1 Mansɛnu 6 - ALLALA KUMƐ

Alla Bato-Bɔn Sɔ-Koe Mansa Silamɛni Bolo

¹ San kɛmɛ nani san bi-segin (480) ara tenbi kebi Isirɛla mɔgɛnu bɔra Iyipiti. A san kɛmɛ nani, san bi-segin nyɔgɛ wo karɛ fila nyɔgɛ ma, Mansa Silamɛni ya Bato-Bɔn sɔɛ dabira. Wo ya a taran, Silamɛnina mansayɛ ara san nani bɔ Isirɛla nyamanɛ kun na.

² Mansa Silamɛni ye Mari Bato-Bɔn min sɔ tinɛ, wo lɔngbɔn ya nunkan-nya bi-wɔrɔ bɔ. A kɔnɛ ya nunkan-nya mogan bɔ. A sɔɛ ya nunkan-nya bi-sawa bɔ.

³ A dandan-kɔrɛ lɔngbɔn anubɛ bɔn kɔnɛ rakɛn de! Dandan-kɔrɛ wo lɔngbɔn ya nunkan-nya mogan bɔ. A kɔnɛ ya nunkan-nya tan bɔ.

⁴ A ya bɔn wo wundannu nadan. Wundan wonu kɔnɛ dɔgɔ luyi wara la kɔnɔ anu kɔnɛ kolo bɔn burɔ.

⁵ A ya konkonɛnu tugun bon-kinamɛ tɔnkɔn sawɛ ma tala. Konko wonu sɔnɛ ye tala anu nyɔgɔn kuma sawa-sawayɛ ma.

⁶ Konko kɔrɔtɛ wonu kɔnɛ, nunkan-nya loli, konko tɛmatɛ, nunkan-nya wɔrɔ, konko-kumatɛ, nunkan-nya wɔrɔnfila. Anu ya Bato-Bɔn nyɛrɛ dandan ladɔgɔya tala san ma, alako konko wonu si tugun Bato-Bɔn la nya min. Anu ma konko wonu kundulasɛnu don Bato-Bɔn dandan rɔ fɔ ka anu sa dandan wo ma.

⁷ Anu ya bɔn sɔ kuru-kundi minnu na, anu ya wonu malɛsɛ anu bɔra kan min, alako mɔgɔ kana kuri-malɛsɛ-kan lamɔɛn bɔn sɔ tinɛ rɔ.

⁸ Konko wonu kɔrɔtɛ bonda-dɛ tora Bato-Bɔn dugula wara la. Anu ya yɛlɛ tinɛ ladan ka bɔ konko wonu kɔrɔtɛ ma ha ka ta ke a kumatɛ ma.

⁹ Wo kɔma, Mansa Silamɛni ya Bato-Bɔn kole lawuli ka a gbaran fɛrɛn-hakikɛnu na minnu bɔra Lɛbanan nyamanɛ rɔ.

¹⁰ Anu ya konko wonu tugun tala Bato-Bɔn tɔnkɔn sawɛ la kundulasɛ-hakikɛnu na fanan ka bɔ Lɛbanan nyamanɛ rɔ. Anu ya konko wo bɛɛsi sɔɛ ma nunkan-nya loli-loli la.

¹¹ Mari ya a fɔ Mansa Silamɛni ye Bato-Bɔn kɛla ko la ko,

¹² “Ni wo ya nta tɔnnu anubɛ nta kumɛ bɛɛsi bira, n si lanyiri wo kanbali ile ye iko n ya a kiri i fa Dawuda ye nya min,

¹³ ado n si to nta Isirɛla mɔgɛnu fɛ. N ti anu boloka muk!”

¹⁴ Mansa Silamɛni banta Bato-Bɔn wo sɔla.

