1 Kɔrɛnti 16 - ALLALA KUMƐ

Kɔ-Fan Wara-Koe Dɛnkɛninya-Mɔgɛnu Ye

¹ Nba, wo ye wodi min nadɛnna Allala mɔgɛnu dɛnbɛn-koe la Yudiya nyamanɛ rɔ, wo ni a ma iko n bara a fɔ Kalesiya nyamanita chɔchinu ye nya min

² Lɔgɔkunyɛ a tele-fɔlɔtɛ, wo kelen-kelennamɛ-bɛɛ ni fan do lamara a dan na iko a ye a sɔrɔnna nya min. Woletɔ n ba na tumɛ min, hali wo ma gbɛsɛ-gbɛsɛ ladɛn tun.

³ N ba na tumɛ min, wo ara mɔgɛ minnu yabɔ min si ta wola kɔ-fannu na Yerusalɛm, n si kɛdinu don wonu bolo. Anu denu si ta wo la anu bolo.

⁴ Ni nde bɛrɛn ta-koe bɛnta, n si ta anu fɛ worɔ.

Pɔlita Tagama Rabɛn-Koe

⁵ N ba Masidoniya nyamanɛ ratagama tumɛ min, n si na ke wo ma worɔ bawo n bi bɔla nyamanɛ wo le tɔ.

⁶ N si wati do bɔ wo fɛ, ado tumado, n si dafere-kimɛ-wati bɛɛ bɔ wo fɛ. Woletɔ ni n tara kan-bo-kan wo kɔma, wo si ke n dɛnbɛna nta tagama rɔ.

⁷ A ma di n ye, n ni wo yen dɔrɔn ka belen. Ni Mari sɔnta, a di n ye ka wati-yan bɔ wo fɛ.

⁸ Kɔnɔ n bara a latɛgɛ ko n ni to Ɛfɛsa soe burɔ yan ha Pɛntikɔsi-tele

⁹ bawo fɛrɛ ye n bolo yan serr, ka wɔli-nyimɛ kɛ, ado mɔgɔ siyaman nawulinɛ n kan ma.

¹⁰ Ni Timoti nara ke wo ma, wo ni a rabira gben, bawo a ye wɔlila Mari ye iko nde fanan bi wɔlila nya min.

¹¹ Mɔgɔ-wo-mɔgɔ kana a bɔrɔbɔ kɔnɔ wo ni a dɛnbɛ ala tagama rɔ yisi-kimɛ rɔ alako a si sɛgi n bara nya min. N bi ale anubɛ n na-kelen-nyɔgɛnu makɔnɔna.

¹² Nba, ka ma na-kelen-nyɔgɛ Apɔlɔsila wara-koe fɔ, n bara a madiya ko a ni ta wobɛ ma na-kelen-nyɔgɛnu kɔndɔn. Kɔnɔ ta-sɔgɔ sa a la nyɔ kaka kɔnɔ hali wo, a wa fɛrɛ sɔrɔn tumɛ min, a ye tala le.

Pɔlita Kuma-Labannu

¹³ Wo ni wo ya lakalan ka wo sɔ dɛnkɛninyɛ rɔ yiri! Wo ni wo kerinteya ka wo sɛnbɛ don.

¹⁴ Wo ni wola wɔli-su-bɛɛ kɛ keninteyɛ la.

¹⁵ Wo ya Sitɛfanasi anubɛ ala denbayɛ wara-koe lɔn. Dɛnkɛninya-mɔgɔ-fɔlɔtɛ le wonu na Akeya sigisɔn rɔ. Anu bara anu nyɛrɛ di Alla ma ka ma wɔli-kɛlɛnu na Allata mɔgɛnu kɔrɔ fasai! N na-kelen-nyɔgɛnu, n bara wo madiya ko

¹⁶ wo ni mɔgɔ-su wonuna kumɛ bira anubɛ min bɛɛ ye wɔlila anu fɛ.

¹⁷ N bara sewa Sitɛfanasi anubɛ Fɔtunati anubɛ Akayika na-koela ko la. Wole sa yan min kɛ, wole si min kɛ nun, wonu bara wo gbɛ bi.

¹⁸ Wonu bara n niyi lakuraya iko anu ya wotɛ lakuraya nya min. Wo ni mɔgɔ-su wonu gbiliya.

¹⁹ Chɔchi minnu bi Esiya nyamanɛ rɔ, wonu bi wo kɔndɔnna. Akuwila anubɛ Purusila anubɛ chɔchi-mɔgɛ minnu nadɛnnɛ anuna bɔn la, wonu bi wo kɔndɔnna bɛrɛkɛ Mari tɔgɔ rɔ.

²⁰ Ma na-kelen-nyɔgɛ min bɛɛ ye yan, wonu bi wo kɔndɔnna. Wo ni wo nyɔgɔn sɛnibɔ.

²¹ Nde, Pɔli le ara kɔndɔli kɛnu sɛbɛ n nyɛrɛ bole la.

²² Ni min ti Mari keni, dankatoe le wo tigi la. Ma Mari, na!

²³ Mari Yisala hinɛ ni to wo fɛ.

²⁴ Nta keninteyɛ ni to wo dama fɛ Kirasiti Yisa rɔ.