Biblia Todo Logo
Bìoball air-loidhne

- Sanasan -

1 Ko-Kɔrɔta-Karan 5 - ALLALA KUMƐ


Rubɛn Sɔrɛnu Bara-Koe

1 Yakobala sarɛ tɔgɛ le Rubɛn. (A ya a sa a na-dɔgɔma do fɛ min kɛ, wo le ya a ma, den-kei-sarɛta sɔ tinɛ, ale Rubɛn foora wo la. Den-kei-sarɛta sɔ tinɛ wo tora Yusufu ye.

2 Sɛnbɛ taranta Yuda bɔnsɔn-mɔgɛnu na, ado kun-tigi bɔra anu tɔ kɔnɔ hali wo, Yusufula dannu ya den-kei-sarɛta sɔ tinɛ wo sɔrɔn.)

3 Yakobala sarɛ Rubɛn ya den-kei mɔgɔ nani sɔrɔn, Hanoki wo, Palu wo, Hɛsirɔn wo, anubɛ Karimi.

4 Yowɛli kegeyɛnu denu bi kɛnu na, Sɛmaya ya Kɔgi sɔrɔn. Kɔgi ya Simayi sɔrɔn.

5 Simayi ya Maika sɔrɔn. Maika ya Riyaya sɔrɔn. Riyaya ya Beyali sɔrɔn.

6 Beyali ya Bɛra sɔrɔn. Bɛra wo, bɔnsɔn-kunyɛ le wo la kɔnɔ Asiriya Mansa Puluta kɛlɛ ya Bɛra wo bira ka ta a la.

7 Rubɛn bɔnsɔn kebila-kunyɛnu tɔgɛ sɛbɛnɛ anuna kebilaya-buku rɔ. Kebila-kunyɛ wonu tɔgɛ le kɛnu na, Yeyiyɛli wo, Sakaraya wo,

8 anubɛ Asasila den Bela. Bela wo benba le Sɛma la min bɔra Yowɛli bɔnsɔn rɔ. Bɔnsɔn kɛ siginɛ Arɔra soe burɔ. Anuna dugi bɔra nyɔ furr, ha ka ta kantɔ-wara la, Nibɔ anubɛ Beyali-Meyɔn soenu bi kan min.

9 Kolo-fen-siyaman taranta anu bolo Kaliyadi nyamanɛ rɔ. Anu ya dugi min sɔrɔn, wo le tara tele-bɔɛ wara la fɔɔ wulɛ rɔ min bi a kala Yufereti bɛ la.

10 Mansa Sɔlita wati rɔ, Rubɛn bɔnsɔn-mɔgɛnu tara bui Hagara kɛnu ma Kaliyadi nyamanɛ tele-bɔɛ wara la. Anu ya anu faga ka anuna dugi bi.


Kadi Sɔrɛnu Bara-Koe

11 Kadi bɔnsɔn sigira Rubɛn bɔnsɔn-mɔgɛnu kantɔ-wara la Basan nyamanɛ rɔ. Wonuna dugi wo le tara tele-bɔɛ wara la furr, fɔɔ Salaka soe dafɛ.

12 Wo wati rɔ, kebila-kunyɛ wonuna mansɛ le Yowɛli la Basan nyamanɛ rɔ. Yowɛli kan-kɔrɔ-sigilɛ le Sefam na. Wo tatugunnɛ le Yeyanayi anubɛ Sefati la.

13 Kebila wɔrɔnfila tɔgɛ le kɛnu na, anu na-kelen-nyɔgɛnu, kɔni, Maikali wo, Mɛsulam wo, Siba wo, Yorayi wo, Yekan wo, Siya wo, anubɛ Iburu.

14 Hurila den Abiheli bɔnsɔnnu tɔgɛ le kɛnu na. Huri fa le Yarowa la. Yarowa fa le Kaliyadi la. Kaliyadi fa le Maikali la. Maikali fa le Yɛsesayi la. Yɛsesayi fa le Yado la. Yado fa le Busi la.

15 Abideyɛlila den-kei Ehi, Kuni mamanɛ, kɔni, Kadi bɔnsɔn-mɔgɛnuta kebila-kunyɛ le wo la.

16 Anu siginɛ Basan nyamanɛ anubɛ Kaliyadi nyamanɛ rɔ. Anu siginɛ nyɔ-soenu tɔ anubɛ kolo-fen de-nyini-tina-hakikɛnu tɔ min tɔgɛ Sarɔn ha anu dan-masa-nyɔgɛnu bi kan min.

