1 Mansɛnu 20 - ALLALA KUMƐ

Mansa Ehabu anubɛ Siriyanu Kɛlɛ-Koe

¹ Siriya Mansa Bɛnhedadi ya ala kɛlɛ-dannu kundɛn. A ta-nyɔgɔ-mansa bi-sawa ani mansa fila (32) fanan sɛbɛ donnɛ a fɛ kɛlɛ-kɛ rɔ. Wonubɛ anuna soeenu anubɛ anuna kirindinu, anu dama tara bui Samariya soe ma ka nyɔ-mɔgɛnu kɛlɛ.

² Ale Mansa Bɛnhedadi ya kilayɛnu nata Isirɛla Mansa Ehabu ma ka a fɔ a ye ko

³ ala sɛnɛ wo, ala wodi-gbɛ wo, ala musu-nyima wo, ala den-tagbɛlɛma wo, a ni wonu don ale mansɛ bolo. Kilayɛnu tara wo fɔ Mansa Ehabu ye.

⁴ Mansɛ fanan ya a fɔ kilayɛ wonu ye ko, “Wo ta a fɔ n tigi Mansa Bɛnhedadi ye ko n bara sɔn. Atɛ le mabɛ n halala-fannu na.” Kilayɛ wonu tara wo fɔ mansɛ ye.

⁵ Wo kɔma, Mansa Bɛnhedadi ya ala kilayɛ wonu sɔ Mansa Ehabu wara tun. Kilayɛ wonu tara a fɔ a ye ko, “Mansa Bɛnhedadi ko a ara a fɔ i ye nun ko ila sɛnɛ wo, ila wodi-gbɛ wo, ila musinu wo, ila dannu wo, i ni wonu don a bolo.

⁶ Ale Mansa Bɛnhedadi ko kɛ-nyɔgɔn-tumɛ sina, a ye ala mɔgɔ-banu nanala. Wonu si ale mansɛla bolɔn anubɛ ala mɔgɔ-banuna bɔnnu nafɛlɛn. Anu ya fen-koloma fenfen yen, anu si wo bi.”

⁷ Isirɛla Mansa Ehabu ya ala nyamanita-mɔgɔ-banu kele kan-tina-kelen. Wonu ke a ma, a ya a fɔ anu ye ko, “Wo ara la a la gbɛ serr, ko ma tinya-sɔgɛ ara Mansa Bɛnhedadi bira. A ara kilayɛ lana n ma nun ko nna musinu wo, nna dannu wo, nna sɛnɛ wo, nna wodi-gbɛ wo, n ni wo bɛɛ don a bolo, ado nde fanan bara ban sɔnna wo ma.”

⁸ Ala nyamanita-mɔgɛnu anubɛ ala mɔgɔ-banu ya a fɔ a ye ko, “I kana i tole masɔ a la hali ka fen di a ma.”

⁹ Wo kɔma, Mansa Ehabu ya a sara Mansa Bɛnhedadila kilayɛnu na ko, “Wo ta a fɔ n tigi ye ko a fɔlɔtɛ wo, n bara sɔn a bolo kɔnɔ a fila nyɔgɛ kɛ, n ma sɔn wo ma a bolo tun.” Anu tara wo lake Siriya mansɛ wo ma.

¹⁰ Mansɛ wo ya kilaya-gbɛrɛkɛ don anu bolo tun. Kilayɛ wonu ke Isirɛla mɔgɛnuna Mansa Ehabu ma, anu ya a fɔ a ye ko, “Mansa Bɛnhedadi ko ni a ti na kɛlɛ-den-siyamɛnu na ka ila soe kɛ bunden, a ko alamɛ ala bɛsɛnu ya a gbesi a rɔ, ado a ko hali ila soe kɛ gbangban ti anu bolo tabɔ.”

¹¹ Mansa Ehabu ya kilayɛ wo kɔfili a ko, “Wo ta a fɔ Mansa Bɛnhedadi ye ko kɛlɛ-den-bɛrɛbɛrɛ ti a nyɛrɛ matɔgɔ fɔ kɛlɛ wa ka-a-la.”

