1 Kɔrɛnti 12 - ALLALA KUMƐ

Allata Ni-Sɛnimɛta Fandɛnu Bara-Koe

¹ Nba, n na-kelen-nyɔgɛnu, n bi a fɛ ka kuma wo ye Allata Ni-Sɛnimɛta fandɛnu bara-koe rɔ. N bi a fɛ, wo ni tonyɛ lɔn wonuna ko la.

² Yanni wo ni dɛnkɛninya Yisa ma tumɛ min, wo le ya a lɔn ko niyi sa bɛsɛ minnu tɔ, wonu ya wo lasama kila-bɛrɛ ma.

³ Nba, n bi a fɛ ka kuma-kolomɛ fɔ wo ye. Min bɛɛ maranɛ ata Ni-Sɛnimɛ bolo, wo fenfen ti ke a fɔla ko, “Yisa dankanɛ.” Ado nfan, ni ata Ni-Sɛnimɛ sa mɔgɛ min fɛ, wo ti ke a fɔla ko, “Yisa, Mari le.”

⁴ Fanda-su-siyaman bi nyɔ ka bɔ Alla bolo kɔnɔ Allata Ni-Sɛnima kelan wo le ye wo bɛɛ dila ma ma.

⁵ Kila-siyaman bi nyɔ ma si wɔli Mari ye nya min kɔnɔ ma dama ye wɔlila Mari kelen de ye.

⁶ Wɔli-su-siyaman bi nyɔ-wɔli-kɛ-tinɛ kɔnɔ Alla kelen de ye fɛrɛ dila ma kelen-kelennamɛ-bɛɛ ma.

⁷ Alla si ata Ni-Sɛnimɛ yira mɔgɔ kelen-kelennamɛ bɛɛ la alako bɛɛ si sabati anu nyɔgɔn fɛ nya min.

⁸ Ata Ni-Sɛnima kelan wo si hɛnkilimaya-kumɛ di do ma. Lɔnnɛ ye kawandili min tɔ, a si sɛnbɛ wo di mɔgɔ-gbɛrɛ ma fanan.

⁹ Ata Ni-Sɛnima kelan wo si dɛnkɛninya-wɛ di mɔgɛ do ma ka mɔgɔ-lakɛndɛya-sɛnbɛ di mɔgɔ-gbɛrɛ fanan ma.

¹⁰ Ata Ni-Sɛnimɛ si kabana-ko-wɔli-sɛnbɛ di mɔgɛ do ma ka kawandili-labɔ-sɛnbɛ di mɔgɔ-gbɛrɛ ma. Fandɛ minnu bɔra Allata Ni-Sɛnimɛ bolo anubɛ minnu ma bɔ a bolo, wonu dan-nafarɛ-lɔn-sɛnbɛ dinɛ mɔgɔ-gbɛrɛ ma. Kan-gbɛrɛ-fɔ-sɛnbɛ dinɛ mɔgɛ do ma. Kan wo latenbi-sɛnbɛ dinɛ mɔgɔ-gbɛrɛ fanan ma,

¹¹ kɔnɔ Allata Ni-Sɛnima kelan le ye wo bɛɛ kɛla. Mɔgɔ kelen-kelennamɛ bɛɛ fandɛ dinɛ a ma Allata Ni-Sɛnimɛ bolo iko a di ata Ni-Sɛnimɛ ye nya min.

Bagbu Kelen, Sɔlɔmɔnya-Siyamɛ

¹² Kirasiti mani de iko bagbu kelan, sɔlɔmɔnya-siyamɛ. Hali wo fɛrɛ-sɔlɔmɔnyanu siya, bagbu kelen de!

¹³ A ye wo nya na le fanan Kirasitita bagbuyi rɔ. I mara Yahudiya la wo, i mara sibolo-gbɛrɛ la wo, i mara yɔɔn na wo, i mara hɔrɔ la wo, ma dama ara batasi bagbu kelen tɔ ata Ni-Sɛnima kelen de bolo. Ma dama ara fa Allata Ni-Sɛnima kelen wo la.

¹⁴ Nba, bagbu nyɛrɛ, sɔlɔmɔnya kelen ma, fɔ sɔlɔmɔnya-siyaman.