17 (Yuda Mansa Yotamta wati rɔ wo, Isirɛla Mansa Yɛrabowami fila nyɔgɛta wati rɔ wo, ko nya kɛ dama sɛbɛra wonuta wati le tɔ.)


Tele-Bɔɛ Warala Kɛlɛ-Dannu Bara Koe

18 Rubɛn bɔnsɔn kɛlɛ-dannu wo, Kadi bɔnsɔn kɛlɛ-dannu wo, anubɛ Manasa bɔnsɔn-talɛ kɛlɛ-dannu wo, wonu denu bɛnta mɔgɔ waga bi-nani, mɔgɔ waga nani anubɛ mɔgɔ kɛmɛ wɔrɔnfila, ani mɔgɔ bi-wɔrɔ (44,760) ma. Wonu makaranni de kɛlɛ ma. Anu bi kɛlɛ kɛla nɛgɛ-walan anubɛ faan anubɛ kalabɛnnu na.

19 Wonu tara bui Hagaranu ma, Yeturanu wo, Nafisinu wo, anubɛ Nodabunu. Anu ya wo dama kɛlɛ.

20 Anu ya anu yigi sa Alla rɔ ka a matara anu dɛnbɛn-koe la. Alla ya anuna matarali-kan wo lamɔɛn ka nɔlɛ di anu ma Hagaranu anubɛ wonu madɛnbɛnɛnu kuma.

21 Anu ya nyomo waga bi-loli (50,000) bi anu yogenu bolo. Anu ya saga waga kɛmɛ fila waga bi-loli (250,000) bi fanan. Wo kɔma, anu ya sofɛlɛ waga fila (2,000) bi. Wo kɔma, anu ya mɔgɔ waga kɛmɛ (100,000) bira kɛlɛ wo rɔ.

22 Anu ya anu yogo-siyaman faga bawo Alla nyɛrɛta kɛlɛ le. Anu tora sigini nyamanɛ wo rɔ furr, fɔɔ Asiriya kɛlɛ tanɛ anu na.


Manasa Bɔnsɔn-Talɛ minnu Bi Tele-Bɔɛ Wara la, Wonu Bara-Koe

23 Manasa bɔnsɔn-talɛ minnu bi Yorodan bɛ tele-bɔɛ wara la, wonu tara sigi Basan nyamanɛ rɔ. Anu tara sigila kantɔ-wara la ha ka ta ke Beyali-Hɛrɔman soe dafɛ anubɛ Siniri kɔnkɛ kɔrɔ, anu bi a fɔla kɔnkɛ min ma fanan ko Hɛrɔman. Anu tora yirila nyɔ ka siyaya.

24 Minnu mara kebila-kunyɛ la anu tɔ, wonu tɔgɛ le kɛnu na, Ɛferi wo, Isi wo, Iliyɛli wo, Asireyɛli wo, Yɛrɛmaya wo, Hodafaya wo, anubɛ Yadeyɛli. Kebila-kunyɛ le anu na, ado kɛlɛ-kurugbɛ le anu na fanan. Anu mankan tara wuu!


Tele-Bɔɛ Warala Mɔgɛnu Bira-Koe Asiriya Mansa Pulu Bolo

25 Nba, Manasa bɔnsɔn-talɛ wo minnu bi tele-bɔɛ wara la, wonu ma anu telen anu benbanuta Alla ye. Alla ya mɔgɛ minnu gben anu yarɔ nun, anu donta wonuna bɛsɛnu kɔ-koe rɔ ka anu kan-kɔ sɔ anu benbanuta Alla la.

26 Woletɔ Alla ya a ma, Asiriya Mansa Pulu tara bui anuna nyamanɛ wo ma. (Ale mansɛ tɔgɛ do le fanan Tigilati-Pilesa.) Rubɛn bɔnsɔn wo, Kadi bɔnsɔn wo, Manasa bɔnsɔn-talɛ wo, ale Mansa Pulu ya wonu bira ka ta anu na pon! A ya donu sigi Hela sigisɔn rɔ. Wo kɔma, a tara donu to Hara sigisɔn rɔ. A tara donu fanan to Koson sigisɔn rɔ min bi Hebɔ bɛ dafɛ. Anu bi nyɔ wara la ha bi.

Kuranko Common Language Bible © The Bible Society in Sierra Leone, 2006.

Bible Society in Sierra Leone
Lean sinn:



Sanasan