1 Mansɛnu 14 - ALLALA KUMƐ

Wɔlɔyiya-Kumɛ Fɔ-Koe Mansa Yɛrabowamina Musi Ye

¹ Wo kɔma, kirayɛ ya ale Mansa Yɛrabowamila den Abaya bira.

² Mansa Yɛrabowami ya a fɔ ala musi ye ko, “I mayɛlɛma alako mɔgɔ ti i lɔn. I ni ta Nɛbi Ahaya wara Sailo soe burɔ min ya a fɔ n ye nun ko n si ma Isirɛla mansɛ la.

³ Biredi-lɔngbɔn tan bi. Wo kɔma, i ni dɛgɛ-yilannɛ anubɛ liyi-bara kelen bi ka ta wonu na a ye. I ni a manyinika mala dan kiraya-koe rɔ. Ni min bi nala mala a la, a si wo fɔ i ye.”

⁴ Mansa Yɛrabowamila musi ya a ma iko ala kei ya a fɔ a ye nya min. Ala musi wo tara Nɛbi Ahaya warɛ Sailo soe burɔ. A ya a taran, Nɛbi Ahaya sa fen yenna tun bawo a ara kɔrɔya.

⁵ Kɔnɔ yanni ala musi ni ke nyɔ, Mari ara a fɔ Nɛbi Ahaya ye ko Mansa Yɛrabowamila musi ye nala a manyinika tinɛ ala dan kiraya-koe rɔ. Nɛbi Ahaya ye min fɔla a ye, Mari ya a labila wo la. Mansa Yɛrabowamila musi kenɛ Nɛbi Ahaya ma, a ya a nyɛrɛ ma iko mɔgɔ-gbɛrɛkɛ le ale la.

⁶ Kɔnɔ Nɛbi Ahaya ya ale musi kinta-kan lamɔɛn bonda-dɛ la min kɛ, nɛbi ya a fɔ a ye ko, “Don. N bara a lɔn yati, ko Mansa Yɛrabowamila musi le ile la. Nfenna i ye i nyɛrɛ mafiliyala iko mɔgɔ-gbɛrɛkɛ? Yisi-tinya-kumɛ do ye n bolo ka a fɔ i ye.

⁷ Ta a fɔ ila kei ye ko Isirɛlata Mari Alla ko ale le ya a yabɔ Isirɛla mɔgɛnu tɛma ka a ma mansɛ la Isirɛla mɔgɛnu kun na.

⁸ A ko ale le ya mansayɛ bɔ Mansa Dawuda mamanɛnu bolo ka a don ale bolo. Ta a fɔ a ye ko Mari ko ale telenni ma iko ala wɔli-kɛlɛ Mansa Dawuda telennɛ a ye nya min nun. A ko Mansa Dawuda ya a telen a ye. A ya ata kumɛ bira ka a sako kɛ.

⁹ Ta a fɔ a ye ko ale ara hakɛ min nyɔgɔn kɛ, hali a ya min taran a yarɔ, wonu ma wo nyɔgɔn kɛ. A fɔ a ye ko a ara a ban ale Mari la. Mari ko bawo a ara sɛnɛ lalee ka bɛsɛ donu nadan mɔgɛnu bi minnu kɔla, wo ara a ma, Mari ara diminya a ma.

¹⁰ Ka a tɛgɛ Mansa Yɛrabowami sɔn kɛ ma, Mari ko a si gbalo lana anubɛ a kegeya keimɛ damasi kuma. Hali ala bonna-wɔli-kɛlɛnu, a si wonu fanan tɔrɔ. A ko a si anu tɔrɔndɔ iko tɛ si ninki-nyɛ-gbalɛ mintan nya min.

¹¹ Mari ko Mansa Yɛrabowami na-kelen-nyɔgɛ minnu bi fagala soe tɛma, wulinu denu bi wonu furinu dɔnna. Minnu bi fagala binyɛ rɔ, konanu denu bi wonu furinu dɔnna. Ale Mari le ya kɛ fɔ.”

¹² Nɛbi Ahaya ya a fɔ Mansa Yɛrabowamila musi ye tun ko, “Sɛgi i kɔma. I tenbi donna soe burɔ kawo, ila dan ye fagala.

¹³ Isirɛla mɔgɛ bɛɛ si di ala ko la ka a togon. Isirɛlata Mari Alla ko ni i ya a yen, anu bi ale kelen pe togonna a kilɛ fɛ Mansa Yɛrabowamila denbayɛ tɛma, wo manɛ ale le kelen pe ara a hɛnɛ.

¹⁴ Mari ko a si mɔgɛ do sigi mansayɛ la Isirɛla mɔgɛnu kun na min bi mansayɛ bɔla Mansa Yɛrabowamina bɔn la.

¹⁵ Mari ko a si Isirɛla mɔgɛnu tɔrɔ. Anu ni to magala tɔrɔyɛ bolo iko binyɛ min bi yi rɔ. Mari ko bawo anu bara Asura bɛsɛ ladan musila muninyɛ la, wo ara a ladiminya. Wo le ye a mala, a ya ata dugu-hakikɛ min di anu benbanu ma, a si anu gben nyɔ rɔ. A si anu gben ka anu fui Yufereti bɛ-kɔgɔmɛ rɔ.

