirɛ min kɔrɔ iko kirindi, Huram ya wo nyɔgɛ tan nadan silɛɛ la. Kenkirɛ wo bɛɛ lɔngbɔn ya nunkan-nya nani-nani bɔ. Anu kɔnɛ ya nunkan-nya nani-nani bɔ. Anu sɔɛ ya nunkan-nya sawa-sawa bɔ.

²⁸ A ya kenkirɛ wonu nadan ka le. A ya anu tonke ladan silɛɛ la ka silɛɛ do dɛnfɛ ka wonu tugun anu tɔnkɔn nani bɛɛ ma ka a bi anu kɔrɔ ha anu kuma.

²⁹ Yara wo, tura wo, melika wo, Huram ya silɛɛ do bi ka wonu nadan kenkirɛ wonuna foolɛ bɛɛ rɔ. A ya mɔlɔnɛ ladan wonu ma fanan.

³⁰ Kenkirɛ tonke wonu kin nanɛnu bi anu kɔrɔ iko kirindinu. Kin nanɛ wonu nadannɛ silɛɛ la. Sila-lɔngbɔn do ye anu kin fila filɛ tɛma alako ka anu bira. A ya yi-sigi-kunan bira-fannu nadan kenkirɛ wonu burɔ silɛɛ la. A ya mɔlɔnɛ ladan kunan bira-fan wonu ma.

³¹ A ya karan mini kenkirɛ wonu kuma, yi-sigi-kunan wonu si sigi minnu tɛma. Ka a bi kenkirɛ kuma ka ke kunan da-gbole ma, nunkan-nya talɛ le wo la. Ka a bi kenkirɛ kuma ka a sigi yi-sigi-kunan wonu kuri ma, nunkan-nya kelen. A ya mɔlɔnɛ ladan ala minɛ bɛɛ ma.

³² Kenkirɛ wonu kian minnu manɛ iko kirinditɛ, kian wonu yanyɛ ya nunkan-nya kelen ani a tala bɔ. Kenkirɛ wo nyɛrɛ kiannu bi a kɔrɔ. Sila-lɔngbɔn minnu bi kin fila-filɛ wonu tɛma, wonu tugunnɛ kenkirɛ wonu na.

³³ Huram ya kenkirɛ wo bɛɛsi kian kelen-kelennamɛ ladan silɛɛ la. A sila-lɔngbɔn wo, anu kiannu wo, anu damasi laleenɛ ka bɔ fen-nagbuni kelen tɔ.

³⁴ Kenkirɛ wonu kiannu-bira-fen nanɛ minnu bi anu kɔrɔ, kenkirɛ wonu tagbɛlɛya-fan le wonu na. Wonu bi kenkirɛ wonu tonko nani bɛɛ rɔ. Wonubɛ kenkirɛ wonu nadanta nya-kun-kelen.

³⁵ Karan min mininɛ kunannu kɔrɔ a da-gbole ma, ka a bi kunan kuma ka ke a da-gbole wo ma, wo mara nunkan-nya-talɛ la. Wonu tugunnɛ kenkirɛ kumɛ la.

³⁶ Melika wo, yara wo, tin-kuri wo, Huram ya wonu mɔlɔnɛ donu nadan kenkirɛ wonu tɔnkɔn nanɛ bɛɛ anubɛ a yi-sigi-kunan bira-fan ma.

³⁷ Huram ya kenkirɛ tan wo bɛɛsi ma subolo kelen na.

³⁸ Huram ya kunan tan nadan silɛɛ la fanan ka anu sigi kenkirɛ kelen-kelennamɛ-bɛɛ kuma. Kunan wonu kɔnɛ ya nunkan-nya nani-nani bɔ. Yi-durɔmu nanɛ si kun de anu kelen-kelennamɛ-bɛɛ rɔ.

