1 Ko-Kɔrɔta-Karan 26 - ALLALA KUMƐ

Bato-Bon-Makandannɛnu Bara-Koe

¹ Lifayi bɔnsɔn minnu bi Bato-Bɔn makandanna, wonu fanan talata iko anuta wɔlɛ ye nya min. Wonu tɔgɛ le kɛnu na, Kɔrila den Mɛsɛlɛmaya min benba tɔgɛ Esafi, Kora kebila-mɔgɛ do le ale la.

² Ale Mɛsɛlɛmaya ya den-kei mɔgɔ wɔrɔnfila sɔrɔn. Ala sarɛ tɔgɛ le Sakaraya. Wo dɔgɔ tɔgɛ le Yɛdiyɛyɛli. Wo fanan dɔgɔ tɔgɛ le Sebadaya. Wo fanan dɔgɔ tɔgɛ le Yataniyɛli.

³ Wo fanan dɔgɔ tɔgɛ le Ilam. Wo fanan dɔgɔ tɔgɛ le Yihohenan. Wo fanan dɔgɔ tɔgɛ le Ɛleyowenayi.

⁴ Allata duwɛ tora Obɛdi-Idɔm kuma ka den-kei mɔgɔ segin di a ma. Ala sarɛ tɔgɛ le Sɛmaya. Wo dɔgɔ tɔgɛ le Yɛhosabadi. Wo fanan dɔgɔ tɔgɛ le Yowa. Wo fanan dɔgɔ tɔgɛ le Saka. Wo fanan dɔgɔ tɔgɛ le Natanɛli.

⁵ Wo fanan dɔgɔ tɔgɛ le Amiyɛli. Wo fanan dɔgɔ tɔgɛ le Isakari. Wo fanan dɔgɔ tɔgɛ le Piyulatayi.

^6-7 Obɛdi-Idɔmla sarɛ Sɛmaya, wo fanan ya den-kei mɔgɔ wɔrɔ sɔrɔn. Dan wonu tɔgɛ le kɛnu na, Ɔtini wo, Rɛfeyɛli wo, Obɛdi wo, Ɛlisabadi wo, Ɛlihu wo, anubɛ Sɛmakaya. Kun-tigi le Sɛmayala dan kɛnu na anuna kebilɛ rɔ bawo anu si ke ko-siyaman mala anu nyɛrɛ ma. Ɛlihu anubɛ Sɛmakaya wonu kusan da-makandan la doi wonu ko.

⁸ Mɔgɔ bi-wɔrɔ ani mɔgɔ fila minnu kusan da-makandan la, ado anu kole gbɛlɛ, wonu bɔra Obɛdi-Idɔm kebilɛ le tɔ ka Bato-Bɔn makandan.

⁹ Mɔgɔ tan-ni-segin minnu kusan da-makandan la, wonu bɔra Mɛsɛlɛmaya kebilɛ le tɔ.

^10-11 Mɛrari kebila-mɔgɛ do le Hosa la. Hosa wo ya den-kei mɔgɔ nani sɔrɔn. Wonu tɔgɛ le kɛnu na. Simiri wo, Helikaya wo, Tɛbalaya wo, anubɛ Sakaraya. (Sara ma Simiri la kɔnɔ a fa Hosa ya ale Simiri sɔ den-kei-sarɛ sɔ tinɛ.) Mɔgɔ tan-ni-sawa min bɔra Hosa kebilɛ rɔ, wonu ya Bato-Bɔn makandan.

¹² Anu ya Bato-Bon-makandannɛ wonu tafara iko anuna kebilɛ ye nya min. Bɛɛ ya ata wɔlɛ sɔrɔn Bato-Bɔn la iko Lifayi bɔnsɔn doinu ya anutɛ sɔrɔn nya min.

¹³ Kebila-kinama wo, kebila-dɔgɔma wo, anu dama ya korɔn lakɛ anu nyɔgɔn tɛma ka a lɔn min si dɛ min makandan.

¹⁴ Korɔn gbɛra Sɛlimaya ma ko ale ni tele-bɔɛ waralɛ-dɛ makandan. Ala den Sakaraya min si to mɔgɔ-makawandi-nyimɛ kɛla, korɔn gbɛra wo ma kantɔ-waralɛ-dɛ ma.

¹⁵ Korɔn gbɛra Obɛdi-Idɔm ma dugula-waralɛ-dɛ ma. Korɔn gbɛra ale Obɛdi-Idɔmla dannu ma. Wonu tora fen namara tinɛnu makandanna.

¹⁶ Korɔn gbɛra Supim anubɛ Hosa ma ko wonu ni to tele-yigi warala-dɛ makandanna anubɛ da-dogbɛrɛ min bi kilɛ kantɔɛ telen tɔ. Dɛ wo tɔgɛ le Salɛkɛti. Wɔli talanɛ anu tɛma wati sanɛ le ma ka le.

¹⁷ Tele-wo-tele, mɔgɔ wɔrɔ-wɔrɔ si to tele-bɔɛ waralɛ makandanna. Kantɔ wara la, mɔgɔ nani nani. Dugula wara la, mɔgɔ nani-nani. Fen namara tinɛnu, mɔgɔ nani, fila-filanyɛ ma.

