1 Mansɛnu 2 - ALLALA KUMƐ

Dawuda Masara-Koe Silamɛni Na

¹ Mansa Dawuda saya-wati gbɛrɛnta tumɛ min, a ya a fɔ ala den Mansa Silamɛni ye ko,

² “N bi tala duninya-mɔgɛ bɛɛsi ta tinɛ le kɛ la. Wola ko la, i sɛbɛ don ka i kerinteya.

³ Ita Mari Alla ya tɔn minnu di Nɛbi Musa ma, i ni wonubɛ ata kumɛ bɛɛsi bira, woletɔ i wara-koe si sabati.

⁴ Wo si a ma, Mari Alla ni a hɛnkili to lanyiri wo ko a ya min fɔ ndela ko la. A ya a fɔ nun ko ni n kegeyɛnu mara mɔgɔ-latelennɛnu na ale yala ka bila a fɛ anu yisi bɛɛ la, a ko nna mansaya-bɔn si to sɛnbɛ rɔ Isirɛla mɔgɛnu tɛma.

⁵ “Sɛruya Yohabu ara min ma n na, i ni i yili to wo ko. A ya nna kɛlɛ-den-kun fila faga yisi-kima-wati le tɔ, Nɛrila den Abina anubɛ Yɛtala den Amasa, kɔni. Wonu bara mɔgɔ-fagɛ kɛ nun kɛlɛ rɔ kɔnɔ ale Yohabu ya a tayili sara anu na wola ko la ka anu denu faga yisi-kima-wati le tɔ. A ara mɔgɔ filɛ minnu faga kɛ la, wonu ma ko tinya. Kaka, wonu dunɛ ara to nde kuma. N yisi tɔrɔnɛ wola ko la.

⁶ Kaka, min di i ye, i ni wo ma a la. I kana sɔn, a kun-gbɛnɛ ni faga a nyɛrɛ ma.

⁷ “Kɔnɔ i ni ila keninteyɛ yira Basilayila dannu na minnu siginɛ Kaliyadi nyamanɛ rɔ. N ya n buri i kɔrɔ Abasalɔm kɔrɔ tumɛ min, wonu denu ya n tabira a kilɛ fɛ. Woletɔ i ni i hɛnkili to wonu ko.

⁸ “Nba, Kɛrala den Simayi min bɔra Bahurim soe burɔ Bɛnyamɛ bɔnsɔn nyamanɛ rɔ, wo tumɛ n tanɛ Mahanama soe burɔ, wo le ya n mɔɛn bɛrɛkɛ! Kɔnɔ a nara n taran Yorodan bɛ dafɛ tumɛ min ka n madiya, n ya n keli a ye Mari rɔ ko n ti a faga wulɔn.

⁹ Kɔnɔ hɛnkilimɛ le i la. I kana a tɔrɔbɛlɛ to. I ni a faga iko a di i ye nya min.”

Dawuda Faga-Koe

¹⁰ Wo kɔma, Mansa Dawuda ya so-sɛgi-kɛ. Anu ya a togon a halala-luyi ma Yerusalɛm soe burɔ.

¹¹ Dawuda ya mansayɛ kɛ Isirɛla nyamanɛ kuma san bi-nani kɔrɔ. San wɔrɔnfila kɔrɔ, a siginɛ Hiburɔn soe burɔ. San bi-sawa ani san sawa kɔrɔ, a siginɛ Yerusalɛm.

¹² Silamɛni mara mansɛ la a fa Dawuda gbɛ rɔ. Ata mansayɛ ya sɛnbɛ sɔrɔn ka sabati.

Adonaya Faga-Koe

¹³ Hagiti-Adonaya tara Mansa Silamɛni na Batasiba wara. Batasiba ya a manyinika ko, “Nfen mara? I nara a nyimɛ la, wa?” Adonaya ko, “Ɔn! N ma na a yogomɛ la

¹⁴ kɔnɔ kumɛ do ye n bolo ka a fɔ i ye.” Batasiba ko, “Awa. I dantɛgɛ.”

¹⁵ Adonaya ya a fɔ a ye ko, “I ya a lɔn ko mansayɛ kɛ, ntɛ le nun. I ya a lɔn fanan ko Isirɛla mɔgɛnu sɔnta nta mansayɛ ma nun. Hali wo, anu bara a yɛlɛma ka a ma n dɔgɔtɛ la kamasɔrɔn Mari sɔnta wo le ma.

