1 Kɔrɛnti 6 - ALLALA KUMƐ

Nyɔgɔn-Samasi-Koe Dɛnkɛninya-Mɔgɛnu Tɛma

¹ Ni sɔsɔlɛ taranta minnubɛ a na-kelen-nyɔgɔn tɛma, a ma bɛn hali ko a ni ta wo la Alla-lɔnbɛlɛnuna kiti tɛgɛ tinɛ. Yanni a ni wo ma, a fisa, Allata mɔgɛnu ni kiti wo ban anu nyɔgɔn tɛma.

² Wo ma a lɔn ba, ko Allata mɔgɛnu si duninya kiti? Nba, ni wole si na duninya kiti, wo ti ke kiti dɔgɔmɛ kɛnu tɛgɛla, wa?

³ Ado nfan, wo ma a lɔn ba, ko male si melikanu fanan kiti kumanato duninya kɛ koenu?

⁴ Nba, ni wo kuma sifanu nara, nfenna wo si ta wonu sa mɔgɛnu kɔrɔ minnuta sa chɔchi koe rɔ.

⁵ Miliya-koe le wo la. Hɛnkilima kelen bɛrɛn sa wo tɛma min si ke sɔsɔlɛ banna wole dɛnkɛninya-mɔgɛnu tɛma, wa?

⁶ Kɔnɔ dɛnkɛninya-mɔgɛnu bi anu ta-nyɔgɛnu samasila alako Alla-lɔnbɛlɛnu ni anuna kiti tɛgɛ. Wo ma bɛn mumɛ!

⁷ Wo ye wola kitinu sala duninya-kiti-tɛgɛlɛnu kɔrɔ min kɛ, wo ara a yira wo la ko dɛnkɛninyabɛlɛnu bara wo nɔ feu! Hali anu bagara wo ma, wo ma fisa? Nfenna wo ti sɔn anu ni wo kensunya?

⁸ Kɔnɔ wo nyɛrɛ ye ko-yogomɛ kɛla wo ta-nyɔgɔn dɛnkɛninya-mɔgɛnu na. Wo nyɛrɛ ye anu kensunyala, ado wo ta-nyɔgɛ dɛnkɛninya-mɔgɛnu denu bi kɛnu na.

⁹ Wo ya a lɔn serr, ko mɔgɔ-yogomɛnu ti Allala mansayɛ sɔrɔn. Wo kana wo nyɛrɛ mayuwaya. Sɔn-yogoma-tiginu wo, bɛsi-kɔlɛnu wo, yɛlannu wo, minnu bi anu ta-nyɔgɔ-keinu makila wo, minnu bi anu ta-nyɔgɔ-musinu makila wo,

¹⁰ kankannu wo, wasabɛlɛnu wo, baan-minnɛnu wo, nafiginu wo, minnu bi buila mɔgɛnu ma wo, wonu fenfen ti Allala mansayɛ sɔrɔn,

¹¹ ado wo donu bi wo nya na le nun fɔlɔ. Kɔnɔ ma Mari Yisa Kirasiti anubɛ Allata Ni-Sɛnimɛ ara wo sɛninya ka wo ma Allatɛ la ka wo latelen Alla ye.

Alla Gbiliya-Koe Ma Fɛrɛ-Bɔnkɛ Rɔ

¹² Do si a fɔ ko, “N bi nyinina min ma, tɔn sa n kuma wo ma tinɛ.” Tonyɛ le kɔnɔ koe bɛɛ ti ma munanfaga. Nde bɛrɛn si a fɔ ko, “N bi nyinina min ma, tɔn sa n kuma wo ma tinɛ.” Kɔnɔ nde ti ma yɔɔn la fenfen kɔrɔ.

¹³ Dogbɛrɛ si a fɔ ko, “Buyi ye dɔn-fanla ko la. Dɔn-fan fanan ye buyila ko la.” Tonyɛ le kɔnɔ wo filɛ bɛɛ si ban Alla bolo. Kɔnɔ fɛrɛ-bɔnkɛ ma dan yɛlɛnyɛla ko la fɔ ka wɔli Mari ye, ado Mari le ye ko-nyinyala fɛrɛ-bɔnkɛ ma.

¹⁴ Alla min ya Mari lawuli ka bɔ furinu tɛma, a si male fanan nawuli sɛnbɛ kelan wo le rɔ.

¹⁵ Wole ya a lɔn ko Kirasiti fɛrɛ-bɔnkɛ-tɔnkɔ-do le wole la, wa? A ye kama? N si Kirasiti fɛrɛ-bɔnkɛ-tɔnkɔ-do bi ka a tugun yɛlan-fɛrɛ-bɔnkɛ la, wa? Alamɛ ma kisira wo ma!

¹⁶ Wo ma a lɔn ba, ko kei min bara a fɛrɛ-bɔnkɛ tugun yɛlan la, anubɛ wo ma ma kelen na? Allala kitabu ya a lagbɛ ko, “Anu filɛ si ma fɛrɛ-bɔnku kelen na, wa?”

¹⁷ Kɔnɔ ni min si a nyɛrɛ tugun Mari la, wonubɛ Mari kelen de.

¹⁸ Wo ni wo buri yɛlɛnyɛ kɔrɔ! Mɔgɛ si hakɛ-gbɛrɛ min bɛɛ kɛ, wo bɛɛ ti a fɛrɛ-bɔnkɛ tɔrɔ iko kɛ. Mɔgɛ wa yɛlɛnyɛ kɛ, wo ye hakɛ-su kɛla min si a nyɛrɛ fɛrɛ-bɔnkɛ tɔrɔ.

¹⁹ Wo ma a lɔn ba, ko wo fɛrɛ-bɔnkɛ, Allata Ni-Sɛnimɛta bato-bɔn le? Alla ya ata Ni-Sɛnimɛ min di wo ma, wo siginɛ wole le tɔ, ado wo sa wo nyɛrɛ bolo. Allatɛ le wole la.

²⁰ A ya wo san ka wo sɔnkɛ di. Woletɔ wo ni Alla gbiliya wo fɛrɛ-bɔnkɛ la.