¹² Kilayɛ wonu sɛgira ka wo fɔ Mansa Bɛnhedadi ye. Kilayɛ wonu bi anu dantɛgɛla mansɛ ye tumɛ min, wo ya a taran, anubɛ a ta-nyɔgɔ-mansɛnu bi gbɛɛ-minyɛ kun na anuna fani-bɔnnu na. Mansa Bɛnhedadi ya a fɔ ala kɛlɛ-dan wonu ye ko anu ni anu mabɛn ka ta Mansa Ehabu anubɛ ala mɔgɛnu kan ma. Anu ya anu tabɛn.

¹³ Wati kelan wo nyɛrɛ rɔ, nɛbi do tara Mansa Ehabu taran. A ya a fɔ a ye ko, “Mari ko i kana kilan kɛlɛ-den-siyamɛ wonu na. A ko a si a ma, i ni nɔ-ko sɔrɔn wonu ma bi. I si a lɔn worɔ ko Mari le ale la.”

¹⁴ Mansa Ehabu ya nɛbi wo manyinika, a ko, “Yon si sɔ kɛlɛ yarɔ?” Nɛbi wo ya a fɔ a ye ko, “Mari ko kɛlɛ-den-bulan minnu bi ila sigisɔn-mansɛnu kɔrɔ, wonu denu bi sɔla kɛlɛ yarɔ.” Mansɛ ya ale nɛbi manyinika tun ko, “Yon bi sɔla kɛlɛ-den-toenu yarɔ?” Nɛbi ko, “Ile, yɔ!”

¹⁵ Ale Mansa Ehabu ya ala kɛlɛ-den-bulan wonu kele. Kɛlɛ-dan wonu yirika bɛnta mɔgɔ kɛmɛ fila, mɔgɔ bi-sawa ani mɔgɔ fila ma (232). Wo kɔma, a ya Isirɛla kɛlɛ-den-toe wonu kele. Wonu fanan yirika bɛnta mɔgɔ waga wɔrɔnfila ma (7,000).

¹⁶ Isirɛla kɛlɛ-dan wonu tara bui Siriyanu ma tele-latelen-wati. Wo ya a taran, Mansa Bɛnhedadi anubɛ a ta-nyɔgɔ-mansa bi-sawa ani mansa filɛ wonu bi anu kun tafin tinɛ anuna fani-bɔnnu na.

¹⁷ Kɛlɛ-den-bulan wonu sɔra anu yarɔ iko anu ya a rabɛn nya min. Mansa Bɛnhedadila kila-makandannɛnu ya anu yen nala tumɛ min, anu tara anu dantɛgɛ a ye. Anu ko, “Kɛlɛ-den-kurɔn do ara bɔ Samariya soe burɔ.”

¹⁸ Mansa Bɛnhedadi ya a fɔ anu ye ko, “Ni anu nara kɛlɛ-kɛ-tinɛ le, ni anu nara a nyɛrɛ niyi latenbi tinɛ le, wo ni anu bira kɔnɔ wo kana ko ma anu na mumɛ!”

¹⁹ Kɛlɛ-den-bulannu sɔnɛ yarɔ. Isirɛla kɛlɛ-den-toenu bi anu kɔma.

²⁰ Kɛlɛ-den-bulan wonu ya Siriyanu taran anu yarɔ, bɛɛ ya a kɛlɛ-kɛ-nyɔgɔ faga. Siriya-toenu ya anu buri. Isirɛla kɛlɛ-dannu ya anu sagaran. Kɔnɔ Mansa Bɛnhedadi anubɛ ala kɛlɛ-den-so-laburilɛ donu ya anuna soeenu bi ka anu buri.

²¹ Isirɛla Mansa Ehabu anubɛ ala kɛlɛ-den-toenu bɛnta Siriyanu na anubɛ anuna soee minnu bi kirindinu saganna. Anu ya mɔgɔ-siyaman faga wonu tɔ ka anuna soeenu anubɛ anuna kirindinu kasara.

²² Kɛlɛ wo kanɛ a la, nɛbi wo tara a fɔ Mansa Ehabu ye tun ko, “Ila kɛlɛ-dannu makofu. I ni anu makaran kɛlɛ la bawo ka-nyɔgɔ-tumɛ yari, Siriya mansɛ wonu si na wo kɛlɛ tinɛ tun.”