¹⁶ A sɔgɛ ye n na, n ni i manyinika ko kelen ma. I yandi, i kana i ban wo ma.” Batasiba ya a fɔ a ye ko, “Awa, ale le wo la.”

¹⁷ Nba, Adonaya ko, “I yandi, i ni kuma Mansa Silamɛni ye kamasɔrɔn a ti a ban ile bolo. Abisagi min bɔra Sunam soe burɔ, a ni wo di n ma. N ni a ma nna musi la.”

¹⁸ Batasiba ko, “N si kuma mansɛ ye ila ko la.”

¹⁹ Woletɔ Batasiba tara Mansa Silamɛni wara ka kuma a ye Adonayala ko la. Mansɛ ya a lakɔɛnma. A ya a kunyɛ madu a na ye ka a kɔndɔn. Wo kɔma, a ya a mayigi ka sigi-fan do makele a nala ko la. Wo sigira a bolo-nyimɛ rɔ.

²⁰ A na ya a fɔ a ye ko, “N bi kuma-nɛ fɔla i ye. I kana i ban wo ma.” Mansɛ ya a fɔ a na ye ko, “Awa, a fɔ. N ti n ban.”

²¹ Wo le ya a ma, a na ya a fɔ a ye ko, “I ni Sunam kɛ Abisagi di i kɔrɔ Adonaya ma. A ni a ma ala musi la.”

²² Mansa Silamɛni ya a fɔ a na ye ko, “Nfenna i ye Abisagi manyinikala Adonayala ko la? Ni a sɔgɛ ye i la, n ni Abisagi di Adonaya ma, a fisa, i ni mansayɛ fanan manyinika ala ko la kamasɔrɔn n kɔrɔ-kina le ale la. Ile ma a lɔn ko ala fasalɛ le Saraka-Masɔla Abiyatari anubɛ Yohabu la minnu sa nta mansayɛ rɔ?”

²³ Wo le ya a ma, Mansa Silamɛni ya a keli Mari Alla rɔ ko, “Ni n ma Adonaya faga nyinikalɛ kɛla ko la, alamɛ Mari ya n gbesi a rɔ.

²⁴ A ye mabɛ ale Mari Alla-nimɛ tɛma min ya n sigi n fa Mansa Dawuda gbɛ rɔ, ale Alla min ya ala lanyiri wo kanbali ka mansayɛ di mabɛ n bɔnsɔn ma. Woletɔ n bara n keli Mari-nimɛ rɔ, Adonaya si faga bi, yɔ!”

²⁵ Mansa Silamɛni ya Bɛnaya sɔ ka ta Adonaya faga. Woletɔ Bɛnaya kɛra a ma ka a faga.

Abiyatari Gben-Koe anubɛ Yohabu Faga-Koe

²⁶ Mansɛ ya a fɔ Saraka-Masɔla Abiyatari ye ko, “I ni ta i warɛ Anatɔti soe burɔ. A bɛnnɛ ile fanan ni faga nun kɔnɔ n ti i faga kaka kamasɔrɔn ile le ya Mari Allata tɔn-kenkirɛ maduni n fa Mansa Dawuda ye. I ya tɔrɔyɛ sɔrɔn n fa fɛ.”

²⁷ Woletɔ Mansa Silamɛni ya Abiyatari labɔ saraka-masɔ-wɔlɛ rɔ ka Mari Allala kumɛ wo ni bɔ-a-la a ya min fɔ Saraka-Masɔla Ilai bɔnsɔnla ko la Sailo soe burɔ.

²⁸ Yohabu ya a lamɔɛn ko Mansa Silamɛni ya Adonaya faga tumɛ min, a burimatoe tara saraka-bɔ-tinɛ bolon filɛ bira Marita Fani-Bɔn yarɔ alako a ni kisi. (Yohabu sɔra Adonaya fɛ nun kɔnɔ a ma sɔ Abasalɔm fɛ.)

²⁹ Anu ya a fɔ Mansa Silamɛni ye ko, “Yohabu ara ta Marita Fani-Bɔn la. A sɔnɛ saraka-bɔ-tinɛ dafɛ.” Nba, Mansa Silamɛni ya wo lamɔɛn nkɛkuna, a ya Bɛnaya lata Yohabu faga tinɛ.

³⁰ Bɛnaya tara Marita Fani-Bɔn la. A ya a fɔ Yohabu ye ko, “Mansɛ ye a fɛ ko i ni bɔ yan.” Kɔnɔ Yohabu ya a fɔ a ye ko, “Ade, n ti bɔ yan, fɔ ni n fagara yan.” Bɛnaya sɛgira ka wo fɔ mansɛ ye.

