1 Mansɛnu 12 - ALLALA KUMƐ

Kantɔ-Warala-Bɔnsɔnnuna Murutiya-Koe

¹ Rihobowami tara Sɛkɛm soe burɔ, Isirɛla kantɔ-warala-mɔgɛnu ya anu nadɛn kan min ka a ma mansɛ la.

² Nebatila den Yɛrabowami ya a buri Mansa Silamɛni kɔrɔ ka ta Iyipiti mansɛ warɛ nun. A lamɔɛn wo bolo ko anu bara Rihobowami ma mansɛ la, a sɛgira Isirɛla nyamanɛ rɔ ka bɔ Iyipiti.

³ Isirɛla mɔgɛ minnu siginɛ kantɔ-wara la, wonu ya ale fanan kele. A nanɛ, anu tara Mansa Rihobowami wara ka a fɔ a ye ko,

⁴ “I fa Mansa Silamɛni ya ma bira boloko-yogomɛ-kɛ ka a lagbɛlɛya ma kuma. Ni ile ya do bɔ dunɛ la ma ye ka ma kun-nadiya, i ya ko-wo-ko fɔ ma ye, ma si wo ma.”

⁵ Mansa Rihobowami wo ya a fɔ anu ye ko, “Wo sɛgi, tele fila a sawa nyɔgɛ, wo ni na. N si wo yabi.” Anu sɛgira anu kɔma.

⁶ Mansa Rihobowami tara hɛnkili nyini a fa Mansa Silamɛni makawandilɛnu bolo. A ya wonu manyinika ko, “N si mɔgɛ kɛnu yabi kama?”

⁷ Mɔgɔ-ba wonu ya a fɔ Mansa Rihobowami ye ko, “Ni a sɔgɛ ye i la, wobɛ mɔgɛ kɛnu ni wɔli wo nyɔgɔn fɛ, fɔ i wa anu sako kɛ. Ni i ya wo ma, anu si ma ila wɔli-kɛlɛnu na fasai!”

⁸ Kɔnɔ a ma sɔn mɔgɔ-ba wonuna kawandili-kan wonu birala. Fɔ a tara a kemini-mɛsɛ-nyɔgɛnu denu bara ka wonu manyinika, ado wonu duruta a makawandila wo wati rɔ.

⁹ A ya wonu manyinika kantɔ-warala-mɔgɛ wonuna ko ma, a ko, “Mɔgɛ minnu bara na n bara kɛ la, anu ko n ni do bɔ anuna dunɛ la. Nde si nfen ma wonuna ko rɔ?”

¹⁰ Keminɛ wonu ya a labila, anu ko, “I ye a fɔla anu ye ka le ko ile bolo-nɔlɔnɛ kolo i fa lenkan ko.

¹¹ Wo kɔma, i ni a fɔ anu ye ko i fa ya dunɛ sigi anu kuma kɔnɔ ileta dunɛ si tenbi atɛ la pirr! I ni a fɔ anu ye fanan ko i fa ya anu gbesi bosɛ la kɔnɔ ileta bosa-dumɛ si wara anu ma iko bondalɛ wa mɔgɔ bon.”

¹² Tele fila, a sawa nyɔgɛ wo kɔma, Yɛrabowami anubɛ ala mɔgɛnu tara Mansa Rihobowami wara tun iko a ya a fɔ anu ye nya min.

¹³ Ale Mansa Rihobowami ma kuma mɔgɛ kɛnu ye iko a fala mɔgɔ-banu ya a labila nya min. A ya kuma-gbondanɛ fɔ anu ma

¹⁴ iko a ta-nyɔgɔ-kemini-mɛsɛ wonu ya a labila nya min. Ale Rihobowami ya a fɔ anu ye ko, “N fa ya dunu-belebele sigi wo kuma kɔnɔ nde ye dunɛ min sigila wo kuma, wo si tenbi n fatɛ la pirr! N fa ya wo gbesi bosɛ le la kɔnɔ ndeta bosa-dumɛ si wara wo ma iko bondalɛ wa mɔgɔ bon.”

¹⁵ Mansa Rihobowami ya a ban mɔgɛnu bolo alako Mari ya kumɛ min fɔ Yɛrabowami ye Sailo kɛ Nɛbi Ahaya baraka rɔ, wo ni ma tonyɛ la.

¹⁶ Mɔgɛ wonu ya a yen min kɛ ko Mansa Rihobowami sa a wɔlɔ matɔlɔla anu na, anu ya sɔnkɛ tɛgɛ, anu ko, “Ma sa nyinina Dawuda anubɛ a kebilɛ ma tun! Anu bara nfen ma ma ye? Ni Isirɛla mɔgɛ le yɛ, bɛɛ ni sɛgi a warɛ! Fɔ ni ile Rihobowami tora mansayɛ la i fa Dawudala denbayɛnu kun ma.” Anu ban wo fɔla, Isirɛla mɔgɛ bɛɛsi sɛgira a warɛ.

¹⁷ Fɔ Isirɛla mɔgɛ minnu siginɛ Yuda nyamanɛ rɔ, Mansa Rihobowami tora wonu denu dɔrɔn kun na mansayɛ la.

