1 Kɔrɛnti 4 - ALLALA KUMƐ

Kirasitita Kilayɛnu

¹ Wo ni male lɔn Kirasitita wɔli-kɛla-gbansan la Allala gbundu-koe kerifanɛ minnu na,

² ado fan kerifanɛ min na, a bɛnta, wo ni lanayɛ kɛ a tigi ye.

³ Woletɔ ka a fɔ ko lanaya-tigi ma n na, ni wole ya n kiti wo, ni hadama-den-gbɛrɛ ya n kiti wo, fen ma wo la nde yala, ado nde ti n nyɛrɛ yiliki lefan!

⁴ N sɔndɔmɛ gbɛnɛ feu! Kɔnɔ wo dɔrɔn ti a yira ko sɔn sa n na bawo Mari le n kitila.

⁵ Woletɔ wo kana mɔgɔ-wo-mɔgɔ kiti yanni a wati ni ke. Mari wa na, kiti-laban fɔla-wati wo le. A si mɔgɛnu miriya anubɛ pinpirɔ-koenu nabɔ gbɛ rɔ. Nba, wo le si a ma, bɛɛ ni matɔgɔlɛ sɔrɔn Alla bolo iko a bɛnnɛ nya min.

⁶ N na-kelen-nyɔgɛnu, n bara koe kɛ bɛɛ sanka mabɛ Apalasi ma wolela ko la. N bara male ma misalɛ la alako wo ni tili wo kɔrɛ lɔn mɔgɛnu bi min tɛgɛla ko, “Mɔgɔ kana tenbi kumɛ-dan kun na.” Wo fenfen kana wasi mɔgɛ do la ka do lafɛya.

⁷ Yon ya wo lafisaya donu ko? Fan min bɛɛ ye wo bolo, Alla le ma wonu di wo ma, wa? Nba, nfenna wo ye wo nyɛrɛ matɔgɔla iko min bi wo bolo, ale le ma wo di wo ma, wa?

⁸ Wole miri ko wo makoe ye fan min bɛɛ la, wo ara ban wonu sɔrɔnna? Wo ara ban mala nɔnfulu-tiginu na, wa? Ma sa wo dafɛ tumɛ min, wo ara wo nyɛrɛ ma iko mansɛnu. Kɔnɔ alamɛ wo mara mansɛnu na nun alako male fanan ni mansayɛ kɛ wo fɛ,

⁹ ado nde yala, Alla ara sɔ-tina-dɔgɔmanɛ di male kilayɛnu ma iko mɔgɔ min fisa ka faga. Male manyimanɛ duninya mumɛ bɛɛ yala, a melika wo, a mɔgɔni-gbu wo.

¹⁰ Kuntan le male la Kirasitila ko la kɔnɔ hɛnkili-bɔrɔ-tigi le wole la Kirasiti rɔ! Sɛnbɛ sa male bolo kɔnɔ sɛnbɛ ye wole bolo duk! Male lafɛyanɛ kɔnɔ wole gbiliyanɛ,

¹¹ ado ha ka, kɔnkɛ ye ma la, ma kan lagbalanɛ fanan. Kura-korenu bi ma ma. Mɔgɛnu bi ma dɛnu tatiila. Ma ye yilan-yilanna tolon!

¹² Ma ye boloma-wɔlɛnu kɛla ka ma nyɛrɛ makoenu nyinya. Anu ba ma danka, male si duwa anu ye. Anu ba a lagbɛlɛya ma kuma, ma si ma munyu.

¹³ Anu ba ma manyini, male si anu yabi kuma-nyimɛ la. Fenfen ma male la fɔ yefe-gbalɛ duninya kɛ rɔ. Sundu-kunyɛ le male la ha kaka!

¹⁴ N bara min sɛbɛ wo ma kɛ la, n ma a sɛbɛ alako ka wo lamiliya kɔnɔ ka wo makawandi iko n diyana-dannu,

¹⁵ ado hali karan-mɔgɔ waga-yirika ye wo bolo Kirasiti rɔ, fa kelen de ye wo bolo. N bara kibara-nyimɛ lana wo ma min kɛ, n bara ma wo fa la Kirasiti Yisa rɔ wo nya le.

¹⁶ Woletɔ n bi wo madiyala ko wo ni wo sanka nde ma.

¹⁷ Ka a tɛgɛ wo ma, n bi Timoti latala wo ma. N diyana-dan le ale la Mari rɔ, ado n lara a la feu! N bi ni-kura-kilayɛ minnu nakela chɔchi bɛɛ rɔ kan-bo-kan Kirasiti Yisa rɔ, a si wo labila wo bɛɛ la.

¹⁸ Wo donu bara wasi bawo wo ye wo mirila ko n sa nala kela wo ma.

¹⁹ Kɔnɔ ni Mari sɔnta, a sa mɛla tun, n bi nala kela wo ma. Nba, mɔgɔ-wasinɛ wonu si ke min kɛla worɔ, nde nyɛrɛ si a lɔn ni anu bi da-rabu-tugi le la, ka, ni sɛnbɛ-bɛrɛ le anu bolo,

²⁰ ado da-rabu-tugi ma Allala mansayɛ la fɔ sɛnbɛ.

²¹ Wo ye nyinina nfen ma? N ni na bosɛ la n bolo wo wara, ka, n ni na keninteyɛ anubɛ diyanayɛ le la wo wara?