1 Mansɛnu 3 - ALLALA KUMƐ

Iyipiti Mansɛla Dunmusi Furu-Koe Mansa Silamɛni Bolo

¹ Furu-nyɔgɔnyɛ donta Mansa Silamɛni anubɛ Iyipiti mansɛ tɛma alako ka anu tɛmɛ lakandan. Mansa Silamɛni nara Iyipiti mansɛla dunmusi wo la a fa Dawudala luyi ma. Dunmusi wo tora nyɔ ha Mansa Silamɛni ya ata luyi labɔ. A ya ata mansaya-bɔn sɔ anubɛ Mari Bato-Bɔn anubɛ tarɛ min mininɛ Yerusalɛm soe ma.

² Wo wati rɔ, mɔgɛnu taranta sarakɛnu bɔla saraka-bɔ-tina-siyaman tɔ bawo Mari Bato-Bɔn ma sɔ wɛ nun.

³ Mari keninɛ Mansa Silamɛni bolo ka a fa Dawuda kin-gbɛ bi. Kɔnɔ Mansa Silamɛni ma sɔn sarakɛnu bɔla kan-tina-kelen tɔ fɔ kan-tina-siyaman.

Mansa Silamɛnita Madiyalɛ Hɛnkilimayɛ Sɔrɔn-Koe La

⁴ Lunyɛ do, Mansa Silamɛni tara Kibiyon soe burɔ ka sarakɛ bɔ Mari ye saraka-bɔ-tina-wɛ wo rɔ. A taranta saraka-mintantɛ-siyaman bɔla nyɔ nun!

⁵ Mari bɔra gbɛ rɔ Mansa Silamɛni ye kiyo rɔ Kibiyon soe burɔ ka a fɔ a ye ko, “A sɔgɛ ye i la, n ni nfen di i ma?”

⁶ Mansa Silamɛni ya a fɔ Alla ye ko, “I ya keninteya-wɛ yira n fa Dawuda la bawo a mara mɔgɔ-nyimɛ anubɛ mɔgɔ-telennɛ la i yala. I wara den-kei di a ma min bara mansayɛ kɛ a gbɛ rɔ. Wo fanan bara a yira ko a di i ye.

⁷ E, nta Mari Alla, ile le wara nde dennɛ yabɔ ka n ma mansɛ la n fa Dawuda gbɛ rɔ kaka. N ma n don-nya lɔn, n ma n bɔ-nya lɔn.

⁸ Nba, i wara n sigi ila mɔgɔ-yabɔnɛnu kun na, ado wonu siya ha ka a dan-natenbi.

⁹ Awa, i ni hɛnkili di n ma alako n si ke nya min ka mɔgɛ wonu kiti ka ko-nyimɛ anubɛ ko-yogomɛ dan-nafarɛ lɔn. Ni wo ma, n si ke mɔgɔ-sɛrɛ-wɛ kɛnu kitila kama ka mansayɛ kɛ?”

¹⁰ Mansa Silamɛni ya Alla manyinika minna ko la, wo ya Mari hɛnɛ.

¹¹ Mari ya a fɔ Mansa Silamɛni ye ko, “N si a ma iko i wara a fɔ nya min kɛ la beli i ya n manyinika hɛnkilimayɛla ko la. I ma n manyinika simayɛla ko la anubɛ nɔnfulu-tigiyɛla ko la i nyɛrɛ ye. I ma n manyinika i yogenu faga-koela ko la, fɔ ka n manyinika ko-nya-yen-koela ko la.

¹² Woletɔ n bi nala hɛnkili anubɛ lɔnnɛ dila i ma tɛban! Mɔgɔ-wo-mɔgɔ ti hɛnkili sɔrɔn duninya rɔ ka ke i rɔ.

¹³ Hali i ma n manyinika fan minnuna ko ma, n si wonu fanan di i ma, fen-tigiyɛ anubɛ gbiliyɛ, kɔni. I nyɔgɔn-takɛn ti taran mansɛnu tɛma i siyi-tele-bɛɛ kɔrɔ.

