1 Ko-Kɔrɔta-Karan 4 - ALLALA KUMƐ

Yuda Sɔrɛnu Bara-Koe

¹ Yuda sɔrɛ donu tɔgɛ le kɛnu na, Pɛrɛsi, Hɛsirɔn, Kelabu min fanan tɔgɛ le Karimi, Huri anubɛ Sobali.

² Sobali wo ya Riyaya sɔrɔn. Riyaya ya Yehati sɔrɔn. Yehati ya Ahumayi anubɛ Lehadi sɔrɔn. Mɔgɛ minnu siginɛ Sora soe burɔ, wonu benba le Ahumayi anubɛ Lehadi kɛ la.

^3-4 Kelabu min tɔgɛ fanan Karimi, ala musi Ɛfarati, wota sarɛ le Huri la. Huri kɛ kegeyɛnuta so datɛgɛnɛ le Bɛtalehɛm na. Huri wo ya den-kei mɔgɔ sawa sɔrɔn, Itam wo, Pɛnuwɛli wo, anubɛ Ɛsɛri. Hurila den Itam wo ya den-kei mɔgɔ sawa sɔrɔn, Yɛsɛreli wo, Isima wo, anubɛ Idibasi. Itam wo ya dunmusi kelen sɔrɔn. Wo tɔgɛ le Hasɛlɛlɛponi. Hurila den Pɛnuwɛli kɛ le ya Kɛdɔ soe datɛgɛ. Hurila den Ɛsɛri ya Husa soe datɛgɛ.

⁵ Hɛsirɔnna den Asura min ya Tekoya soe datɛgɛ, musu fila le wo bolo nun, Hila anubɛ Neyara.

⁶ Neyara wo ya den-kei mɔgɔ nani sɔrɔn Asura ye, Ahusam wo, Hifa wo, Timɛnayi wo, anubɛ Heyahasatɛri.

⁷ Hila wo ya den-kei mɔgɔ sawa sɔrɔn Asura ye, Sirɛti wo, Isihari wo, anubɛ Ɛtinan.

⁸ Kosi ya Anubu anubɛ Sobiba sɔrɔn. Harumna den Aharahɛli, wo tɔgɛ sara kebilɛ kuma. Anu benba le Kosi kɛ la.

⁹ Kei do ye nyɔ nun, a tɔgɛ le Yebɛsi. A ya gbiliyɛ sɔrɔn ka tenbi a kebila-mɔgɛ bɛɛ la. A na ya a tɔgɔ sa Yebɛsi bawo a sɔrɔn tinɛ, a ya duma-siyaman tayen.

¹⁰ Yebɛsi wo ya Isirɛlata Alla madiya, a ko, “E, Alla, ita duwɛ layigi n kuma ka do sa nta dugi kuma. To n fɛ ka n tanka ko-yogomɛ ma min si a ma, n ni dumɛ rayen.” A ya Alla matara fan minna ko ma, a ya wo nyinya a ye.

Yuda Sɔrɛ Donu Bara-Koe

¹¹ Suwa na-kelen-nyɔgɛ Kilubu, wo ya dan do sɔrɔn min tɔgɛ Mihɛri. Mihɛri wo ya Ɛsitɔn sɔrɔn.

¹² Ɛsitɔn wo ya den-kei mɔgɔ sawa sɔrɔn, Bɛti-Refa wo, Paseya wo, anubɛ Tɛhena. Tɛhena wo ya Nehasi soe datɛgɛ. Mihɛri kegeyɛnu denu siginɛ Rika soe burɔ.

¹³ Kenasi ya den-kei mɔgɔ fila sɔrɔn, Ɔtiniyɛli anubɛ Sɛraya. Ɔtiniyɛli ya den-kei mɔgɔ fila sɔrɔn, Hetati anubɛ Miyonotayi.

¹⁴ Miyonotayi ya Ɔfara sɔrɔn. Kenasila den Sɛraya ya Yohabu sɔrɔn. Yohabu wo ya lɛɛ do datɛgɛ, anu bi a fɔla min ma ko, “Boloma-wɔli-kɛlɛnu barɛ” bawo mɔgɛ minnu sigira nyɔ, boloma-wɔli-kɛ-hɛnkili ye wonu bolo.