¹⁸ Minnu bi wɔli kɛla fɔrɔsɛ la, Adonaram ye wonu kun na. Mansa Rihobowami ya wo lata Isirɛla mɔgɛnu ma ka kuma anu ye. Wo ke Isirɛla mɔgɛnu ma, anu ya a mabon ha a fagara. Mansɛ ya wo lamɔɛn min kɛ, a ya a latiriya ala kirindi bila. A ya a buri anu kɔrɔ ka ta Yerusalɛm soe burɔ.

¹⁹ Ka a bi wo wati ma ha ka a sigi kaka la, Isirɛla mɔgɔ minnu siginɛ kantɔ-wara la, wonu murutiyanɛ Mansa Dawudata mansaya-bɔn ma.

²⁰ Isirɛla mɔgɔ damasi ya a lamɔɛn min kɛ ko Yɛrabowami ara sɛgi ka bɔ Iyipiti nyamanɛ rɔ, anu ya a kele anuna ladɛn-kinamɛ kuma ka a ma mansɛ la Isirɛla mɔgɛnu kuma. Fɔ Yuda bɔnsɔnnu, wonu denu tora Mansa Dawuda sɔrɛnu fɛ.

Sɛmayata Wɔlɔyiya-Kuma-Fɔɛ

²¹ Mansa Rihobowami ke Yerusalɛm soe burɔ, a ya kɛlɛ-dan mɔgɔ waga kɛmɛ kelen ani mɔgɔ waga bi-segin (180,000) kundɛn ka bɔ Yuda bɔnsɔn anubɛ Bɛnyamɛ bɔnsɔn rɔ. A ya wonu nadɛn de alako ka ta Isirɛla mɔgɛ wonu kɛlɛ minnu siginɛ kantɔ-wara la bawo a sɔgɛ ye a la, wonu ni taran a kɔrɔ tun.

²² Kɔnɔ Alla ya a fɔ ata Nɛbi Sɛmaya ye ko

²³ a ni ta a fɔ Mansa Rihobowami anubɛ Yuda bɔnsɔn anubɛ Bɛnyamɛ bɔnsɔn-mɔgɛnu ye ko

²⁴ anu kana ta anu na-kelen-nyɔgɛ Isirɛla mɔgɛnu kɛlɛ. Anu ni sɛgi anu barɛ. Koe min bɛɛsi ara ma kɛ la, a sako le wo la. Nɛbi Sɛmaya tara Mari kuman-kan wo latenbi anu ma tumɛ min, anu dama sɛgira anu barɛnu tɔ.

Mansa Yɛrabowami Kan-Kɔ Sɔ-Koe Mari La

²⁵ Mansa Yɛrabowami min bi Isirɛla mɔgɛnu kun na, wo ya Sɛkɛm soe mabɛn ka soe wo latanka tinɛnu nadan. Sɛkɛm wo ye Ifɛrɛm kɔnkɔ-nyamanɛ le tɔ. Ale Mansa Yɛrabowami sigira nyɔ rɔ wati-kundu-ni kɔrɔ. Wo kɔma, a bɔra nyɔ rɔ ka ta Pɛnuwɛli soe fanan latanka tinɛnu nadan.

^26-27 Mansa Yɛrabowami ya a miri a nyɛrɛ ma ko, “Ni ndela mɔgɛ donu wulita ka ta sarakɛ bɔ Mari bato tinɛ Yerusalɛm, tumado anu si anu bɔ nde fɛ ka sɔ Yuda Mansa Rihobowami fɛ, ado anu si n faga.”

²⁸ Ale Mansa Yɛrabowami tara a kun nayigi ala mɔgɔ-banu fɛ. A ban wo mala, a ya sɛnɛ ladan ninki-den filala muninyɛ la. A ya a fɔ ala mɔgɛnu ye ko, “Wole ara mɛ tala Mari bato tinɛ Yerusalɛm. Wole Isirɛla mɔgɛnu, wo ma wota allanu yen kɛ la minnu nara wo la ka bɔ Iyipiti nyamanɛ rɔ?”

²⁹ A ya ninki-dan wo kelen to Bɛtɛli soe burɔ. A tara doi to Dan soe burɔ.

³⁰ Wo ya a ma, mɔgɛnu ya hakɛ kɛ ka ta bɛsɛ wonu kɔ tinɛ Bɛtɛli soe anubɛ Dan soe burɔ.

³¹ Ale Yɛrabowami ya bɛsi-kɔ-tinɛ donu sɔ fanan kɔnkɛ donu kuma. A ya mɔgɛ donu ma saraka-masɔlɛnu na hali Lifayi bɔnsɔn ma minnu na.

Bɛsi-Kɔɛ Tinya-Koe Bɛtɛli Soe Burɔ Mari Bolo

^32-33 Mansa Yɛrabowami ya a fɔ ala nyamanita-mɔgɛnu ye ko anu ni ladiyɛ do dabira ka a sanka Yuda mɔgɛnutɛ ma min si kɛ anuna san karɛ segin nyɔgɛ, tele tan-ni-loli ma. Mansa Yɛrabowami nyɛrɛ-nyɛrɛ ya tele wo yabɔ a nyɛrɛ ma ka sarakɛnu bɔ wulɔn. Wo tele nyɛrɛ kenɛ, a ya saraka-masɔlɛnu sigi Bɛtɛli soe burɔ minnu ya sarakɛnu bɔ saraka-bɔ-tinɛ kuma ninki-dannuna muninyɛ wonu ye. A ya ladiyɛ wo dabira Isirɛla mɔgɛnu ye ka le.