1 Kɔrɛnti 5 - ALLALA KUMƐ

Yɛlɛnyɛ Chɔchi Burɔ

¹ Nba, n ya a lamɔɛn ko yɛlɛnya-su do ye wo tɛma hali Alla-lɔnbɛlɛnu ti sɔn min sifa ma, ado tɛrɛna-ko le wo la n bolo. Anu ko mɔgɛ donubɛ a na-sena-musi ye kila.

² Wo wasinɛ nfenna worɔ? A fisa nun, wo ni don diyi rɔ miliyɛ bolo, ado mɔgɛ min bara ko-sifa wo ma, wo ni wo gben wo kurun tɔ!

^3-4 Nba, hali n sa wo fɛ Kɔrɛnti soe burɔ, n bi wo fɛ nyɔ n yisi rɔ. Hali n sa wo fɛ nyɔ, n bara ban ko-yogoma-kɛlɛ wola kiti tɛgɛla Mari Yisa tɔgɔ rɔ. Wo wa wo ladɛn kan-tina-kelen tumɛ min, n bi wo fɛ nyɔ n yisi rɔ. Ma Mari Yisa baraka rɔ, wo tenbi ladɛn kun na,

⁵ wo ni ko-yogoma-kɛlɛ wo don Setanɛ bolo. Wo ni wo ma alako hali Setanɛ wa a fɛrɛ-bɔnkɛ tinya, Mari Yisa wa na lunyɛ min, a niyi si kisi.

⁶ Wola wasinteyɛ ma bɛn mumɛ! Wo ma a lɔn ko ni mɔgɔ kelen tora hakɛ kɛla wo tɛma, tɔrɛ si nyɛnsɛn wo bɛɛ tɛma, wa? Wo ya kumɛ wo lɔn ko, “Biredi-yɛlɛ-fan doni si a ma, biredi wo bɛɛ ni yɛlɛ.”

⁷ Wo ni ko-yogoma-kɛlɛ wo gben wo tɛma. Wo si ma iko biredi-yɛlɛ-fan sa dɛgɛ min tɔ wo rɔ, ado ni hakɛ sifa sa wo tɛma, wole ara ban mala iko yɛlɛ-fen sa dɛgɛ min tɔ. Kirasiti ara ban mala sarakɛ la nun. Mata saga-dan le ale la mata Kanan-Ko-Ladiyɛ rɔ.

⁸ Ma ni mala ladiyɛ wo kɛ a kilɛ fɛ. Ma kana a kɛ hakɛ anubɛ wunduyogoyɛ la ma bolo min manɛ iko biredi-yɛlɛ-fan. Ma ni a kɛ sɛninyɛ anubɛ tonyɛ la min manɛ iko biredi-yɛlɛ-fen sa dɛgɛ min tɔ.

⁹ N ya kɛdi sɛbɛ wo ma nun ko wo kana sɔn-yogoma-tiginu ma wo ko-ladan-nyɔgɛ la.

¹⁰ Nba, n ma wo sɛbɛ ka a tɛgɛ Alla-batobɛlɛnuna ko la minnu bi yɛlɛnyɛ kɛla. N ma a sɛbɛ wasabɛlɛnu anubɛ kankannu anubɛ bɛsi-kɔlɛnuna ko la. Ni wo le, fɔ ni wo bɔra duninya kɛ rɔ feu!

¹¹ N bi min ma nun, wo le ko ni yɛlan le, ni wasabɛlɛ le, ni bɛsi-kɔlɛ le, ni min bi nafigiyɛ kɛla, ni min bi baan-minyɛ kun na, ni kankan le—ni mɔgɛ wo ye a fɔla ko wo na-kelen-nyɔgɛ le ale la dɛnkɛninyɛ rɔ, wo kana wo bole layigi miran kelen tɔ lefan wo mɔgɔ-sufanu fɛ.

^12-13 Ka mɔgɔ-gbɛrɛnu kiti, nta wɔli ma wo la! Alla le si wonu kiti. Ka kiti tɛgɛ wo nyɔgɔn tɛma chɔchi burɔ, wota wɔlɛ le wo la. Iko a sɛbɛnɛ Allala kitabu rɔ nya min ko, “Wo ni ko-yogoma-kɛlɛnu nabɔ wo tɛma.”