³⁹ A ya kenkirɛ loli sɔ Bato-Bɔn dugula wara la. A ya a to loli sɔ Bato-Bɔn kantɔ-wara la. Yi-sigi-kunan-wɛ min siginɛ turɛnu kuma, a ya wonubɛ wo sigi Bato-Bɔn tonko kelen tɔ dugula warala tele-bɔ-fan ma.

⁴⁰ Huram ya dagɛnu nadan anubɛ bugura-makɔ-fannu anubɛ yi-bi-miran-mɛsɛ donu. A ya wo bɛɛ ladan Mansa Silamɛni ye Mari Bato-Bɔnla ko la.

Huramta Ladan-Fannu Bara-Koe

⁴¹ Huram ya min bɛɛ ladan, wo le kɛnu na. A ya sɛnbɛrɛn-kɔn fila anubɛ anu kun-tɛma-sorenu nadan.

⁴² A ya pamakaranila muninyɛ kɛmɛ nani ladan anubɛ yɔlɔkɛnu ka wonu dun sɛnbɛrɛn-kɔn wonu kun-tɛma-sorenu na.

⁴³ A ya yi-sigi-kunan tan nadan anubɛ anu kenkirɛnu.

⁴⁴ A ya tura tan-ni-filala muninyɛ ladan anubɛ yi-sigi-kunan-kinama kelen min bi sigila turɛ wonu kuma.

⁴⁵ Wo kɔma, a ya dagɛnu anubɛ bugura-makɔ-fannu anubɛ yi-bi-miran-mɛsɛ donu nadan. Huram ya miran min bɛɛ ladan Mansa Silamɛni ye Mari Bato-Bɔnla ko la, wo bɛɛ ladannɛ silɛɛ le tɔ. Wo bɛɛ manunkunɛ pinapina!

⁴⁶ A ya silɛɛ wonu nalee sulubondɔn la Yorodan-ba-lɛɛ rɔ Sukɔti soe anubɛ Sarati soe tɛma. A ya miran kɛ bɛɛsi ladan nyɔ le.

⁴⁷ Mansa Silamɛni ma miran wonu gbiliyɛ-yirika lɔn kamasɔrɔn anu siya. Woletɔ anu ma silɛɛ wo mumɛ gbiliyɛ-yirika lɔn.

⁴⁸ Mansa Silamɛni ya miran minnu nadan sɛnɛ la Mari Bato-Bɔnla ko la, wo le kɛnu na, isɛnti mintan tinɛ wo, tebulu wo anu si Marita biredi-sɛnimɛ sa min kuma,

⁴⁹ anubɛ lɛnpu-sigi-fan minnu sɔnɛ Sɛnima-Sɛnima-Tinɛ wara la. (Lɛnpu-sigi-fan wo, loli ye bolo-nyimɛ rɔ, loli ye bolo-maran rɔ.) A ya kɔn-ferela muninyɛnu nadan sɛnɛ la fanan anubɛ lɛnpunu anubɛ a barannu.

⁵⁰ Wo kɔma, a ya yi-lafɛnu anubɛ lɛnpu-ladufen-fannu nadan anubɛ yi-bi-mirannu. A ya isɛnti-bi-fannu anubɛ ta-kɔ-mirannu nadan. A ya Sɛnima-Sɛnima-Tinɛ dɛ-bira-fannu anubɛ a da-wɛ-bira-fannu nadan. Wo bɛɛ ladanta sɛnɛ la.

⁵¹ Mansa Silamɛni ban Mari Bato-Bɔn sɔla, a fa Dawuda ara miran min bɛɛ dantɛgɛ Mari ma nun, a ya miran wo bɛɛsi ladon Bato-Bɔn wo fen namara tinɛnu tɔ. A ya miran minnu nadon, wo le kɛnu na, wodi-gbɛ-mirannu wo, sɛnɛ-mirannu wo, anubɛ fen-kolomɛ donu. A ya wo bɛɛ sa fen namara tinɛnu tɔ Mari Bato-Bɔn la.