³¹ Mansɛ ya a fɔ Bɛnaya ye ko, “I ni a ma iko Yohabu ara a fɔ i ye nya min. I ni a faga ka a togon. Woletɔ Yohabu ya mɔgɛ minnu faga, ado anu ma ko tinya, wonu niyi-ko-dunɛ ti to malebɛ n fala mɔgɛnu kuma.

³² Mari si dunɛ wo sigi Yohabu kuma bawo a ya mɔgɔ-telenni fila faga, Nɛrila den Abina anubɛ Yɛtala den Amasa, kɔni. (Isirɛla mɔgɛnuna kɛlɛ-den-kunyɛ le Abina kɛ la nun. Yudala mɔgɛnuna kɛlɛ-den-kunyɛ le Amasa kɛ la nun.) N fa ma ko lɔn kɛnu faga-koe rɔ, ado mɔgɔ filɛ kɛnu fisa Yohabu ko.

³³ Woletɔ dunɛ wo si to sigila Yohabu anubɛ ala kebilɛ kuma habadan! Kɔnɔ Mansa Dawuda anubɛ ata kebilɛ minnu bi sigila a gbɛ rɔ, wonu si to yisi-kimɛ sɔrɔnna Mari bolo habadan!”

³⁴ Wo kɔma, Bɛnaya tara Marita Fani-Bɔn la ka Yohabu faga. Anu tara a togon a warɛ wulɛ rɔ.

³⁵ Mansa Silamɛni ya Bɛnaya sigi kɛlɛ-dannu kun na Yohabu gbɛ rɔ. A ya Saraka-Masɔla Sedoki yabɔ ka a sigi Abiyatari gbɛ rɔ.

Simayi Faga-Koe

³⁶ Wo kɔma, Mansa Silamɛni ya mɔgɛ do sɔ Simayi kele tinɛ. Simayi nanɛ, mansɛ ya a fɔ a ye ko, “Bɔn sɔ i nyɛrɛ ye Yerusalɛm soe burɔ ka sigi nyɔ. I kana i kunyɛ labɔ Yerusalɛm soe burɔ ka ta kan-bo-kan.

³⁷ Ni i ya Kidirɔn yi tɛgɛ tuma-wo-tuma, i ni a lɔn worɔ serr, ko fɔ i wa faga, ado ni i fagara, i nyɛrɛ gbɛ le wo la.”

³⁸ Simayi ya a fɔ mansɛ ye ko, “Mansɛ, i wara min fɔ kɛ la, wo kin. Iko i wara a fɔ n ye nya min, n si a ma wo nya.” Wo le ya a ma, Simayi ya wati-yan bɔ Yerusalɛm.

³⁹ San sawa kɔma, Simayila yɔɔn fila ya anu buri ka ta Makala den Mansa Akisi wara Kati soe burɔ. Mɔgɛ do ya wo fɔ Simayi ye.

⁴⁰ Wo le ya a ma, Simayi ya ala sofɛlɛ bi ka ta ala yɔɔnnu nyini tinɛ Mansa Akisi wara Kati soe burɔ. A ya anu yen tumɛ min, a ya anu bi ka sɛgi anu na a warɛ.

⁴¹ A lamɔɛn Mansa Silamɛni bolo ko Simayi ara ta Kati soe burɔ ka sɛgi tun,

⁴² a ya Simayi kele. Simayi nanɛ, mansɛ ya a fɔ a ye ko, “N ma a fɔ i ye nun Mari Alla yala ko i kana bɔ Yerusalɛm soe burɔ? N ma a fɔ ko ni i bɔra soe kɛ rɔ tumɛ min, i si faga? I wara nyina kumɛ kɛ ko, wa? I ma a fɔ nun ko i si kumɛ wo bira?

⁴³ I wara lanyiri kiri Mari Alla ye nna kumɛ kɛ minna ko la, nfenna i ma wo bira?”

⁴⁴ Mansɛ ya a fɔ Simayi ye tun ko, “Ile nyɛrɛ ya a lɔn i ya ko-yogomɛ min ma n fa la. Wola ko la Mari Alla si ila ko-yogomɛ wo sara i la.

⁴⁵ Kɔnɔ Alla si duwa nde, Silamɛni ye. Mari si to n fa Dawudala mansaya-bɔn lasabatila burubukai!”

⁴⁶ Ale mansɛ ya Bɛnaya lata ka Simayi faga. Woletɔ Bɛnaya kɛra a ma ka a faga. Silamɛnita mansayɛ yili masɔra.