1 Mansɛnu 16 - ALLALA KUMƐ

¹ Mari ya a fɔ Hananila den Nɛbi Yehu ye ko, “I ni ta a fɔ Mansa Beyasa ye ko

² fenfen ma ale la nun kɔnɔ nde, Mari ara a ma mansɛ la Isirɛla mɔgɛnu kun na. A ye hakɛ kɛla kaka iko Yɛrabowami min ya nta mɔgɛnu nadon hakɛ rɔ nya min nun. A fɔ a ye tun ko ala hakɛ ara a ma, n fonde ara bɔ.

³ N si anubɛ ala denbayɛnu ban dugu-kole kuma iko n ya Yɛrabowami anubɛ ala denbayɛnu ma nya min.

⁴ Ala denbayɛ fenfen ba faga soe tɛma, a fɔ a ye ko wulinu denu bi wo suyi dɔnna. Minnu bi fagala binyɛ rɔ, konanu denu bi wonu fanan suyi dɔnna.”

⁵ Mansa Beyasa ya koe min bɛɛsi kɛ Isirɛla nyamanɛ rɔ wo tumɛ a ye mansayɛ la, katarala a ya ata mansayɛ kɛ sɛnbɛ sufa min na, anu ya wo damasi sɛbɛ Isirɛla mansɛnuna buku do rɔ.

⁶ Mansa Beyasa fagara tumɛ min, anu ya a togon Tirisa soe burɔ. Ala den Ila sigira a gbɛ rɔ.

⁷ Bawo Mansa Beyasa ara hakɛ kɛ Mari la, woletɔ Mari ya sarakanɛ kɛ don Nɛbi Yehu bolo. Nɛbi Yehu tara wo fɔ Mansa Beyasa ye. Mansa Beyasa ya ko-yogoma siyamɛ ma iko Mansa Yɛrabowami ya a ma nya min nun. Wo kɔma, a sɛgira Mansa Yɛrabowamila denbayɛ damasi fagala min kɛ, wo le ya a ma, Mari diminyara a ma.

Isirɛla Mansa Ila Wara-Koe

⁸ Esata mansayɛ san mogan-ni-wɔrɔ nyɔgɛ Yuda nyamanɛ kun na, Mansa Beyasala den Ila mara mansɛ la Isirɛla mɔgɛnu kun na. San fila kɔrɔ, Ila ye mansayɛ la. A siginɛ Tirisa soe burɔ.

⁹ Mansa Ilala kɛlɛ-den-kunyɛ do ye nyɔ nun min bi ala kirindinu fan kelan kun na. Kɛlɛ-den-kunyɛ wo tɔgɛ le Simiri. Ale Simiri ya yanfɛ rabɛn ale Mansa Ila ma. Mansɛla bonna-wɔli-kɛlɛnuna kun-tigi do ye nyɔ, wo tɔgɛ le Arasa. Wo ya a taran, ale Mansa Ila ye Arasala bɔn la Tirisa soe burɔ. A ara gbɛɛ min furr, ha gbɛɛ ya a bira.

¹⁰ Simiri wo wulita a kan ma ka ta ale mansɛ faga nyɔ. Simiri sigira Mansa Ila gbɛ rɔ. Mansa Esa min bi Yuda nyamanɛ rɔ, kɛ mara wota mansayɛ san mogan-ni-wɔrɔnfila nyɔgɛ le ma.

¹¹ Simiri kɛ mɛ mansɛ la, a ya Mansa Ila fa Mansa Beyasala denbayɛ bɛɛsi faga. Mansa Beyasa na-kelen-nyɔgɔ wo, a diyana-mɔgɔ wo, a ya wo bɛɛsi faga.

¹² Mansa Simiri ya Mansa Beyasa na-kelen-nyɔgɛ bɛɛsi faga iko Mari ya a fɔ Nɛbi Yehu ye nya min nun.

¹³ Mari diminyara Mansa Beyasa anubɛ ala den Mansa Ila ma bawo anu bara bɛsɛ kɔ ka Isirɛla mɔgɛnu nadon hakɛ rɔ fanan.

¹⁴ Mansa Ila ya koe min bɛɛsi ma Isirɛla nyamanɛ rɔ wo tumɛ a ye mansayɛ la, anu ya wo damasi sɛbɛ Isirɛla mansɛnuna buku do rɔ.

Isirɛla Mansa Simiri Wara-Koe

¹⁵ Esata mansayɛ san mogan-ni-wɔrɔnfila nyɔgɛ Yuda nyamanɛ kun na, Simiri fanan mara mansɛ la Isirɛla mɔgɛnu kun na. A siginɛ Tirisa soe burɔ. Tele wɔrɔnfila pe, Simiri ye mansayɛ la. Min mara wulɔn, wo le kɛ la. Isirɛla kɛlɛ-dannu tanɛ Kibɛtɔn soe kan ma Filisitinuna nyamanɛ rɔ,

¹⁶ anu ya a lamɔɛn anuna dagɛ rɔ ko Mansa Simiri ara yanfɛ don anuna Mansa Ila ma ka a faga. Wo le ya a ma, anu ya anuna kɛlɛ-den-kunyɛ Hɔmɔri ma anuna mansɛ la nyɔ rɔ.

¹⁷ Hɔmɔri wonubɛ ala kɛlɛ-dannu bɔra Filisitinuna nyamanɛ rɔ. Anu tara bui Tirisa soe ma.