¹⁸ Mɔgɔ fila-fila si to dandan-kɔrɛ makandanna tele-yigi wara la. Mɔgɔ nani-nani si to kilɛ makandanna.

¹⁹ Mɔgɛ minnu bɔra Kora anubɛ Mɛrari kebilɛ rɔ, anu ya fen-makandan-ko-wɔlɛ tala wonu na ka le.

Wɔli-Gbɛrɛ Doi minnu bi Bato-Bɔn Burɔ

²⁰ Lifayi bɔnsɔn-mɔgɛ donu mara Bato-Bɔn-wodi anubɛ Alla kɔ-fannu-namaralɛnu na.

²¹ Kɛrisɔnla den Leyadan, wo le mara kebila-siyaman-kunyɛ la. Hali ala den Yɛhiyɛlita denbayɛnu ye wonu tɛma.

²² Bato-Bon-wodi anubɛ fen-namaralɛ le Leyadanla den Setami anubɛ Yowɛli la.

²³ Kohatila dannu, Amiram wo, Isihari wo, Hiburɔn wo, anubɛ Yusiyɛli, wɔli kelan wo ye wonu kebilɛ fanan bolo Bato-Bɔn fen namara tinɛ la.

²⁴ Nɛbi Musa mamanɛ, Subeyɛli, Kɛrisɔnla dan, kɔni, wo le mara fen-namaralɛnuna-kun-tigi la.

²⁵ Kɛrisɔn dɔgɔ Ɛliyesa, wo kegeya-mɔgɛ do le Sɛlomiti la bawo Ɛliyesa ya Rehabaya sɔrɔn. Rehabaya ya Yɛsaya sɔrɔn. Yɛsaya ya Yɔram sɔrɔn. Yɔram ya Sikiri sɔrɔn. Sikiri wo le ya Sɛlomiti kɛ sɔrɔn.

²⁶ Mansa Dawuda anubɛ kebila-kunyɛnu ya fen-kolomɛ minnu dantɛgɛ Alla ma wo, kɛlɛ-kunyɛnu anubɛ bɔnsɔn-kunyɛnu ya fen-kolomɛ minnu dantɛgɛ Alla ma wo, Sɛlomiti kɛ anubɛ a kebilɛ le wonu namarala.

²⁷ Kɛlɛ ya fan minnu bira, anu ya wonu dantɛgɛ Marila wɔlila ko la Bato-Bɔn la.

²⁸ Fan min bɛɛsi dantɛgɛra Marila wɔlila ko la ata Bato-Bɔn la, Sɛlomiti kɛ anubɛ a kebilɛ le wonu namarala. Hali Nɛbi Samuwɛli anubɛ Mansa Sɔli anubɛ Nɛrila den Abina anubɛ Sɛruya Yohabu nara fen-kolomɛ minnu na ka anu dantɛgɛ Marila wɔlila ko la, Sɛlomiti kɛ anubɛ a kebilɛ le ya wonu namara.

Lifayi Bɔnsɔn-Mɔgɛ Doinuna Wɔli-Nya

²⁹ Isihari kegeya-mɔgɛ do ye nyɔ min tɔgɔ Kɛnɛnaya. Kɛnɛnaya wonubɛ a kebilɛnu denu bi kɛdi sɛbɛ anubɛ kiti-tɛgɛ-ko-wɔlɛ la Isirɛla mɔgɛnu tɛma.

³⁰ Hiburɔn kegeya-mɔgɛ do ye nyɔ min tɔgɔ Hasabaya. Wonubɛ a na-kelen-nyɔgɔ-hɛnkilima mɔgɔ waga kelen ani mɔgɔ kɛmɛ wɔrɔnfila (1,700) siginɛ Isirɛla mɔgɛnu kun na Yorodan bɛ tele-yigi wara la. Anu siginɛ Isirɛla mɔgɛnu kun na ka mansɛta wɔlɛ kɛ katarala Marita wɔlɛ ma.

³¹ Mansa Dawudala mansayɛ san bi-nani nyɔgɛ ma, anu ya Hiburɔn bɔnsɔn-mɔgɛnu fɛsɛfɛsɛ. Kɔnɔ tɔ-a-la, anu ya a lɔn ko kɛlɛ-den-hɛnkilimɛ donu siginɛ Yasa soe burɔ Kaliyadi nyamanɛ rɔ. Hiburɔn kegeya-mɔgɛ do ye nyɔ min tɔgɛ Yɛraya, ado kɛlɛ-den-hɛnkilimɛ kunyɛ le ale la.

³² Mansa Dawuda ya wonubɛ a na-kelen-nyɔgɔ-hɛnkilima mɔgɔ waga fila ani mɔgɔ kɛmɛ wɔrɔnfila (2,700) yabɔ ka wonu sigi Rubɛn bɔnsɔn anubɛ Kadi bɔnsɔn anubɛ Manasa bɔnsɔn-talɛ kun na Yorodan bɛ tele-bɔɛ wara la. Anu siginɛ Isirɛla mɔgɛ wonu kun na ka mansɛta wɔlɛ anubɛ Marita wɔlɛ kɛ.