¹⁶ Mari ko bawo Mansa Yɛrabowami ara mɔgɛnu bɔ ale wara la ka anu nadon hakɛ rɔ, a si a ban Isirɛla mɔgɛnu na.”

¹⁷ Nɛbi Ahaya ban kɛ fɔla Mansa Yɛrabowamila musi ye, ale musi wulita ka ta a warɛ Tirisa soe burɔ. A ye a kunyɛ ladonna bɔn burɔ kawo, ala den-keminɛ wo niyi bɔra.

¹⁸ Isirɛla mɔgɛ bɛɛ ya a di ka a togon iko Mari ya a fɔ Nɛbi Ahaya ye nya min.

Mansa Yɛrabowami Faga-Koe

¹⁹ Mansa Yɛrabowami ya kɛlɛ kɛ nya min anubɛ a ya koe min bɛɛsi kɛ Isirɛla nyamanɛ rɔ wo tumɛ a ye mansayɛ la, anu ya wo damasi sɛbɛ Isirɛla mansɛnuna buku do rɔ.

²⁰ Mansa Yɛrabowami ya san mogan-ni-fila le bɔ mansayɛ la Isirɛla mɔgɛnu kun na, a nara to fagala. Ala den Nedabu sigira a gbɛ rɔ.

Yuda Mɔgɛnuna Mansa Rihobowami Wara-Koe

²¹ Mansa Silamɛnina den Rihobowami ya mansayɛ sɔrɔn Yuda nyamanɛ rɔ a sɔrɔn-san bi-nani ani san kelen nyɔgɛ le ma. Mari ya Yerusalɛm soe yabɔ ata mɔgɛnu si to a batola kan min. San tan-ni-wɔrɔnfila kɔrɔ, Mansa Rihobowami siginɛ Yerusalɛm soe wo burɔ mansayɛ la Yuda mɔgɛnu kun na. Mansa Rihobowami na tɔgɛ le Nama. Amon kɛ le ale musi wo la.

²² Yuda mɔgɛnu ya hakɛ kɛ Mari la. Anu tora ko-yogoma-siyaman mala ka tenbi anu benbanu na alako Mari fonde ni bɔ.

²³ Anu ya kan tinɛnu nadan anuna Asura bɛsɛ ye min nadannɛ musila muninyɛ la ka kurinu lɛsɛ ka ta wonu sɔ kɔnkɛnu kun tɛma anubɛ kɔlɔma-kuru-wɛ donu kɔrɔ.

²⁴ Batoli-kɛlɛnu ya yɛlɛnyɛ kɛ anuna bɛsi-kɔ-tinɛ kɛnu tɔ, kei wo, musi wo, iko anuna namu ye nya min. Yuda mɔgɛ kɛnu bi ko-yogomɛ mala iko Mari ya mɔgɛ minnu gben anu benbanu yarɔ, wonu bi a mala nya min nun.

²⁵ Rihobowamina mansayɛ san loli nyɔgɛ ma, Sisaki min bi mansayɛ la Iyipiti nyamanɛ rɔ, wo nara bui Yerusalɛm soe ma.

²⁶ A ya fen-kolomɛ damasi bi Mari Bato-Bɔn la anubɛ Mansa Rihobowamina bolɔn la. Hali a fa Mansa Silamɛni ya sɛnɛ minnu ma kɛlɛ-den matanka-fan la, a ya wonu fanan bi a bolo.

²⁷ A ya silɛɛnu nadan kɛlɛ-dan matanka-fannu na ka wonu ma sɛnɛ kɛlɛ-den matanka-fan wonu nyɔgɛ la. A ya wonu don a makandannɛnu bolo minnu sɔnɛ bolɔn wo dɛ la.

²⁸ Ale mansɛ wa wuli tala Mari Bato-Bɔn la tuma-wo-tuma, a makandannɛ wonu si matanka-fan wonu bi ka bila a fɛ. Mansɛ wa sɛgi tumɛ min, anu si matanka-fan wonu bi ka ta anu namara kɛlɛ-kɛ-fan namara tinɛ.

²⁹ Mansa Rihobowami ya koe min bɛɛsi kɛ Yuda nyamanɛ rɔ wo tumɛ a ye mansayɛ la, anu ya wo damasi sɛbɛ Yuda mansɛnuna buku do rɔ.

³⁰ Mansa Yɛrabowami anubɛ Mansa Rihobowami tora kɛlɛ-nyɔgɔnyɛ rɔ.

³¹ Kɔnɔ Mansa Rihobowami ya so-sɛgi-kɛ tumɛ min, anu ya a togon a fa Mansa Dawuda halala-luyi ma. Wo kɔma, ala den Abaya sigira a gbɛ rɔ Yuda nyamanɛ rɔ. Mansa Rihobowami na tɔgɛ le Nama. Amon kɛ le ale musi wo la.