¹⁵ Ni kian ya a fɔ ko, “Nde tugunni ma fɛrɛ la bawo bolo ma n na,” wo ti a ma, a ti ma fɛrɛ kan-tinɛ do la.

¹⁶ Ni tole ya a fɔ ko, “Nde tugunni ma fɛrɛ la bawo ya ma n na,” wo ti a ma, a ti ma fɛrɛ kan-tinɛ do la.

¹⁷ Ni bagbuyi bɛɛ mara ya-gbansan la nun, a si ko-lamɔɛn kama? Ni a bɛɛ mara tole la nun fanan, a si fen-sumɛ lamɔɛn kama?

¹⁸ Kɔnɔ iko a ye nya min, Alla ara sɔlɔmɔnya-su-siyamɛ tugun anu nyɔgɔn na iko a di a ye nya min,

¹⁹ ado ni sɔlɔmɔnya kelen pe le nun, bagbu ti taran nun!

²⁰ Kɔnɔ iko a ye nya min, sɔlɔmɔnya-siyaman bi nyɔ kɔnɔ bagbu kelen de!

²¹ Woletɔ yɛ ti ke a fɔla bole ma ko, “N mako sa i la!” Kunyɛ ti ke a fɔla kian ma ko, “Nba, n mako sa i la!”

²² Ado nfan, ma sɔlɔmɔnya minnu manɛ iko anu sɛnbɛ sa, wonuna wɔlɛ gbɛlɛ a toenu ko.

²³ Ma ye ma mirila ma sɔlɔmɔnya minnu ma ko anu ma gbili ma ma, ma si wonu denu kandan bɛrɛkɛ! Ma sɔlɔmɔnya minnu ma kin, ma si wonu makiri a kila-bɛrɛbɛrɛ fɛ.

²⁴ Kɔnɔ ma sɔlɔmɔnya minnu kin, hali ma ma wonu makiri wo nya na. Alla nyɛrɛ ara ma sɔlɔmanyanu tugun anu nyɔgɔn na ka gbiliya-wɛ di ma sɔlɔmɔnya ma, gbiliyɛ dasanɛ minnu na.

²⁵ Alla ya a ladan wo nya alako sɔsɔli kana taran sɔlɔmɔnyanu tɛma, ado sɔlɔmɔnya bɛɛ ni a lɔn ko anu kelen-kelennamɛ-bɛɛ makoe ye anu nyɔgɔn na.

²⁶ Ni sɔlɔmɔnya kelen tɔrɔta, a sɔlɔmɔnya-toe bɛɛ si tɔrɔ a fɛ. Ni sɔlɔmɔnya kelen ya gbiliyɛ sɔrɔn, a sɔlɔmɔnya toe bɛɛ si do sɔrɔn gbiliyɛ wo rɔ.

²⁷ Nba, Kirasiti bagbuyi le wo dama la. Kirasiti sɔlɔmɔnya do le wo kelen-kelennamɛ bɛɛ la.

²⁸ Alla ara bɛɛta wɔlɛ di a ma chɔchi la, a fɔlɔtɛ, kilayɛnu, a fila nyɔgɛ, wɔlɔyiya-kuma-fɔlɛnu, a sawa nyɔgɛ, karan-mɔgɛnu, wo kɔma, kabana-ko-kɛlɛnu anubɛ lakɛndɛyali-sɛnbɛ dinɛ minnu ma anubɛ minnu si ke bolo-kolɔnnu dɛnbɛna, minnu si ke kun-tigiyɛ kɛla, ni wo ma, ka kan-gbɛrɛnu fɔ.

²⁹ Anu dama ma ma kilayɛnu na anubɛ wɔlɔyiya-kuma-fɔlɛnu anubɛ karan-mɔgɛnu na. Kabana-ko-kɛ-sɛnbɛ ma di mɔgɛ bɛɛ ma.

³⁰ Bɛɛ ti ke kirayatoenu nakɛndɛyala anubɛ ka kan-gbɛrɛnu fɔ anubɛ ka kan-gbɛrɛ wonu natenbi.

³¹ Nba, fanda-tɔnɔnamɛnu bira-sɔgɛ ni wo bira. Kɔnɔ min kolo kɛ bɛɛ ko, n si na wo yira wo la gbɛ!