1 Ko-Kɔrɔta-Karan 27 - ALLALA KUMƐ

Kɛlɛ-Kurugbɛnu Bara-Koe

¹ Isirɛla mɔgɔ-banu anubɛ kebila-kunyɛnu anubɛ bɔnsɔn-kunyɛnu, wonu bi Isirɛla nyamanɛ kumafɛlɛnna. Karɛ-wo-karɛ, kɛlɛ-kurugba-kurɛ si bɔ kɛnu tɔ anubɛ kɛlɛ-den-kura waga mogan-ni-nani (24,000). Anu ya kɛlɛ-kurugba-kurɛ minnu sigi, wonu tɔgɛ le kɛnu na.

² Anu ya mɔgɔ fɔlɔtɛ min sigi, wo le Sabadiyɛlila den Yasabɛyami la.

³ Yuda bɔnsɔn-mɔgɛ do le ka bɔ Pɛrɛsi kebilɛ rɔ.

⁴ Anu ya kurugba fila nyɔgɛ min sigi, wo le Dodayi la. Aho kegeya-mɔgɛ do le ale la. (Wo kan-kɔrɔ-sigilɛ le Mikiloti la.)

⁵ Anu ya kurugba sawa nyɔgɛ min sigi, wo le Saraka-Masɔla Yɛhoyadala den Bɛnaya la.

⁶ Ale le ye mansɛla kɛlɛ-den-kun bi-sawɛ kun na. Amaisabadi tora a fa Bɛnaya gbɛ rɔ.

⁷ Anu ya kurugba nani nyɔgɛ min sigi, wo le Yohabu dɔgɔ Asahɛli la. Sebadaya tora a fa Asahɛli gbɛ rɔ.

⁸ Anu ya kurugba loli nyɔgɛ min sigi, wo le Samahuti la min bɔra Isihari kebilɛ rɔ.

⁹ Anu ya kurugba wɔrɔ nyɔgɛ min sigi, wo le Ikisila den Aira la ka bɔ Tekoya soe burɔ.

¹⁰ Anu ya kurugba wɔrɔnfila nyɔgɛ min sigi, wo le Hɛlɛsi la. Ifɛrɛm bɔnsɔn-mɔgɛ do le ale la ka bɔ Pilona soe burɔ.

¹¹ Anu ya kurugba segin nyɔgɛ min sigi, wo le Husa kɛ Sibɛkayi la min bɔra Sara kebilɛ rɔ.

¹² Anu ya kurugba kɔnɔntɔ nyɔgɛ min sigi, wo le Anatɔti kɛ Abiyɛsa la min bɔra Bɛnyamɛ bɔnsɔn rɔ.

¹³ Anu ya kurugba tan nyɔgɛ min sigi, wo le Nɛtofa kɛ Maharayi la min bɔra Sara kebilɛ rɔ.

¹⁴ Anu ya kurugba tan-ni-kelen nyɔgɛ min sigi, wo le Pairetɔn kɛ Bɛnaya la min bɔra Ifɛrɛm bɔnsɔn rɔ.

¹⁵ Anu ya kurugba tan-ni-fila nyɔgɛ min sigi, wo le Nɛtofa kɛ Hɛladayi la ka bɔ Ɔtiniyɛli kebilɛ rɔ.

Isirɛla Bɔnsɔn-Kunyɛnu Bara-Koe

¹⁶ Isirɛla bɔnsɔn-kunyɛ minnu bi nyɔ kɛ wati rɔ, wonu tɔgɛ le kɛnu na. Sikirila den Ɛliyesa ye Rubɛn bɔnsɔn kun na. Meyakala den Sɛfataya ye Simiyɔn bɔnsɔn kun na.

¹⁷ Kɛmuwɛlila den Hasabaya ye Lifayi bɔnsɔn kun na. Saraka-Masɔla Sedoki le ye Aruna kebilɛ kun na.