Bɔn Burɛ Ladan-Koe

^15-22 Anu ya fɛrɛn-hakikɛnu bi ka bon-burɛ fara sigi tina fila la. Konko-yarɔtɛ lɔngbɔn mara nunkan-nya bi-nani na. Anu ya a kɔmatɛ kele ko Sɛnima-Sɛnima-Tinɛ. Wo lɔngbɔn mara nunkan-nya mogan na, a kɔnɛ, nunkan-nya mogan, a sɔɛ, nunkan-nya mogan. Anu ya bon-burɔ-dandan yamatogon fɛrɛn-hakikɛnu na ka a bi a kɔrɔ ha a kuma alako mɔgɔ kana kuru-lɛsɛnɛ wonu yen dandan ma. Anu ya bara-kan-yan anubɛ kɔn-ferela muninyɛ ladan fɛran wonu ma. Anu ya a bon-kole yamatogon fɛrɛn-hakika-su-gbɛrɛ la. Anu ya sɛnɛ sa bɔn-burɛ wo bɛɛ ma ka sɛnɛ-yɔlɔkɛnu latɛgɛ Sɛnima-Sɛnima-Tinɛ bonda-dɛ rɔ. Anu ya Sɛnima-Sɛnima-Tinɛ wo rabɛn alako Marita tɔn-kenkirɛ si don nyɔ nya min. Anu ya isɛnti mintan tinɛ ladan Sɛnima-Sɛnima-Tinɛ wara la ka sɛnɛ sa wo bɛɛ ma.

²³ Anu ya ɔlifi-kɔlɔma donu bi ka fen-kanbannama fila ladan wonu na minnu munta melika la. Anu ya wonu sɔ Sɛnima-Sɛnima-Tinɛ burɔ. Wonu sɔɛ ya nunkan-nya tan bɔ.

^24-26 Melika filɛ wonu kanban kelen si nunkan-nya loli-loli bɔ le. Ka a bi anu kanban-sungban doi ma ka a sigi a kanban doi sungban la, wo ya nunkan-nya tan bɔ. Melikala muninya filɛ wonu bɛɛ rakɛn de! Anu muninyara fanan.

²⁷ Anu ya melika wonu sɔ Sɛnima-Sɛnima-Tinɛ burɔ. Anu kanbannu tafulennɛ ka konko wo kɔnɛ ratɛgɛ. Anu kanban filɛ doi tugura anu nyɔgɔn na bon-kole tɛma.

²⁸ Anu ya sɛnɛ sa melika wonu ma.

²⁹ Melika wo, tin-kuri wo, kɔn-fere wo, anu ya wonuna muninyɛ ladan dandan ma. Anu ya mɔlɔnɛ wo damasi ladan Bato-Bon-burɛ wo dandan damasi ma.

³⁰ Anu ya sɛnɛ sa bon-kole bɛɛsi ma.

³¹ Anu ya Sɛnima-Sɛnima-Tinɛ wo kankan filɛ ladan iko sɔpu dɛ ka anu kun tɛmɛ lamosɔ. Anu ya wonu nadan ɔlifi fɛrɛn-hakikɛnu na.

³² Melika wo, tin-kuri wo, kɔn-fere wo, anu ya wonu muninyɛ ladan kankan wonu ma. Anu ya mɔlɔnɛ wo damasi ladan kankan wo ma ka sɛnɛ sa mɔlɔnɛ wo bɛɛsi ma.

³³ Anu ya fɛrɛn-su minnu ma Sɛnima-Sɛnima-Tinɛ dɛ la, anu ya fɛrɛn-sufa wo le ma bɔn wo da-wɛ-kankan-kɔn la kɔnɔ a kun tɛmɛ lamosɔni ma.

³⁴ Anu ya a kankan filɛ ladan fɛrɛn-hakika-su do la minnu bɔra Lɛbanan nyamanɛ rɔ. A tɔnkɔn kelan, fɛrɛn fila, a tɔnkɔn kelan doi fanan, fɛrɛn fila. Anu ba wuli dɛ wo lakala, anu si kankan wonu takunbɛn.

³⁵ Melika wo, tin-kuri wo, kɔn-fere wo, anu ya wonuna muninyɛ ladan kankan wonu fanan ma. Anu ya mɔlɔnɛ wo damasi ladan kankan kɛnu fanan ma ka sɛnɛ sa mɔlɔnɛ wo bɛɛsi ma.

³⁶ Anu ya sansan mini Bato-Bɔn wo ma. Anu ya kuru-lɛsɛnɛnu sigi a nyɔgɔn kuma sawa-sawayɛ ma. Anu tara fɛrannu sala wonu kuma.

^37-38 Mansa Silamɛni ya san wɔrɔnfila le bɔ a sɔ tinɛ. Ala mansayɛ san nanɛ karɛ fila nyɔgɛ ma, anu ya Bato-Bɔn wo kurukɛ. Ala mansayɛ san tan-ni-kelan karɛ segin nyɔgɛ ma, anu ya Bato-Bɔn wo laban iko anu miri ye a ma nya min.