1 Kɔrɛnti 15 - ALLALA KUMƐ

Kirasiti Lawuli-Koe

¹ Nba, n na-kelen-nyɔgɛnu, n ya kibara-nyimɛ min nake wo ma, n bi a fɛ ka wo hɛnkili bila wo ko, ado wo ara kibara-nyimɛ wo rabira ka la a la gben!

² Ni wo ya a bira iko n bara wo makawandi nya min nun, wo si kisi kibara-nyimɛ wo fɛ. Kɔnɔ ni wola dɛnkɛninyɛ mara fuyi la, wo si baya.

³ N bara sarakanɛ min sɔrɔn, n bara wo latenbi wo ma, ado ko-belebele-wa le kɛ la ko Kirasiti fagara ma hakɛnuna ko la iko a sɛbɛnɛ Allala kitabu rɔ nya min.

⁴ Anu ya a togon. A lawulita a tele sawa nyɔgɛ ma iko a sɛbɛnɛ Allala kitabu rɔ nya min.

⁵ Yisa bɔra gbɛ rɔ Pita ye. Wo kɔma, a bɔra gbɛ rɔ kilaya mɔgɔ tan-ni-filɛ bɛɛ ye.

⁶ Wo fanan kɔma, a bɔra gbɛ rɔ a gba-fɛ-bilalɛ minnu ye wati kelen tɔ, wonu siya mɔgɔ kɛmɛ loli ko, ado ha bi, wonu siyaman kɛndɛ kɔnɔ donu bara faga.

⁷ Wo kɔma, a bɔra gbɛ rɔ Yemesi anubɛ kilayɛ bɛɛ ye.

⁸ Tɔ-a-la, a bɔra gbɛ rɔ nde fanan ye. N manɛ iko dan min ma sɔrɔn yona.

⁹ Kilayɛ bɛɛ tenbira nde la. A ma bɛn defan ka n kele ko kilayɛ bawo n ya a lagbɛlɛya Allala chɔchi kuma.

¹⁰ Kɔnɔ n mara kilayɛ la ka a tɛgɛ Allata hinɛ ma, ado a ya keninteyɛ min yira n na wo la, wo ma ma fuyi la. N wɔlita bɛrɛkɛ ka tenbi kilaya-toe bɛɛ la, hali n nyɛrɛla kɛwɔli ma kɔnɔ Allala hinɛ ye wɔlila n tɔ.

¹¹ Nba, ni nde le ya kawandili bɔ wo, ni anu denu denu ya a bɔ wo, ma ye kawandili bɔla fen kelen dela ko la, ado wole dɛnkɛninyanɛ wo le ma.

Ma Lawuli-Koe

¹² Nba, ma ye kawandilɛ kɛ bɔla min kɛ ko Kirasiti la ara wuli ka bɔ furinu tɛma, nfenna wo donu bi a fɔla ko furinu na ti wuli?

¹³ Ni tonyɛ le wo la, wo kɔrɛ le ko Kirasiti la ma wuli worɔ.

¹⁴ Nba, ni Kirasiti la ma wuli ka bɔ furinu tɛma, kawandili-kun sa ma bolo worɔ, ado wo dɛnkɛninya-kun sa fanan.

¹⁵ Min tenbira wo la, ma ara tɔgɛ sa Alla la bawo ma ara a fɔ ko ale le ya Kirasiti lawuli ka bɔ furinu tɛma. Kɔnɔ ni tonyɛ le ko furinu na ti wuli, nba, Alla ma Kirasiti lawuli worɔ,

¹⁶ ado ni furinu na ti wuli, nba, Kirasiti la ma wuli worɔ.

¹⁷ Ni Kirasiti la ma wuli, wola dɛnkɛninyɛ ara ma fuyi la worɔ, ado ha bi, wo ye wo hakɛ rɔ.

¹⁸ Wo kɔrɛ le fanan ko minnu bara dɛnkɛninya Kirasiti ma nun ka faga, wonu bara to-a-rɔ.

¹⁹ Ni ma yigi sanɛ Kirasiti kuma ma tenbi duninya kɛ rɔ ka dan wo ma, nba, kinikinitoe le male la ka tenbi mɔgɛ bɛɛ la duninya kɛ rɔ.

²⁰ Kɔnɔ tonyɛ ye min na, Alla ya Kirasiti fɔlɔn nawuli ka bɔ furinu tɛma alako ka a yira ko minnu bɛɛsi ara saya, wonu fanan na si wuli,

²¹ ado iko mɔgɛnu wulita fagala mɔgɔ kelen hakɛla ko la nya min, ma benba Hadama, kɔni, furinu na si wuli fanan mɔgɔ kelenna ko la wo nya na le.