¹⁴ Ni i tagama-nya telenta n yala ka nta tɔnnu bira iko i fa Dawuda tagamanta nya min, n si siyi-yan di i ma.”

¹⁵ Nba, Mansa Silamɛni kundenta. A ya a fɔ ko, “Yaga, n bi kiyo le la nun!” A tara Yerusalɛm ka a sɔ tɔn-kenkirɛ yarɔ Marila tɔnnu bi min tɔ. A ya saraka-mintantɛnu bɔ Mari ye anubɛ yisi-kima-sarakɛnu. A ya ladiyɛ ladan ka ata mɔgɔ-banu kele ladiyɛ wo rɔ.

Hɛnkili Mayira-Koe Mansa Silamɛni Bolo

¹⁶ Lunyɛ do, musu-yɛlɛn fila kɛlɛta den-koe la. Anu tara kumɛ wo la mansɛ wara.

¹⁷ Musi kelan ko, “Nba mansɛ, mabɛ musi kɛ le ye bon kelan la ha n ya nna dan kɛ sɔrɔn.

¹⁸ Tele fila, a sawa nyɔgɛ, musi kɛ fanan ya dan sɔrɔn. Ma ye ma nyɔgɔn kuma bon kelen de la. Mɔgɔ-gbɛrɛkɛ sa ma kuma, fɔ ma mɔgɔ fila pe.

¹⁹ Su-tenbinɛ, musi kɛ ya a samagboya ka a sa ala dan kuma. Ala dan fagara.

²⁰ Wo tumɛ n bi kinɔgɔ rɔ, a ya a lawuli ka nta den-kɛndɛ bi n bu kɔrɔ ka ata den-faganɛ wo sa wo gbɛ rɔ.

²¹ N ya n nawuli sɔgɔma. N ko n ni nna dan susun kɔnɔ n ya a yen a faganɛ. N ya a yakɔrɛ mafɛlɛn tumɛ min ka a lakɔrɔsi, n ya a lɔn yati, ko nta den ma kɛ la muk!”

²² Kɔnɔ musi doi ya a sɔsɔ. A ya a fɔ ko, “Ade! Ntɛ le den-kɛndɛ kɛ la! Atɛ le den-faganɛ wo la.” Musu fɔlɔtɛ fanan ko, “Ade! Atɛ le den-faganɛ kɛ la. Ndetɛ le den-kɛndɛ kɛ la!” Musu filɛ kɛnu tora sɔsɔla mansɛ yakɔrɔ wo nya na le.

²³ Wo kɔma, Mansa Silamɛni ya a fɔ anu ye ko, “Bawo wo ye kɛlɛla den-kɛndɛ kɛ kuma, kɛ ko, atɛ le, kɛ fanan ko, atɛ le.

²⁴ Nba, wo ni a to, anu ni na faan la!” Anu nara faan la tumɛ min,

²⁵ mansɛ ko, “Wo ni den-kɛndɛ kɛ ratɛgɛ kundu fila la. N ni a tala wole mɔgɔ filɛ tɛma.”

²⁶ Kɔnɔ kinikinɛ donta dan wo na-bɛrɛbɛrɛ yisi rɔ ala danla ko la. A ya a fɔ mansɛ ye ko, “E, mansɛ, i yandi, i kana dan kɛ faga! A di n ta-nyɔgɛ kɛ ma.” Kɔnɔ musi minta ma dan kɛ la, wo ya a fɔ mansɛ ye ko, “Kɛ ti to mɔgɔ-wo-mɔgɔ ye. I ni a fara fila la!”

²⁷ Woletɔ mansɛ ya a fɔ ko, “Hali wo ma dan kɛ faga. Musu fɔlɔtɛ min ya a fɔ n ye ko n kana dan kɛ faga, wo ni dan kɛ don wo bolo. Dan kɛ na-bɛrɛbɛrɛ le wo la.”

²⁸ Isirɛla mɔgɛnu ya kiti wo lamɔɛn tumɛ min, mansɛ ya min tɛgɛ, anu kawara mansɛ ma. Anu ko, “Alla le ya kiti-tɛgɛ-hɛnkili kɛ di a ma.”