¹⁸ Mansa Dawuda kɔrɔ Ɛlihu ye Yuda bɔnsɔn kun na. Maikalila den Hɔmɔri ye Isakari bɔnsɔn kun na.

¹⁹ Hɔbadayala den Isimaya ye Sɛbulɔn bɔnsɔn kun na. Asireyɛlila den Yɛrɛmoti ye Nafatali bɔnsɔn kun na.

²⁰ Asasayala den Hoseya ye Ifɛrɛm bɔnsɔn kun na. Pɛdayala den Yowɛli ye Manasa bɔnsɔn-talɛ kun na tele-yigi wara la.

²¹ Sakarayala den Ido ye Manasa bɔnsɔn-talɛ kun na tele-bɔɛ wara la. Abinala den Yeyasiyɛli ye Bɛnyamɛ bɔnsɔn kun na.

²² Yɛrohamna den Asarɛli ye Dan bɔnsɔn kun na.

²³ Minnu sɔrɔn ma ke wɛ san mogan rɔ, Mansa Dawuda ma wonu dan bawo Mari ara lanyiri kiri ko Isirɛla mɔgɛnu si siyaya iko lolenu.

²⁴ Sɛruya Yohabu ya Isirɛla mɔgɛnu-dan dabira kɔnɔ a ma ban a mɔgɛ damasi danna. Alla ya Isirɛla mɔgɛnu tɔrɔ ka a tɛgɛ anu dan-koe ma. Woletɔ mɔgɛnu yatɛ ma sɛbɛ Mansa Dawudala mansaya-buku rɔ.

Mansɛla Fen-Makandannɛnu Bara-Koe

²⁵ Adeyɛlila den Asamafɛti ye mansɛla fen namara tinɛ kun na. Mansɛ bolo-fan minnu bi kanikɔma soe doinu tɔ, Yusayala den Yonatan, ye wonu kun na.

²⁶ Kilubula den Ɛsiri ye mansɛla sɛni-salɛnu kun na.

²⁷ Rema kɛ Simayi ye mansɛla nɔnbɔ-sɛnɛnu kun na. Sefam kɛ Sabadi ye mansɛla nɔnbɔ-gbɔ-yi namara tinɛnu kun na.

²⁸ Kida kɛ Beyali-Hanan ye mansɛla ɔlifi-tulu-kɔn anubɛ toro-kurinu kun na minnu bi gburukulinu kuma tele-yigi wara la. Yohasi ye mansɛla ɔlifi-tuli wonu kun na.

²⁹ Sarɔn kɛ Setareyayi ye mansɛla ninki-wɔrɛnu kun na Sarɔn gbɛndengbere ma. Adalayila den Sefati ye mansɛla ninki-wɔrɛ kun na lɛɛnu tɔ.

³⁰ Obeli min bɔra Sumanyila bɔnsɔn rɔ ye mansɛla nyomɛnu kun na. Mɛran kɛ Yɛdeya ye mansɛla sofɛlɛnu kun na. Hagira kɛ Yesisi ye mansɛla sagɛnu anubɛ baanu kun na.

³¹ Ma ara minnu madan kɛ la, wonu denu taranta Mansa Dawuda bolo-fannu makandanna.

Dawuda Makawandilɛnu Bara-Koe

³² Mansa Dawuda fa na-kelen-nyɔgɛ min tɔgɛ Yonatan, makawandi-kɛla-nyimɛ anubɛ kɛdi-sɛbɛlɛ le ale la. Mansɛla dannu karannɛ le ale Yonatan anubɛ Hakimɔnila den Yɛhiyɛli la.

³³ Mansɛ makawandilɛ do le ale Ahitafɛli fanan na. Mansɛ diyana-mɔgɛ anubɛ a hɛnkili-kɔlɛ le Husayi la min bɔra Araka soe burɔ.

³⁴ Ahitafɛli fagɛ, Abiyatari anubɛ Bɛnayala den Yɛhoyada mara mansɛ makawandilɛnu na. Mansɛta kɛlɛ-den-kun-wɛ le Yohabu la.