¹⁵ Yɛfunɛla den Kelabu ya den-kei mɔgɔ sawa sɔrɔn, Iru wo, Ila wo, anubɛ Neyam. Ila wo ya Kenasi sɔrɔn.

¹⁶ Yɛhalɛlɛli ya den-kei mɔgɔ nani sɔrɔn, Sifi wo, Sifa wo, Tiriya wo, anubɛ Asarɛli.

¹⁷ Ɛsɛra ya den-kei mɔgɔ nani sɔrɔn, Yɛta wo, Mirɛdi wo, Ɛferi wo, anubɛ Yalon. Mirɛdi kɛ ya Iyipiti mansɛla dunmusu Beteya furu. Anubɛ wo ya dunmusi kelen sɔrɔn min tɔgɛ le Miriyam. Wo kɔma, anu ya den-kei mɔgɔ fila sɔrɔn tun, Sameyai anubɛ Isiba. Isiba wo ya Ɛsitɛmowa soe datɛgɛ.

¹⁸ Mirɛdi wo ya dunmusu kelen furu Yuda bɔnsɔn rɔ. Anubɛ wo ya den-kei mɔgɔ sawa sɔrɔn, Yirɛdi wo, Hibera wo, anubɛ Yɛkutiyɛli. Yirɛdi wo ya Kɛdɔ soe datɛgɛ. Hibera wo ya Soko soe datɛgɛ. Yɛkutiyɛli wo ya Sanowa soe datɛgɛ.

¹⁹ Hodaya ya Naham tirisan-musi furu. Wonu kegeyɛnu denu bɔnsɔn tɔgɛ le Kam. Wonu siginɛ Kiyaila soe burɔ. Anu kegeyɛ donu fanan bɔnsɔn tɔgɛ le Meyaka. Wonu siginɛ Ɛsitɛmowa soe burɔ.

²⁰ Simon ya den-kei mɔgɔ nani sɔrɔn, Aminɔ wo, Rina wo, Bɛnhenan wo, anubɛ Tailon. Isi ya den-kei mɔgɔ fila sɔrɔn, Soheti anubɛ Bɛnsohɛti.

Sela Sɔrɛnu Bara-Koe

²¹ Yudala den-kei do tɔgɛ le Sela. Sela wo ya Ɛra sɔrɔn. Ale Ɛra, wo le ya Lika soe datɛgɛ. Sela wo ya Leyada fanan sɔrɔn. Leyada wo ya Marasa soe datɛgɛ. Ale Leyada wo kegeyɛnu fanan mara linɛn-kura-ladannɛnu na minnu sigira Bɛti-Asibiya soe burɔ.

²² Ale Sela kegeya-mɔgɛ donu tɔgɛ le kɛnu na, Yokim wo, Yohasi wo, anubɛ Sarafu. Yohasi wonubɛ Sarafu, wonu ya furinu kɛ Mohabu nyamanɛ rɔ. Anu sigira Bɛtalehɛm soe burɔ. Mɔgɛ minnu sigira Kosiba soe burɔ, wonu bɔra Sela kegeyɛ rɔ fanani. (Tɔgɛ kɛnu sɛbɛnɛ ko-kɔrɔta-karan-buku fɔlɔfɔlɛ donu tɔ.)

²³ Sela kegeya-mɔgɛ donu minnu sigira Nɛtayim anubɛ Kɛdera soenu tɔ, wonu kusan bɔnku-daga-sɔ-ko-wɔlɛ la. Wonu tora wɔlila mansɛ kɔrɔ.

Simiyɔn Sɔrɛnu Bara-Koe

²⁴ Yakobala den Simiyɔn ya den-kei mɔgɔ loli sɔrɔn, Nɛmuwɛli wo, Yamin wo, Yaribu wo, Seraha wo, anubɛ Sala.

²⁵ Sala ya Salumu sɔrɔn. Salumu ya Mibisan sɔrɔn. Mibisan ya Misima sɔrɔn.