²² Ado nfan, mɔgɛ bɛɛ bɔra ma benba Hadama le tɔ ka faga. Iko wonu bi fagala nya min, minnu bɛɛ ara dɛnkɛninya Kirasiti ma, wo bɛɛ la si wuli wo nya na le ka habadan-nimayɛ sɔrɔn.

²³ Kɔnɔ Alla si mɔgɔ kelen-kelennamɛ-bɛɛ lawuli a wati-latɛgɛnɛ rɔ. Kirasiti le a fɔlɔtɛ la. Wo kɔma, Kirasiti wa na tun, minnu taranta ale rɔ, wonu si bila a fɛ.

²⁴ Ala ban si ke worɔ. Duninya-kun-tiginu wo, nyina-kun-tiginu wo, sɛnbɛ-tiginu wo, Kirasiti si sɛnbɛ sɔrɔn anu dama kuma ka mansayɛ dantɛgɛ a Fa Alla ma,

²⁵ ado a fɛrɛ sa fɔ Kirasiti ni kun-tigiyɛ kɛ ha Alla ni a yoge bɛɛsi ladon a kin kɔrɔ.

²⁶ Ma yogo-laban min bi sayɛ la, wo la si to dogbe,

²⁷ ado a sɛbɛnɛ Allala kitabu rɔ ko, “Alla ara fan bɛɛ sa a tontɛ kɔrɔ.” Nba, a ara a gbɛ worɔ ko ka a fɔ ko, “fan bɛɛ,” Alla nyɛrɛ bɔnɛ a ma, ado Alla nyɛrɛ le ya fan bɛɛ sa Kirasiti tontɛ kɔrɔ!

²⁸ Kɔnɔ fan bɛɛ wa don Kirasitila kun-tigiyɛ kɔrɔ tumɛ min, wo kɔma Kirasiti nyɛrɛ, Allala dan, kɔni, wo si a sa a fa Alla nyɛrɛ kɔrɔ, ado Alla ya ala dan sigi fan bɛɛ kun na. A si wo ma alako Alla ni kun-tigiyɛ kɛ kɛ bɛɛ kun na feu!

²⁹ Nba, minnu bi batasila alako furinu ni kisi, wonu don? Ni tonyɛ le iko donu bi a fɔla nya min ko Alla ti furinu nawuli, nfenna anu denu bi batasili kɛla furinuna ko la?

³⁰ Nba, male don? Ni furinu na ti wuli, nfenna worɔ, tuma-wo-tuma, ma ye ma nyɛrɛ donna gbalo kɛ kɔrɔ wola ko la?

³¹ N na-kelen-nyɔgɛnu, tele-wo-tele, n bi saya-masibɛ kɔrɔ, ado n wasinɛ wole Kɔrɛnti kɛnu na ka a tɛgɛ ma Mari Yisa, Allata-Mɔgɔ-Yabɔnɛ ara min ma wo ye.

³² Ni n ya mɔgɛnu kɛlɛ Ɛfɛsa soe burɔ minnu manɛ iko “firarɔ-sogenu,” wo si nfen nyinya n ma? Ni Alla ti furinu nawuli, iko anu bi a fɔla nya min, “A fisa, ma ni fen-dɔn kɛ ka ma min ka ma nyɛrɛ ladiya bawo ma ye nala fagala le sina.”

³³ Wo kana sɔn ko mɔgɛnu ni wo yanfa. “Wo bɔ-yogomɛnu si wola kɛ-nya-nyimɛnu tinya.”

³⁴ Wo ni wo hɛnkili masɔ ka fara hakɛ la. N ya a fɔ min kɛ ko donu bi wo tɛma, wonu ma Alla lɔn, miliya-koe le wo la.

Ma Fɛrɛ-Bɔnkɛ si Ma Nya Min Ma La Wa Wuli Tumɛ Min

³⁵ Kɔnɔ mɔgɛ do si nyinikalɛ kɛ ko, “Furinu na si wuli kama? Anu si fɛrɛ-bɔnkɛ-su-nyuman sɔrɔn?”

³⁶ Bɛɛ ya wo lɔn! I wa sugi ki dugi rɔ tumɛ min, a ti fɛrɛn ni a ma ma iko a ara faga.

³⁷ I ye sugi le kila dugi rɔ dɔrɔn! Tumado, a mara sɔsɔ-sugi la, ni wo ma, sugu-gbɛrɛ. I ya a kole le ki, i ma a fɛrɛnnɛ ki.

³⁸ Alla le ya a lɔn a si sugu-fɛran wonu ma nya min. I ye sugu kelen-kelennamɛ-bɛɛ min kila, wonu si fɛrɛn iko anu sunu bi nya min.

³⁹ Nima-fan bɛɛ fɛrɛ ma kɛn. Mɔgɔ-fɛrɛ ye a dan na. Sogetɛ ye a dan na. Konatɛ ye a dan na. Yɛgɛtɛ ye a dan na.