Mansa Ehabu anubɛ Siriyanu Kɛlɛ-Koe Tun

²³ Mansa Bɛnhedadila mɔgɔ-banu tara a fɔ a ye ko, “Ni i ya a yen, Isirɛla mɔgɛnu ya ma nɔ kɛlɛ rɔ bawo anuna allanu denu bi kɔnkɛnu kuma le dɔrɔn. Kɔnɔ ni ma tara anu kɛlɛ lɛɛ rɔ, ma si anu nɔ serr!

²⁴ I ni mansa bi-sawɛ ani mansa filɛ wonu nabɔ kɛlɛ-den-kunyɛ la. I ni kɛlɛ-den-kun-bɛrɛ donu sigi anu gbɛ rɔ.

²⁵ Kɛlɛ-dan minnu tora kɛlɛ rɔ, i ni kɛlɛ-den-kurɛ donu bi minnu si to wonu gbɛ rɔ. Ila kirindinu anubɛ soee minnu nyɔgɔn tora kɛlɛ rɔ, i ni wo nyɔgɔn nyini. Wo kɔma, ma si ta Isirɛla mɔgɛnu kɛlɛ lɛɛ rɔ ka anu nɔ.” Mansa Bɛnhedadi sɔnta anuna kumɛ wo ma.

²⁶ Wo san nasɛgi, a ya ala kɛlɛ-dannu kele. Anu tara Afɛki soe kan ma Isirɛla mɔgɛnu kɛlɛ tinɛ.

²⁷ Isirɛla kɛlɛ-dannu ya wo lamɔɛn min kɛ, wo le ya a ma, wonu fanan ya anu nadɛn kan-tina-kelen ka anuna kɛlɛ-kɛ-mirannu bi. Anu tara anu sɔ-bole rabɛn lɛɛ rɔ Afɛki soe dafɛ ka anu tatala kurun fila la. Anu ya anu ya-lamunun Siriyanu na. Kɔnɔ anu kurun filɛ kɛ dɔgɔyanɛ Siriyanu yala iko baanu ba anu nadɛn kurun fila la. Kɔnɔ Siriyanu siya nyamanɛ wo rɔ iko mɛyannu.

²⁸ Nɛbi do tara a fɔ Mansa Ehabu ye ko, “Mari ko bawo Siriyanu bi a fɔla ko Isirɛlata Alla ye kɔnkɛnu dɔrɔn kuma, a sa lɛɛnu tɔ, wo le ye a mala, a ye sɛnbɛ dila Isirɛla mɔgɛnu ma Siriyanu kuma. Mari ko wo si a ma, wobɛ ila mɔgɛnu ni a lɔn ko Mari le ale la.”

²⁹ Tele wɔrɔ dɛgɛdɛgɛ, Siriyanu anubɛ Isirɛla mɔgɛnu siginɛ anuna dagɛnu tɔ. Anu yɛ bɛnnɛ anu nyɔgɔn ma. A tele wɔrɔnfila nyɔgɛ ma, anu ya kɛlɛ dabira. Isirɛla kɛlɛ-dannu ya Siriya kɛlɛ-dan mɔgɔ waga kɛmɛ (100,000) faga tele kelan wo kɔrɔ.

³⁰ Siriya-toenu ya anu buri ka ta Afɛki soe burɔ. Soe wo tarɛ kerita anu kuma. Siriya mɔgɔ waga mogan-ni-wɔrɔnfila (27,000) fagara anu tɔ nyɔ. Mansa Bɛnhedadi ya a buri tala Afɛki soe burɔ. A tara a nyɛrɛ dogon tonke do rɔ bɔn burɔ.

³¹ Ala mɔgɔ-banu tara a fɔ a ye ko, “Ma ye a lamɔɛnna ko Isirɛla mansɛnu si kinikini de mɔgɔ ma. Ni i si sɔn, ma ni kasa-kurɛ kiri ma la ka yili kiri ma kan na ka a yira ko ma ara famayigi ma yogenu kɔrɔ. Ma ni ta Mansa Ehabu wara. Tumado, a ti i faga.”

³² Anu ya kasa-kurɛ kiri anu na ka yili kiri anu kan na. Anu tara Mansa Ehabu warɛ. Anu ya a fɔ a ye ko, “Ila wɔli-kɛlɛ Bɛnhedadi ya ma lana a niyi lakisi-koe rɔ i wara.” Mansa Ehabu ya a fɔ anu ye ko, “Ha bi, a ye a niyi la? Wo kin, n na-kelen-nyɔgɛ le ale la.”