¹⁸ Ale Mansa Simiri ya a yen min kɛ ko kɛlɛ-dan wonu bara na bui Tirisa soe ma a siginɛ kan min, a tara kan-tina-latankanɛ do rɔ ala bolɔn burɔ. Mansa Simiri ya tɛ tugun nyɔ la. Tɛ ya nyɔ mintan gburr! Ale tora tɛ rɔ.

¹⁹ Ni i ya a yen, kɛ damasi mara a la, a mara bawo ale ara hakɛ kɛ Mari la ka Isirɛla mɔgɛnu don hakɛ rɔ iko Mansa Yɛrabowami ya a ma nya min nun. Woletɔ Mari ma sewa Mansa Simiri wara-koe rɔ.

²⁰ Mansa Simiri ya koe min bɛɛsi ma Isirɛla nyamanɛ rɔ wo tumɛ a ye mansayɛ la, katarala ala yanfanteyɛ ma mansaya-koe rɔ, anu ya wo damasi sɛbɛ Isirɛla mansɛnuna buku do rɔ.

Isirɛla Mansa Hɔmɔri Wara-Koe

²¹ Isirɛla mɔgɛnu tafarata kurun fila la. Kɛnu ko Kinatila den Tibini ni ma mansɛ la. Doinu fanan ko Hɔmɔri ni ma mansɛ la.

²² Kɔnɔ ala ban, minnu bi Hɔmɔri fɛ, wonu ya nɔ-ko sɔrɔn. Tibini faganɛ, mansayɛ tora Hɔmɔri ye.

²³ Esala mansayɛ san bi-sawa ani san kelen nyɔgɛ Yuda nyamanɛ rɔ, Hɔmɔri mara mansɛ la Isirɛla nyamanɛ rɔ. San tan-ni-fila kɔrɔ, Hɔmɔri ye mansayɛ la Isirɛla nyamanɛ kun na. San tan-ni-filɛ wo kɔrɔ, san wɔrɔ a siginɛ Tirisa soe burɔ.

²⁴ Wo kɔma, a tara kɔnkɛ do san Samari ma wodi-gbɛ la minna gbiliyɛ anubɛ fui-fan bɔrɔ kelen rakɛn de! Ale Mansa Hɔmɔri ya soe datɛgɛ nyɔ rɔ ka nyɔ latanka. A ya dugu-tigi-kɔrɛ wo tɔgɛ sa soe wo kuma ko Samariya.

²⁵ Mansa Hɔmɔri wo ya hakɛ min ma, hali a ya mansɛ minnu taran a yarɔ, wonu ma wo nyɔgɔn ma.

²⁶ A ara Isirɛlata Mari Alla ladiminya bawo a ara hakɛ kɛ ka Isirɛla mɔgɛnu nadon hakɛ rɔ katarala bɛsi-kɔ-koe ma iko Mansa Yɛrabowami ya a ma nya min nun.

²⁷ Mansa Hɔmɔri ya koe min bɛɛsi kɛ Isirɛla nyamanɛ rɔ wo tumɛ a ye mansayɛ la katarala a ya ata mansayɛ kɛ sɛnbɛ sufa min na, anu ya wo damasi sɛbɛ Isirɛla mansɛnuna buku do rɔ.

²⁸ Mansa Hɔmɔri fagara. Anu ya a togon Samariya soe burɔ. Ala den Ehabu sigira a gbɛ rɔ.

Isirɛla Mansa Ehabu Wara-Koe

²⁹ Esata mansayɛ san bi-sawa ani san segin nyɔgɛ ma Yuda nyamanɛ kun na, Mansa Hɔmɔrila den Ehabu fanan mara mansɛ la Isirɛla nyamanɛ kun na. San mogan-ni-fila kɔrɔ, ale Ehabu ye mansayɛ la Isirɛla nyamanɛ rɔ. A siginɛ Samariya soe le burɔ nun.

³⁰ Mansa Ehabu wo ya hakɛ min ma, hali a ya mansɛ minnu taran a yarɔ, wonu ma wo nyɔgɔn ma.

³¹ A ya hakɛ min kɛ iko Mansa Yɛrabowamitɛ, wo ma a wasa. A sɛgira tala Saidon Mansa Ɛtibeyalila dunmusi furula. Musi wo tɔgɛ le Yɛsɛbɛli. Wo kɔma, a ya bɛsɛ do kɔ min tɔgɛ Beyali.

³² A ya bɔn sɔ bɛsɛ wo ye Samariya soe burɔ. A ya saraka-mintan-tinɛ ladan wo fanan ye bɔn wo burɔ.

³³ Wo kɔma, ale mansɛ ya bɛsɛ do ladan musila muninyɛ rɔ. Bɛsɛ wo tɔgɛ le Asitɔra. Ale mansɛ tora ko-yogomɛ mala ka Isirɛlata Mari Alla ladiminya. Hali a ya mansɛ minnu taran a yarɔ, wonu ma wo nyɔgɔn ma.

³⁴ Mansa Ehabu kɛ ye mansayɛ la tumɛ min, Hiyɛli min bɔra Bɛtɛli soe burɔ, wo tara Yɛrikɔ soe sɔ a kurɛ la tun. Yɛrikɔ soe sɔɛ dabirɛ, ale Hiyɛlila den-kei-sarɛ, Abairam, tɛgɛra a ma. A ya tarɛ-don-dɛ sɔ min kɛ, ala den-kei laban, Segubu, fanan tɛgɛra a ma. Wo bɛɛ mara iko Mari ya a fɔ Nunna den Yasowa ye nya min nun.