⁴⁰ Dali-fan minnu bi dugu-kole kɛ kuma anubɛ minnu bi Arinyɛni tɔ, dan-nafarɛ ye wo bɛɛ tɛma. Bɛɛta kinyɛ ye a dan na.

⁴¹ Teleta kinyɛ ye nyɔ. Karɛta kinyɛ ye nyɔ. Lolenuta kinyɛnu bi nyɔ. Hali lolenuta kinyɛ fanan faranɛ.

⁴² Alla wa furinu nawuli tumɛ min, wonu fanan si ma wo nya na le. Fɛrɛ-bɔnku-tulutɛ si togon. Alla wa a lawuli tumɛ min, wo tigi si habadan fɛrɛ-bɔnkɛ sɔrɔn min ti tuli dɛɛ!

⁴³ Anu ba a togon tumɛ min, a mafɛlɛn ma di, a sɛnbɛ sa. Alla wa a lawuli tumɛ min, a mafɛlɛn si diya, ado a si sɛnbɛ sɔrɔn.

⁴⁴ Anu ba a togon tumɛ min, fɛrɛ-bɔnku-gbansan de! Alla wa a lawuli, ata Ni-Sɛnimɛ le ye a marala. Nba, ni fɛrɛ-bɔnkɛtɛ ye nyɔ, ata Ni-Sɛnimɛtɛ fanan bi nyɔ wo nya na le,

⁴⁵ ado a sɛbɛnɛ Allala kitabu rɔ ko, “Alla ya mɔgɔ fɔlɔtɛ min dan, ma benba Hadama, kɔni, a ya niyi di wo ma.” Kɔnɔ Yisa min bi Hadama laban la, wo le si niyi di mɔgɛ ma kaka.

⁴⁶ Min si niyi di mɔgɛ ma, wo fɔlɔn ma na fɔ min danta ka bɔ gbangban rɔ, ma benba Hadama, kɔni.

⁴⁷ Hadama fɔlɔtɛ danta ka bɔ gbangban rɔ. Hadama fila nyɔgɛ bɔra Arinyɛni tɔ.

⁴⁸ Dugu-kole kɛtɛ ye minnu na, wonu mani de iko ale min danta ka bɔ gbangban rɔ. Kɔnɔ Arinyɛnɛtɛ ye minnu na, wonu mani de iko ale min bɔra Arinyɛni tɔ.

⁴⁹ Min danta ka bɔ gbangban rɔ, wola muninyɛ ye male la nya min, ale min bɔra Arinyɛni tɔ, ma si muninya wo la wo nya na le fanan, Kirasiti, kɔni.

⁵⁰ N na-kelen-nyɔgɛnu, n bi min ma, wo le kɛ la. Min danta fɛrɛ anubɛ yele la, wo ti ke Allala mansayɛ sɔrɔnna. Ma fɛrɛ-bɔnku-tulutɛ kɛnu ti to habadan!

^51-52 Wo ni wo tole masɔ gbundu-koe kɛ la. Ma dama ti faga kɔnɔ buru-laban wa fɛ, ma dama si yɛlɛma tiriya iko ya-makeri kelan, ado buri wa fɛ tumɛ min, furinu na si wuli ka bagbuyi sɔrɔn min si to tolon! Male min tonɛ ma niyi la, Alla si bagbu-kurɛ di ma ma min si to burubukai!

⁵³ A fɛrɛ sa fɔ bagbuyi min si tuli, wo ni yɛlɛma bagbuyi la min ti tuli. Bagbuyi min si faga, wo si yɛlɛma bagbuyi la min ti faga.

⁵⁴ Woletɔ bagbuyi min si tuli, wo wa yɛlɛma bagbuyi la min ti tuli tumɛ min, wo si a ma, min sɛbɛnɛ Allala kitabu rɔ, wo ni bɔ-a-la. A sɛbɛnɛ ko, “Sayɛ ara halaki. Nɔlɛ ara kanbali!”

⁵⁵ “E, sayɛ, ila nɔlɛ ye mintɔ gbɛ? E, sayɛ, ila mɔgɔ-duma-sɛnbɛ ye mintɔ?”

⁵⁶ Sayɛ ye ala mɔgɔ-duma-sɛnbɛ sɔrɔnna hakɛ le bolo. Hakɛ ye ata sɛnbɛ sɔrɔnna Nɛbi Musata tɔn le bolo.

⁵⁷ Kɔnɔ tabarakala Alla ma min bara nɔlɛ di ma ma ma Mari Yisa, Allata-Mɔgɔ-Yabɔnɛ baraka rɔ!

⁵⁸ Woletɔ n na-kelen-nyɔgɛnu, wo ni wo sɔ gben! Wo ni to wɔlila Mari ye tuma-wo-tuma bawo wo ya a lɔn ko wo ye min kɛla Marita wɔlɛ rɔ, wo ti ma fuyi la mumɛ!