³³ Mansa Ehabu ara a fɔ min kɛ ko, “N na-kelen-nyɔgɛ,” Mansa Bɛnhedadila mɔgɔ-banu ya a lɔn wo le ma ko anu bara kanan. Anu donta a fɔɛ rɔ ko, “I na-kelen-nyɔgɔ-bɛrɛbɛrɛ le.” Mansa Ehabu ya a fɔ anu ye ko, “Wo ni na a la yan.” Anu nanɛ a la, Mansa Ehabu ya a fɔ a ye ko, “Yɛlɛ n fɛ kirindi rɔ.” A yɛlɛta.

³⁴ Mansa Bɛnhedadi ya a fɔ Mansa Ehabu ye ko, “N fa ya soe minnu bi i fa bolo, n si wonu nasɛgi i ma tun. I ni fen mayira tinɛ labɔ nde halala-soe Damasika burɔ iko n fa ya fen mayira tinɛ labɔ i fata soe Samariya burɔ nya min.” Wo le ya a ma, Mansa Ehabu ya a fɔ a ye ko, “Ka a tɛgɛ i kuman-kan kɛ ma, n si i boloka.” A ya a boloka bawo anu bara lanyiri kiri anu nyɔgɔn tɛma.

Mansa Ehabu Hakɛ Yira-Koe A la Nɛbi Bolo

³⁵ Nɛbi kelen ya a fɔ a ta-nyɔgɛ do ye nɛbinu tɛma ko, “N tɔntɔn” bawo Mari ara a fɔ a ye wo nya. Kɔnɔ a ta-nyɔgɛ wo ya a ban wo ma.

³⁶ Ale nɛbi ya a fɔ a ta-nyɔgɛ wo ye ko, “Bawo i wara i ban n tɔntɔn-koe ma ka Marita kumɛ tinya, i tenbi i kian bɔla yan kawo, yarɛ ye i birala.” Wo bɔɛ nyɔ kawo, yarɛ ya a bira ka a faga.

³⁷ Ale nɛbi kelan wo tara kei do taran ka a fɔ a ye ko, “N tɔntɔn.” Kei wo ya a tɔntɔn a yakɔrɛ ma. A tanbanta.

³⁸ Ale nɛbi ya a yakɔrɛ wo makiri alako anu kana a lɔn. A tara a sɔ kilɛ la ka Isirɛla mansɛ makɔni.

³⁹ Mansɛ wo tenbimatoe a la, ale nɛbi ya mansɛ wo rakele, a ko, “N tigi, wo tumɛ ma ye kɛlɛ rɔ, kɛlɛ-dan do nara ma yoge do la ka a don n bolo ko n ni a makandan. A ko ni wo ya a buri n bolo, a ko, n si faga a gbɛ rɔ. Ni wo ma, n ni wodi-gbɛ labɔ a niyila ko la minna gbiliyɛ anubɛ fui-fan bɔrɔ-talɛ rakɛn de!

⁴⁰ Kɔnɔ a ya a taran, n bi koe do mala, wo ya a buri n bolo.” Mansa Ehabu ya a fɔ a ye ko, “Nba, i wara ban i nyɛrɛ kiti tɛgɛla. Fɔ i wa a sara le gbɛ!”

⁴¹ Tiriyante wo rɔ, nɛbi wo ya kurɛ bɔ a yakɔrɛ ma, Mansɛ Ehabu wo nara to a lɔnna ko nɛbi do le.

⁴² Nɛbi wo ya a fɔ mansɛ ye ko, “Mari ko bawo ale ya a fɔ i ye ko i ni mɔgɛ min faga, ile ara wo kɛndɛ boloka, wo ara ta, Mari ko fɔ i wa faga mɔgɛ wo gbɛ rɔ. Min sanɛ wo kuma bawo ila kɛlɛ-dannu bara anu yogenu kɛndɛ boloka, Mari ko fɔ ila kɛlɛ-dan wonu ba kasara pɔ!”

⁴³ Hɔnyɛ sigira Mansɛ Ehabu kan la. A sɛgira a warɛ Samariya soe burɔ, yisi-tinya bolo.