²⁶ Misima ya Hamuwɛli sɔrɔn. Hamuwɛli ya Sakura sɔrɔn. Sakura ya Simayi sɔrɔn.

²⁷ Simayi ya den-kei mɔgɔ tan-ni-wɔrɔ sɔrɔn anubɛ dunmusu wɔrɔ. Simayi na-kelen-nyɔgɛnu ma den-siyaman sɔrɔn. Wo le ya a ma, Simiyɔn bɔnsɔn ma kolo iko Yuda bɔnsɔn.

^28-31 Biri-Siba wo, Moleda wo, Hesa-Suwali wo, Biliha wo, Isɛm wo, Toladi wo, Bɛtuwɛli wo, Hɔrima wo, Sikilagi wo, Bɛti-Marakaboti wo, Hesa-Susa wo, Bɛti-Bereyai wo, anubɛ Seyareyim, ha Dawuda mara mansɛ la Yuda nyamanɛ rɔ, Simiyɔn kegeyɛnu siginɛ soe kɛnu tɔ.

³² Ale Simiyɔn kegeyɛ donu sigira so lolɛ donu tɔ fanan. So lolɛ wonu tɔgɛ le kɛnu na, Itam wo, En wo, Rimɔn wo, Tokɛn wo, Asan wo,

³³ anubɛ so-mɛsɛ minnu bi wonuna foolɛnu tɔ. Anuna dugi tara furr, ha Beyali-Ati soe dafɛ. Mɔgɛ wonu ya anu kegeya-mɔgɛ kɛnu tɔgɛ anubɛ anuna soenu tɔgɛ sɛbɛ anu nyɛrɛta kɛdi-sɛbɛnɛnu tɔ.

^34-38 Simiyɔn bɔnsɔn-kunyɛ le kɛnu na, Mɛsobabu wo, Yamalɛki wo, Hamasala den Yosa wo, Yowɛli wo, Yosebayala den Yehu wo, Ɛleyowenayi wo, Yeyakoba wo, Yɛsohaya wo, Asaya wo, Adeyɛli wo, Yɛsemeyɛli wo, Bɛnaya wo, anubɛ Saifayila den Sisa. (Yosebayala den Yehu, wo benba tɔgɛ le Sɛraya. Sɛraya fa tɔgɛ Asiyɛli. Saifayi wola den Sisa, wo benba tɔgɛ le Alɔn. Alɔn wo fa tɔgɛ le Yɛdaya. Yɛdaya wo fa tɔgɛ Simiri. Simiri wo fa tɔgɛ Sɛmaya.) Bɔnsɔn kɛnu yirita bui!

³⁹ Anu tara sigila tele-yigi wara la ha ka gbɛrɛn Kirari soe ma. Anu tara sigi Kirari soe dafɛ min bi lɛɛ do tele-bɔɛ wara la. Anu tara nyɔ alako anuna sagɛnu ni anu de-nyini tinɛ sɔrɔn.

⁴⁰ Anu ya kan-tina-hakika-belebele do yen nyɔ, kolo-fen de-nyini tinɛ, kɔni. Nyɔ kimanɛ pɔi! Hama kegeyɛ donu denu siginɛ nyɔ nun fɔlɔ.

⁴¹ Yuda Mansa Hɛsakayata wati rɔ, bɔnsɔn kunyɛ wonu tara Kirari sorɔ-sigilɛnu nahalaki tinɛ ka anuna daga makɛ tinɛnu tinya. Nyɔ mara Simiyɔn kebila-kunyɛ wonu sigi tinɛ la bawo kolo-fen de-nyini-tina-siyaman bi nyɔ rɔ.

⁴² Simiyɔn bɔnsɔn-mɔgɔ kɛmɛ loli (500) tara sigi tele-bɔɛ wara la ha Idɔm nyamanɛ-dan la. Isila dannu, Pɛlataya wo, Niyaraya wo, Rɛfaya wo, anubɛ Yusiyɛli sɔra mɔgɛ kɛnu yarɔ.

⁴³ Amalɛki toe minnu siginɛ nyɔ rɔ, anu ya wonu faga. Ha bi, anu siginɛ nyɔ rɔ.